Tungod sa daghang makalingaw nga gamit sa teknolohiya nga daling maanaa, dali ra ang paggahin og daghang panahon niini ug dili na paigo ang panahon sa pagbuhat sa importanting mga kalihokan sa pagbasa, pagdula diha sa gawas, o paggahin og panahon uban sa atong mga pamilya ug higala. Pipila sa atong mga mambabasa ug ilang mga pamilya nakakita og pamaagi kon unsaon pagbalanse ang ilang kinabuhi—naghinumdom nga ang Espiritu mopuyo sa malipayon, matarung nga mga panimalay.
Kami naka-download og mga istorya sa kasulatan ug angay nga mga musika ngadto sa among mga MP3 player. Ang among computer gibutang asa ang tanan makakita niini. Kami dili manan-aw og TV sa dili pa magklase o hangtud mahuman ang among homework ug mga buluhaton inigka hapon. Adunay mga channel sa among TV nga gi-block aron dili gyud ni matan-aw. Imbis nga manan-aw og TV, kami magdula sa gawas, motabang sa pag-garden, o magdula og mga board game. Kon adunay balanse sa atong kinabuhi, ang atong panimalay mas hilum ug malinawon.
Sarah, Steven, Christie, ug Jason L.; 7, 15, 20, ug 18 anyos; Queensland, Australia
Sa among pamilya kami adunay unom ka “TV ticket” sa sinugdanan sa semana. Ang usa ka ticket katumbas og usa ka oras sa pagtan-aw og TV. Sa luyo sa kada ticket adunay listahan sa mga butang nga kinahanglan namong buhaton sa dili pa namo magamit ang tiket, sama sa paglimpyo sa kwarto, paghuman sa among homework, ug paghimo sa among mga buluhaton. Imbis nga mogamit sa teknolohiya sa tanang panahon, kami ganahan nga mobasa, magdula sa usag usa ug sa mga higala.
Trevor ug Nicolette C., 10 ug 13 anyos, Utah, USA
Usa ka TV Ticket
Imbis nga motan-aw og TV kanunay, ganahan kaming mobasa! Ug kon mahuman na ang tanan namong buluhaton ug malimpyo ang balay, kami makagamit sa Internet. Kami naggamit og timer sa pag-monitor sa panahon nga among gigahin sa computer.
Ellie, Jared, Ethan, ug Abby H.; 8, 11, 2, ug 6 anyos; California, USA