Malumong mga Kalooy sa Ginoo

Ang malumong mga kalooy sa Ginoo mao ang mismong personal ug sa tinagsa-tagsa nga mga panalangin, kalig-on, proteksyon, pagpasalig, paggiya, mahigugmaong mga kalooy, paghupay, pag-abag, ug espirituhanong mga gasa diin atong nadawat gikan ug tungod ug pinaagi ni Ginoong Jesukristo. Sa pagkatinuod, ang Ginoo mipahiangay “sa iyang mga kalooy sumala sa mga kahimtang sa mga katawhan” (D&P 46:15).

Hinumdumi giunsa sa Manluluwas pagtudlo ang Iyang mga apostoles nga dili Siya mobiya kanila nga walay makahupay. Dili lamang kay Siya mopadala “sa laing Maghuhupay” (Juan 14:16), bisan gani ang Espiritu Santo, apan ang Manluluwas miingon nga Siya mobalik kanila (tan-awa sa Juan 14:18). Mosugyot ako nga usa sa mga paagi diin ang Manluluwas moanhi sa matag usa kanato mao ang pinaagi sa Iyang buhong ug malumo nga mga kalooy. Sama pananglit, samtang kamo ug ako mag-atubang og mga hagit ug mga pagsulay sa atong kinabuhi, ang gasa sa pagtuo ug ang angayng pagsabut sa pagsalig sa kaugalingon nga moabut nga labaw pa sa atong kaugalingong kasarang maoy duha ka mga ehemplo sa malumo nga mga kalooy sa Ginoo. Ang paghinulsol ug pagpasaylo ug ang kalinaw sa konsiyensya mga ehemplo sa malumong mga kalooy sa Ginoo. Ug ang paglahutay ug ang kalig-on nga nakapahimo kanato nga madasigon nga mopadayon sa unahan agi sa mga pisikal nga limitasyon ug sa mga espirituhanong kalisud mga ehemplo sa malumo nga mga kalooy sa Ginoo.

Sa bag-ohay lang nga komperensya sa stake, ang malumo nga mga kalooy sa Ginoo makita diha sa makapatandog nga pagpamatuod sa usa ka batan-ong asawa ug inahan sa upat ka bata kinsang bana napatay didto sa Iraq niadtong Disyembre 2003. Kining malig-ong sister miasoy kon giunsa, human nga gipahibalo sa kamatayon sa iyang bana, siya nakadawat sa iyang Christmas card ug mensahe. Taliwala sa kalit nga kamatuoran sa mahinuklugong kausaban sa kinabuhi miabut niining buotan nga sister ang tukma sa panahon ug malumo nga pahinumdom nga sa tinuod ang mga pamilya mahimong magkahiusa hangtud sa hangtud. Uban sa permiso mokutlo ako niadtong maong Christmas card:

“Alang sa pinakanindot nga pamilya sa kalibutan! Paglingaw-lingaw kamong tanan ug hinumdumi ang tinuod nga kahulugan sa Pasko! Ang Ginoo naghimo nga posible alang kanato nga magkahiusa hangtud sa hangtud. Busa bisan kon kita nagkalagyo man, sa gihapon magkauban gayud kita nga pamilya.

“Ang Dios manalangin ug magpabilin kaninyong luwas ug mohatag niini nga Pasko nga mahimo natong gasa sa gugma gikan kanato ngadto Kaniya sa kahitas-an!!!

“Sa tibuok nakong gugma, Daddy ug imong mahigugmaong bana!”

Klaro gayud, nga ang gipasabut sa bana sa ilang panaglagyo sa iyang mensahe sa Pasko mao ang panagbulag tungod sa iyang military assignment. Apan alang niini nga sister, sama sa tingog gikan sa abog sa mitaliwan nga mahangturong kauban ug amahan, miabut ang gikinahanglan kaayong espirituhanong pasalig ug pagsaksi. Sama sa akong gipasabut ganina, ang malumo nga mga kalooy sa Ginoo dili moabut nga sulagma lamang o dili ba nahiatol lang. Ang pagkamatinud-anon, pagkamasulundon, ug pagpaubos modapit sa malumo nga mga kalooy diha sa atong mga kinabuhi, ug sa kanunay ang pagpahigayon sa Ginoo mao ang mopahimo kanato nga makaila ug makahatag og bili niining importanting mga panalangin.

Usa ka panahon niana nakigsulti ako sa usa ka lider sa priesthood kinsa naaghat sa pagmemorya sa mga ngalan sa tanang mga batan-on sa iyang stake nga nag-edad og 13 hangtud 21. Ginamit ang mga litrato sa batan-ong mga lalaki ug mga babaye, naghimo siya og mga flash cards nga iyang girebyu samtang nagbiyahe kay nagnegosyo ug sa uban pang mga panahon. Kini nga lider sa priesthood lider dali rang nakamemorya sa mga ngalan sa tanang batan-on.

Usa niana ka gabii ang lider sa priesthood nagdamgo kalabut sa usa sa batan-ong lalaki nga iyang nailhan sa litrato lamang. Sa iyang damgo iyang nakita ang batan-ong lalaki nga nagsul-ob og puti ug adunay missionary name tag. Adunay kauban nga naglingkod sa iyang tupad, ang batan-ong lalaki nagtudlo og usa ka pamilya. Ang batan-ong lalaki naggunit og Basahon ni Mormon, ug makita nga daw nagpamatuod siya sa katinuod sa basahon. Dayon ang lider sa priesthood nahigmata sa iyang damgo.

Sa sunod nga panagpundok sa priesthood, ang lider miduol sa batan-ong lalaki nga iyang nakita sa iyang damgo ug mihangyo nga makigsulti kaniya sa makadiyot. Human sa mubong pag-ila-ila, gitawag sa lider ang batan-on sa iyang ngalan ug miingon: “Dili ako tigdamgo. Wala gayud ako makadamgo bisag usa ka miyembro niini nga stake, gawas nimo. Sultihan ka nako sa akong damgo, ug dayon gusto ako nga motabang ka nako nga makasabut unsa ang gipasabut niini.”

Giasoy sa lider sa priesthood ang damgo ug nangutana sa batan-ong lalaki kon unsay kahulugan niadto. Sa gibating emosyon nga daw natuk-an, ang batan-ong lalaki yanong mitubag, “Kini nagpasabut nga ang Dios nakaila kinsa ako.” Ang nahibiling panagsultihanay tali niining batan-ong lalaki ug sa iyang lider sa priesthood mas labing makahuluganon, ug nagsabut sila nga magkita matag karon ug unya aron magtinambagay sulod sa sunod nga mga bulan.

Kadtong batan-ong lalaki nakadawat sa malumong mga kalooy sa Ginoo pinaagi sa dinasig nga lider sa priesthood. Akong sublion pag-usab, ang malumo nga mga kalooy sa Ginoo dili moabut nga sulagma lamang o dili ba nahiatol lang. Ang kamatinud-anon ug kamasulundon makapahimo kanato sa pagdawat niining importante nga mga gasa ug, sa kanunay, ang pagpahigayon sa Ginoo makatabang kanato sa pag-ila niini.

Dili gayud nato ipakaminos o ibaliwala ang gahum sa malumong mga kalooy sa Ginoo. Ang kayano, ang katam-is, ug ang makanunayon nga malumong mga kalooy sa Ginoo dako kaayog mahimo sa paglig-on ug pagpanalipod kanato sa mga panahon sa kasamok diin anaa kanato karon ug sa umaabut. Kon ang mga pulong dili makahatag sa kahupay nga atong gikinahanglan o makapahayag sa kalipay nga atong gibati, diin wala gyuy mahimo ang pagsulay sa pagpasabut nianang dili mahimong mapasabut, kon ang katarungan ug rason dili makahatag og igong pagsabut kalabut sa mga dili patas nga hustisya ug sa walay kaangayan sa kinabuhi, kon ang mortal nga kasinatian ug pagtuki dili igo nga makahatag sa gustong mahitabo, ug kon daw kita nag-inusara ra gyud, sa tinuoray gipanalanginan kita pinaagi sa malumong mga kalooy sa Ginoo ug nahimong malig-on gani ngadto sa gahum sa kaluwasan (tan-awa sa 1 Nephi 1:20).

Ang pulong nga pinili sa 1 Nephi 1:20 maoy sentro sa pagsabut sa konsepto sa malumong mga kalooy sa Ginoo. Ang diksyonaryo nagpasabut nga ang pinili nagsugyot nga maoy gipili, gikuha kay pinalabi, o pinili. Magamit usab kini kon sabton nga pinalabi o pinili sa Dios.¹

Ang ubang mga tawo nga makadungog o makabasa niini nga mensahe nasayop nga mopakunhod o mosalikway diha sa ilang personal nga mga kinabuhi ang pagkaanaa sa malumong mga kalooy sa Ginoo, kay nagtuo man nga “Siguradong dili ako ang pinili o mao ba gyud ang pilion.” Tingali masayop kita sa paghunahuna nga ang maong mga panalangin ug mga gasa gitagana para sa ubang mga tawo nga makitang mas matarung ug makitang nagserbisyo sa mga pagtawag sa Simbahan. Ako mopamatuod nga ang malumong mga kalooy sa Ginoo maanaa kanatong tanan ug nga ang Manunubos sa Israel madasigon nga mohatag sa maong mga gasa kanato.

Aron mahimong pinili wala gikumpirmar para lang gyud kanato. Hinoon, kamo ug ako sa katapusan ang modeterminar kon kita gipili. Palihug timan-i ang paggamit sa pulong gipili sa mosunod nga mga bersikulo:

“Tan-awa, adunay daghan nga gitawag, apan pila lamang ang gipili. Ug ngano nga wala sila mapili?

“Tungod kay ang ilang mga kasingkasing gipahimutang diha sa mga butang niini nga kalibutan, ug naninguha sa mga pasidungog sa mga tawo” (D&P 121:34–35).

Nagtuo ako nga ang implikasyon niini nga mga bersikulo tataw kaayo. Ang Dios walay listahan sa mga paborito diin maglaum kita nga ang atong mga ngalan sa umaabut nga adlaw madugang. Wala Siya maglimit “sa pinili” ngadto sa pipila lamang. Apan, ang atong mga kasingkasing ug ang atong mga tinguha ug ang atong pagkamasulundon mao ang klaro nga mopiho kon kita maapil ba nga usa sa mga pinili sa Dios.

Si Enoch gitudloan sa Ginoo niini gayud nga punto sa doktrina. Palihug timan-i ang paggamit sa pulong mopili niini nga mga bersikulo:

“Tan-awa kining imong mga kaigsoonan, sila ang talagsaon nga mga binuhat sa akong kaugalingon nga mga kamot, ug ako mihatag ngadto kanila sa ilang kahibalo, sa adlaw nga Ako milalang kanila; ug didto sa Tanaman sa Eden, mihatag Ako ngadto sa tawo sa iyang kabubut-on;

“Ug ngadto sa imong mga igsoon Ako miingon, ug mihatag usab sa sugo, nga sila kinahanglan maghigugmaay sa usag usa, ug nga sila kinahanglan nga mopili kanako, nga ilang Amahan” (Moises 7:32–33; empasis gidugang).

Sama sa atong nakat-unan niining mga kasulatan, ang mahinungdanon nga mga katuyoan alang sa gasa sa kabubut-on mao nga mahigugma sa usag usa ug mopili sa Dios. Busa mahimo kitang mga pinili sa Dios ug modapit sa Iyang malumong mga kalooy samtang kita mogamit sa atong kabubut-on sa pagpili sa Dios.

Usa sa nailhan kaayo ug kanunayng gikutlo nga mga tudling sa kasulatan makit-an sa Moises 1:39. Kini nga bersikulo klaro ug kompletong naghulagway sa buhat sa Mahangturong Amahan: “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (empasis gidugang).

Ang kauban nga kasulatan nga makit-an sa Doktrina ug mga Pakigsaad naghulagway uban sa tumbas nga kaklaro ug kakompleto sa atong unang buhat isip anak nga mga lalaki ug mga babaye sa Mahangturong Amahan. Makapaikag gyud, kini nga bersikulo tingali dili ingon ka inila ug dili kanunayng gikutlo. “Tan-awa, kini mao ang imong buhat, sa paghupot sa akong mga sugo, oo, uban sa imong tibuok nga gahum, hunahuna ug kusog” (D&P 11:20; empasis gidugang).

Busa ang buhat sa Amahan mao ang pagpahinabo sa pagka-imortal ug sa kinabuhing dayon sa Iyang mga anak. Ang atong buhat mao ang pagsunod sa Iyang mga sugo uban sa atong tibuok nga gahum, hunahuna, ug kusog—ug busa kita mahimong pinili ug, pinaagi sa Espiritu Santo, modawat ug makaila sa malumong mga kalooy sa Ginoo sa atong adlaw-adlawng mga kinabuhi.

Gipanalanginan kita nga makadawat sa dinasig nga tambag gikan sa mga lider sa Simbahan sa Manluluwas—tukma sa panahon nga tambag alang sa atong panahon ug sa atong mga kahimtang ug sa atong mga problema. Gitudloan kita, gibayaw, gilamdagan, gitawag sa paghinulsol, ug gilig-on. Sama kaninyo, ako mainitong mobuhat sa mga pahinumdom, tambag, ug personal nga inspirasyon nga gipanalangin kanato. Sa tinuoray, “ang Ginoo maayo ngadto sa tanan: ug ang iyang malumong mga kalooy anaa sa tanan niyang mga buhat” (Mga Salmo 145:9).

Mapasalamaton ako sa Pagpahiuli sa ebanghelyo ni Jesukristo pinaagi ni Propeta Joseph Smith ug sa kahibalo nga ania kanato karon kalabut sa malumong mga kalooy sa Ginoo. Ang atong mga tinguha, pagkamatinud-anon, ug pagkamasulundon modapit ug motabang kanato nga makaila sa Iyang mga kalooy sa atong mga kinabuhi. Isip usa sa Iyang mga sulugoon, magpamatuod ako nga si Jesus mao ang Kristo, ang atong Manunubos ug ang atong Manluluwas. Nahibalo ako nga Siya buhi ug nga ang Iyang malumong mga kalooy maanaa kanatong tanan. Matag usa kanato makaangkon og mga mata nga klarong makakita ug klarong makadungog sa malumong mga kalooy sa Ginoo samtang sila molig-on ug motabang kanato niining ulahing mga adlaw. Hinaut nga ang atong mga kasingkasing kanunayng mapuno sa pasalamat sa Iyang buhong ug malumo nga kalooy.