Mga Miyembro sa Tibuok Kalibutan Nagsunod sa Propetikanhong Tambag sa Pag-organisar og Adlaw sa Serbisyo

Lakip sa mga unang stake nga mitubag sa pagdapit sa Unang Kapangulohan nga moapil sa usa ka adlaw sa serbisyo mao ang David stake sa Panama, nga miorganisar og usa ka fair sa pagpangandam alang sa ilang komunidad. Ang kalihokan, nga gipahigayon niadtong Abril, gisuportahan sa pipila ka mga institusyon sa publiko, mipahigayon og mga workshop ug mga pasundayag sa mga hilisgutan kabahin sa home storage, panalapi sa pamilya, pagpangandam sa emerhensya, ug kahimsog.

Dili paigo nga makahibalo lang niini nga mga baruganan sa atong kaugalingon, miingon si Itzel Valdez Gonzalez, kinsa miapil sa adlaw sa serbisyo. Importante usab nga moserbisyo sa uban pinaagi sa pagpakigbahin niini.

“Ang pagserbisyo sa uban usa ka importante nga kinaiya sa mga sumusunod ni Jesukristo,” siya miingon. “Kini nga panghitabo mihatag og oportunidad sa mga miyembro sa Simbahan sa paggahin sa ilang panahon ug pagpaambit sa mga talento aron sa pagpanalangin niadtong mga nanginahanglan.”

Ang mga miyembro sa Arusha Branch sa Tanzania mihukom nga moboluntaryo sa Shanga House, usa ka pasilidad nga nagbansay sa mga kahanas sa mga tawo nga adunay kakulangan ug nagtudlo kanila nga makasangkap og panginabuhi alang kanila ug sa ilang mga pamilya.

Niadtong Agusto 20, 2011, 35 ka mga partisipante—mga hamtong, kabatan-onan, ug mga bata; mga miyembro sa Simbahan, mga investigator, ug mga misyonaryo—mitabang sa mga tawo nga adunay kakulangan sa paghimo og hinimo sa kamot nga mga butang [craft] ug alahas nga mabaligya. Ang mga bolunter mitabang usab sa mga buluhaton sa panimalay sama sa pagpanglimpyo ug pagpanilhig.

Sa wala pa mobiya ang grupo, ang mga coordinator sa Shanga House mihangyo kanila nga moadto sa usa ka sentro nga dapit aron ang mga tawo nga ilang naserbisyohan makalamano sa ilang mga kamot ug makapasalamat kanila. “Emosyonal kaayo kadto nga kasinatian,” miingon si Sister Sandra Rydalch, kinsa nagserbisyo og misyon sa maong dapit uban ang iyang bana, si Elder Rich Rydalch. Sukad nianang panahona, kon ang mga tawo gikan sa Shanga House makakita og mga miyembro sa branch sa poblasyon, “sila dali nga makaila kanamo, mowara-wara, ug mohunong aron makig-estorya,” miingon si Sister Rydalch.

Si Patience Rwiza, kinsa miorganisar sa proyekto sa branch ubos sa pagpangulo sa priesthood, mipasabut og maayo nga ang kalihokan nakahatag og kaayohan dili lamang niadtong anaa sa Shanga House apan kanila usab nga mihatag sa serbisyo. “Ang mga tawo nakaugmad og pagbati sa gugma pinaagi sa pagtabang sa uban, ug niana nga paagi, ang mga tawo nakakat-un og mga butang gikan sa komunidad nga wala nila masayri kaniadto,” siya miingon. “Ang akong pagpamatuod napalig-on tungod sa akong nahimo ug nakit-an—gikan sa pag-apil sa mga miyembro ug sa komunidad sa kinatibuk-an.”

Ang mga miyembro sa Coimbra Portugal Stake nakaamgo nga ang pagserbisyo dili usa lang ka panahon nga panghitabo. Sa pagkatinuod, ang stake moapil sa pipila ka kalihokan matag tuig gamit ang logo sa Mormon Helping Hands. Ang mga kalihokan sa miaging tuig naglakip sa paglimpyo sa pangpubliko nga parke ug pagdala sa mga bata sa Primary sa pagbisita sa ubang mga bata nga nagpuyo sa orphanage. Niini ug sa uban pang mga kalihokan, importante nga paapilon ang tibuok mga pamilya, miingon si Anabela Jordão Ferreira, kinsa nagserbisyo isip direktor sa public affairs alang sa Coimbra Stake.

“Sa among mga proyekto, usahay makaingon kami nga modawat kami og mga tawo gikan sa 8 ka bulan ngadto sa 88 ka tuig ang pangidaron,” miingon si Sister Jordão. “Kana tinuod gayud. Makita namo ang mga inahan uban sa gagmayng mga bata ug apohang mga lalaki nga galisud sa paglihok, apan sila usab adunay lig-on nga pagpamatuod ug tinguha nga moserbisyo sa Ginoo.”

Dihang si Michael Hatch, kinsa nagserbisyo sa high council sa Farmington New Mexico Stake, gisangunan sa pag-organisar og adlaw sa serbisyo sa stake agig tubag sa pagdapit ni Presidente Eyring, siya naghunahuna asa sila makakaplag og mga ideya aron makapangalagad sa mga kabus sa ilang komunidad. Nakig-miting siya uban sa iyang komite, ug sila ug ang ubang mga lider sa stake miawhag sa mga miyembro sa stake sa pagpakigbahin sa ilang mga ideya sa mga panginahanglan sa komunidad.

Si Roberta Rogers nasayud sa usa ka piho nga panginahanglan tali sa pipila ka mga organisasyon sa maong dapit—lakip ang ospital diin siya nagtrabaho ubos sa community relations. Samtang ang mga proyekto sa pagpangolekta og mga saput kasagaran makakuha og mapuslanon nga mga donasyon sa ginamit na nga mga karsones, sinina, sapatos, ug mga coat, ang gikinahanglan pa sa mga kapunongan sa kalooy mao ang mga butang sama sa medyas, underwear, ug mga pajama—mga donasyon nga kinahanglang bag-o. Si Sister Rogers misugyot nga ang stake moorganisar sa pagpangolekta niining mga butanga.

Niadtong Oktubre 15, ang mga miyembro sa stake miapud-apud sa ilang mga kasilinganan og 1,000 ka mga kard para ibitay sa pultahan nga nagpasabut sa maong proyekto, midapit sa komunidad sa pag-apil, ug milista sa mga butang nga gikinahanglan. Human sa usa ka semana ang mga miyembro sa stake mibalik aron sa pagkolekta sa mga butang ug dayon midala niini ngadto sa stake center aron maklase-klase ug maapud-apud ngadto sa 10 ka lokal nga mga kapunongan sa kalooy.

Kadtong hiniusa nga paningkamot mitubag sa dinalian nga panginahanglan sa ilang komunidad, si Sister Rogers miingon. “Kadto usa ka talagsaon nga buhat, ug nakatabang sa mga tawo. Ug tungod kay dili man gayud kadto mahal, ang usa ka pamilya mogasto lang ug pipila ka dolyar ug makatabang na pag-ayo sa usa ka tawo.”