Pagsunod ug Pagtahud sa Atong Langitnong Ginikanan

Ang ebanghelyo ni Jesukristo usa ka ebanghelyo sa pagsunod, mitudlo si Elder Douglas L. Callister, kanhi sa Seventy. “Usa sa mga katuyoan sa atong yutan-ong pagsulay mao nga kita mahisama [sa atong langitnong mga ginikanan] sa mahunahunaong paagi nga kita mahimong komportable sa presensya sa langitnong pagkaginikanan.” Sila atong gisunod samtang naningkamot kita sa paghunahuna, paglihok, ug gani pagkahisama og panagway Kanila (tan-awa sa Alma 5:14).¹

Isip usa ka graphic designer, kinahanglan kong motrabaho sa daghang lahi-lahi nga mga estilo nga gikinahanglan sa nagkadaiyang mga kliyente. Sa paghimo niini, akong nakit-an ang bili sa pagbaton ug sundanan. Bisan og ang kliyente mopasabut sa trabahoon ug sa gusto nilang resulta nga detalyado kaayo, akong nakita nga makatabang ang pagbaton og hulagway nga makita samtang magtrabaho ko. Kana nga sundanan—bisan og sa hunahuna lamang—nagpahinumdom kanako sa akong tumong ug naghimo kanakong magsubay kanunay sa dalan.

Sama ra usab sa atong mortal nga probisyon, ang mga instruksyon lamang dili paigo alang sa pagpahibalo sa impormasyon o paghatag og bag-o nga konsepto. Tingali nagkinahanglan kita og litrato o sundanan diha sa atong hunahuna aron matabangan kita nga makasunod sa langitnong binuhatan. Agig resulta, kon atong hunahunaon ang atong mga kaugalingon isip mga anak sa Dios, nga nagtinguha sa pagbalik Kaniya, mas isunod nato ang atong kinabuhi sama Kaniya ug maningkamot sa mga kalidad nga anaa Kaniya.²

Ang maalamon natong Langitnong Amahan sa pagkatinuod mihatag sa Iyang Bugtong nga Anak isip atong tinuod nga ehemplo kon unsaon Siya sa pagsunod. Panahon sa mortal nga pangalagad sa Manluluwas, Iyang gibuhat ang kabubut-on sa Amahan, migahin sa Iyang panahon sa pagtabang sa uban. Sama ra usab, kon atong sundon ang Amahan ug ang Iyang Anak, atong gamiton ang atong mga gasa, talento, ug salabutan sa libre nga pagserbisyo. Samtang magserbisyo kita, atong gipasidunggan ang atong Amahan ug Siya mopasidungog kanato pinaagi sa pagtawag kanato nga moapil sa pagtukod sa Iyang gingharian.

Sama ra sa graphic design, usahay sa kinabuhi ang makita, mahikap nga mga sundanan mopuli sa sundanan nga naa ra sa hunahuna. Sagad kitang makakat-on gikan sa pagserbisyo sa uban. Mahinumduman pa gihapon nako ang unang higayon isip executive secretary sa ward nga dili nako makompleto sa paghimo ang iskedyul sa mga interbyu sa bishop. Ang bishop, hinoon, mipahinumdom kanako nga ang Ginoo maoy tigdumala ug nahibalo Siya kinsa ang nagkinahanglang makigkita sa bishop nianang adlawa—bisan kita dili. Ug sigurado gayud, sa matag higayon nga duna mi “problema,” nga sama ani mobagting ang telepono o dunay moadto nga mangutana kon may panahon ba ang bishop. Ug tungod sa iyang dinasig nga pagpangulo, duna gayud siyay panahon.

Agig dugang sa pagbaton og ehemplo sa mga lider, napanalangingan ako og mga ginikanan kinsa naghimong ehemplo sa kamabination, tinuoray nga pagtrabaho, suporta, kamatinuoron, ug kamatarung. Ang ilang mga ehemplo mao ang mga sundanan nga mahimo sab nakong sundon, nagpakita kanako sa koneksyon tali sa pagsunod sa Dios ug pagtahud sa atong amahan ug inahan. Ang matarung nga ehemplo sa yutan-on natong mga ginikanan usa ka bahin sa sundanan sa Langitnong Amahan, ug sa pagtahud kanila, makakat-on kita sa mga hiyas nga atong gikinahanglan aron makapuyo pag-usab uban sa atong Langitnong Amahan. Ug kon mahimo na kitang bahin sa matarung nga sumbanan sa kinabuhi sa atong mga anak, makatabang kita sa pagpadayon sa Iyang plano ug pagkompleto sa Iyang sundanan sa pagkaginikanan pinaagi sa pagdala dili lamang sa atong kaugalingon apan sa atong mahangturon nga mga pamilya balik Kaniya.