Niadtong Oktubre 9, 2011, usa ka kongregasyon sa 35 ka mga santos nagpundok aron motan-aw sa kinatibuk-ang komperensya—ug maminaw niini sa ilang kaugalingong pinulongan nga Georgian sa unang higayon. Sa wala pa ang Oktubre, mga 50 ka aktibong mga miyembro sa nasud adunay kapilian sa pagpaminaw sa komperensya diha sa pinulongan nga Russian, Armenian, o English. Bisan pa niana, adunay daghan nga makasulti lang og Georgian, mao nga ang pagtanyag sa paghubad usa ka mahinungdanon nga panghitabo.

“Malipayon kaayo ko nga nakapaminaw sa pamulong ni Presidente Thomas S. Monson ngari kanamo sa pinulongang Georgian,” miingon si Lela Tsnobiladze. “Dako kaayo ang kalainan kon inyong madungog ang komperensya sa inyong kaugalingong pinulongan.”

Pagkahuman sa mga Bagyong Nesat ug Nalgae sa Pilipinas sa ulahing bahin sa Septyembre, nga nakaapekto sa dul-an 200,000 ka mga tawo, ang Area Welfare Department sa Simbahan sa sinugdanan mipadala og 600 ka sakong bugas, nga gihatud sa Pampanga. Ang Social Action Center sa Pampanga sa Archdiocese sa San Fernando Pampanga, usa ka kaabay nga dili-panggobyerno nga organisasyon, midumala sa pagpang-apud apod sa gidonar nga bugas.

Ang mga Katoliko ug LDS nga mga bolunter nagtinabangay sa pag-impake ug pag-apud-apod sa gidonar nga bugas ngadto sa 352 ka naapektuhan nga mga barangay sa Pampanga.

Sa ikalima nga sunod-sunod nga tuig, ang mga miyembro sa Africa miapil sa All-Africa Mormon Helping Hands Day, managhiusa nga paningkamot tali sa Africa Southeast ug Africa West nga mga Area. Usa ka adlaw matag tuig, ang mga miyembro niini nga mga dapit mopahigayon og nagkadaiyang matang sa serbisyo sa ilang lokal nga mga komunidad. Ang kalihokan sa miaging tuig gipahigayon niadtong Agosto 20, 2011; ang mga report sa pipila ka mga proyekto anaa sa news.lds.org.