Gigakos sa Bukton sa Iyang Gugma

Sa dihang sayis anyos pa ko, ang akong mga ginikanan nagdiborsyo. Bisan tuod nagpadayon ko sa pagpuyo uban sa akong mama, anaa ra gihapon sa akong kinabuhi ang akong papa human sa panagbulag. Mipuyo ko sa iyang balay sa tapos sa semana ug usa ka adlaw tunga-tunga sa semana.

Bisan sa iyang mga paningkamot nga mahimong maayo nga amahan, sa dihang siyete anyos pa ko, iya kong gibudhian sa hilabihan. Kining pagkawala sa pagsalig maoy pagsugod sa dili maayo namong relasyon. Kon motawag siya sa balay, maglikay ko sa pagtubag sa telepono. Sa dihang midako ko, mibungat ko nga makapili kon kanus-a ko gustong moadto sa balay sa akong papa, kaysa pugson ko nga paadtoon kon kini pagbuot sa balaod.

Sa dihang anaa na ko sa high school, dili na kaayo ko mobisita. Makigkita ko niya mga duha o tulo ka higayon lang matag bulan. Sa dihang nag-college nako, panagsa na lang mi mag-istoryahanay, hangtud nga makigsulti ko niya mga kausa sa usa ka semester. Ang akong relasyon sa akong papa nahimong pormalidad na lang kaysa usa ka koneksyon tali sa ginikanan ug anak.

Sa akong ikaduhang tuig sa college, mihukom ko nga istoryahan siya kabahin sa insidente sa dihang bata pa ko nga nakadaut sa among relasyon sa mga tuig na ang milabay. Nanghinaut ko og kasulbaran, pagpasaylo, ug kahigayunan nga magsugod pag-usab. Nag-e-mail ko niya sa akong nga panghunahuna ug nagpaabut sa iyang tubag.

Sa wala madugay nakadawat ko og e-mail niya isip tubag. Sa wala pa nako basaha ang tubag ni papa, nag-ampo ko ug naghangyo sa Langitnong Amahan nga ang Iyang Espiritu maanaa nako samtang magbasa ko sa e-mail. Kini ingon kaimportante nga panahon sa akong kinabuhi—ako nang mahibaloan unsa ang ikasulti ni papa ug asa paingon ang among relasyon. Nahadlok kaayo ko ug mibati nga nag-inusara.

Sa tinuod ako nag-inusara, naglingkod sa akong kwarto uban sa akong computer. Nagkinahanglan ko og suporta. Nagpadayon ko sa pag-ampo sa Langitnong Amahan ug mibati sa Iyang Espiritu. Karon aduna na koy kaisug nga mobasa.

Ang akong papa mitubag uban sa mubo kaayo nga e-mail nga wala siya makahinumdom sa akong gipangsulti ug miingon nga dili maayo nga panahon alang kaniya sa paghisgot sa among nangagi.

Ang paagi sa iyang pagsalikway sa usa ka butang nga importante kaayo nako ug ingon og dili gusto og bisan unsang pakig-uli sa buot nakapasakit gyud kanako. Mibati ko nga gibiyaan sa akong amahan, nagmasulub-on pag-ayo sa among dili maayo nga relasyon nga milungtad og sobra sa dekada.

Samtang naglingkod ko sa akong lingkuranan nga nagbakho, nabati nako ang Espiritu. Wala pa gyud nako mabati sukad ang presensya sa Langitnong Amahan nga kusog kaayo. Sa literal nga paagi nabati nako nga “giliyokan sa kahangturan sa mga bukton sa iyang gugma” (2 Nephi 1:15). Mibati ko og kasiguroan pag-usab ug gugma samtang naglingkod nga naghilak.

Ang akong relasyon uban sa akong yutan-ong amahan mahimong nagkulang, apan anaa ang Langitnong Amahan alang kanako. Ang Iyang presensya mabati gayud nako sa akong kinabuhi. Nasayud ko nga Siya naghigugma kanako, nag-amuma kanako, ug sa kanunay gusto nga may relasyon ngari kanako. Nasayud ko nga Siya mao ang akong Amahan. Ug Siya dili mobiya.