Ang Inyong Tanom Mokaging!

Sa dihang ang among pamilya nangandam nga mabugkos didto sa Templo sa Logan Utah, mipasalig kami pag-usab sa among kaugalingon nga mosunod sa ebanghelyo ni Jesukristo. Kami partikular nga mihimo og pasalig ngadto sa Ginoo nga kami kanunay mobayad sa ikapulo. Wala madugay human sa among pagkabugkos, kami mibalhin sa Wyoming, USA, sa pagsulay sa among kamot sa pagpanguma.

Hinapos sa Abril sa dihang nagsugod kami sa pagpangandam sa among 300 acres (121 ka ektarya) nga yuta. Among gipangsunog ang sagebrush, gipatag ang yuta, ug nagkubkub og mga patubigan [ditches]. Sa dihang nagsugod na kami sa pagtanom, ulahing bahin na sa panahon sa pagpananom. Mihukom ko sa pagtanom og barley, nga motubo sulod lang sa mubong panahon.

Nakapananom nako og pipila ka mga ektarya sa dihang ang lokal nga ransero miabot ug miingon, “Nag-usik-usik lang ka sa imong panahon, kusog, ug kwarta niini nga paningkamot. Ulahi na kaayo. Ang imong tanom mokaging inig ka Agosto 21!”

Siya mihakop sa yuta ug mipadayon, “Inyong napauga ang yuta tungod sa inyong pag-rake, pagsunog, ug pagpatag. Ang inyong mga liso dili moturok kon walay umog.”

Nasayud ko nga ang yuta uga ra kaayo, apan kami nakagasto na og dakong kantidad niining tanom, busa mihukom ko nga mopadayon. Ako adunay hugot nga pagtuo nga tungod kay gibuhat namo ang among labing maayo sa pag-andam sa yuta ug kami hingpit nga tigbayad sa ikapulo, ang Langitnong Amahan motabang kanamo. Human sa pagtanom sa tanan, miluhod ko uban sa akong pamilya diha sa pag-ampo, nanghangyo sa Iyang tabang.

Pagkasunod adlaw misugod sa pag-ulan, hinay ra nga ulan nga wala mobanlas ang among mga liso o ang mga humok nga yuta sa bungtod. Ang among matinguhaon nga pag-ampo ug taas, kapoy nga mga adlaw sa pagtrabaho wala mausik.

Sa tibuok tingpamulak ug ting-init, kami nagtrabaho sa 12 ngadto sa 14 ka oras matag adlaw, unom ka adlaw matag semana, nagpatubig, nagkoral, ug nangandam alang sa ani. Gituman usab namo ang among mga saad ngadto sa Ginoo pinaagi sa pagbayad sa ikapulo ug makugihon nga nagserbisyo sa among mga calling diha sa ward. Ang lugas nindot ug mabungahon nga mitubo; ang mga tanom nga barley ingon og mikalit pagtubo sa yuta. Samtang nagkaduol ang pagtapos sa tempo sa panahon [season], hinoon, kami nabalaka nga mahimong bugnaw ra kaayo para sa among mga tanom aron mabuhi. Kami nag-ampo nga ang Dios mopreserbar sa among mga tanom, ug kami adunay hugot nga pagtuo nga Iyang tumanon ang Iyang saad niadtong mobayad og ikapulo. “Ug badlungon ko ang lumalamoy tungod kaninyo, ug siya dili na magalaglag sa mga bunga sa inyong yuta” (Malaquias 3:11).

Ang gikahadlokan nga adlaw, Agosto 21, miabut, ug ingon man ang katugnaw. Apan sa akong pag-adto sa umahan pagkasunod adlaw, akong nakita nga ang among mga tanom napreserbar. Pipila ka semana ang milabay ang among naani nga barley nakapuno og daghang truck, nga among nabaligya nga nakaginansya gayud og dako.

Pagkasunod ting-init ang among mga ektarya sa alfalfa ug barley berde kaayo taliwala nianang abugong sagebrush. Usa ka adlaw sa hinapos sa Agosto, samtang nagpatubig ko nakakita ko og dakong unos nga moabut. “Aguy,” naghunahuna ko, “moulan nga yelo [hail]!” Miluhod ko sa pag-ampo diha sa umahan, nasayud nga ang mga tanom madaut. Daling miabut ang unos. Akong nakita nga nagsingabut ang ulan nga yelo sa amihanan ug habagatan nga bahin sa akong umahan. Milakaw ko sa linya sa koral sa may amihanan. Ang ulan nga yelo igo lang gyud nakasulod sa linya sa koral. Nagdali-dali ko nga milakaw paingon sa linya sa koral sa habagatan. Didto ang ulan nga yelo gawas ra gyud sa linya sa koral. Ang mga tanom wala matandog!

Ang among mga silingan nakadayeg kon unsa mi kabulahan, ug akong nahinumduman ang mga pulong ni Malaquias nga ang “ang tanang mga nasud managtawag kaninyo nga bulahan” (Malaquias 3:12). Sa tinuoray kami napanalanginan. Mapasalamaton ko nga samtang gibuhat namo ang among labing maayo sa pagsunod sa mga sugo sa Dios, Siya nagtuman sa Iyang mga saad.