Ang Ginoo Mihatag Kanato og Balaod sa Panglawas

Usa sa dako nga mga panalangin nga atong nadawat sa atong pag-anhi sa yuta mao ang pisikal nga lawas. Ang atong mga lawas balaan ug hilabihan kaimportante nga ang Ginoo mitawag niini nga mga templo sa Dios (tan-awa sa 1 Mga Taga-Corinto 3:16). Nag-ingon sab Siya nga walay temporal sa Iyang mga sugo apan ang tanan sa Iyang “mga sugo mga espirituhanon” (D&P 29:35). Busa ang Iyang mga sugo kabahin sa atong pisikal nga panglawas alang usab sa atong espirituhanong kaayohan (tan-awa sa D&P 89:19–21).

Tungod kay gusto sa atong Langitnong Amahan nga atong atimanon ang atong lawas, mipadayag Siya og mahinungdanong impormasyon kon unsaon kini sa paghimo. Daghan niini nga impormasyon makita sa Doktrina ug mga Pakigsaad 89 ug nailhan nga Pulong sa Kaalam.

Dinhi atong makat-unan ang daghang butang nga angay o dili nato angayang buhaton aron magpadayong himsog ang atong panglawas. Ang diwa niini nga balaod mao ang pagkaon og sustansyadong mga pagkaon ug paghunong sa bisan unsang butang makapagumon o makadaot sa atong panglawas. Ang mga butang nga gisugo sa Ginoo kanato nga dili isulod sa atong lawas mao ang alkohol ug tabako, kini mga drugas (tan-awa sa D&P 89:5–8). Dili gayud kita mogamit og mga drugas gawas kon kinahanglan kini nga itambal. Kadtong migamit sa legal o ilegal nga mga drugas sa dili husto nga paagi nagkinahanglan nga mangayo og tabang aron ang ilang lawas malimpyo pag-usab ug luwas sa pagkaadik. Ang limpyo nga lawas mas daling modawat sa Espiritu Santo.

Ang Ginoo usab nagtambag kanato batok sa paggamit og “mainit nga mga ilimnon” (D&P 89:9). Ang mga propeta mipasabut nga mao kini ang kape ug tsa, kini adunay makadaot nga mga substansya. Kinahanglang likayan nato ang tanang mainom, init man o bugnaw, nga adunay makadaot nga mga substansya.

Kinahanglan usab natong likayan ang bisan unsa nga makadaot sa atong lawas, sama sa nanubra nga kaon o pagdumili og kaon sa makahimsog nga mga pagkaon aron mamintinar ang atong panglawas.

Agig dugang sa mga butang nga dili nato angayang buhaton, ang Pulong sa Kaalam nagsulti kanato og mga butang nga angay natong buhaton. Pipila niining mga butanga gipakita dinhi.

Kadtong kinsa motuman sa balaod sa Ginoo kabahin sa panglawas “makadawat og maayo nga panglawas ug uyok sa ilang mga kabukogan; ug makakita og kaalam ug dako nga mga bahandi sa kahibalo, gani ang mga tinago nga mga bahandi; ug modagan ug dili maluya, og molakaw ug dili makuyapan” (D&P 89:18–20).

Diha sa Pulong sa Kaalam ug sa ubang mga kasulatan, ang Ginoo mipadayag og mga patakaran sa panglawas:

1. Mga prutas, mga utanon, ug makaayong mga hilba ang gamiton “sa panahon niini” ug “uban ang pagmatngon ug pasalamat” (tan-awa sa D&P 89:10–11).

2. Ang karne sa kahayopan ug mananap sa kahanginan “gitugot alang sa paggamit sa tawo uban sa pagpasalamat; bisan pa niana sila gamiton sa pagdaginot” (D&P 89:12).

3. “Ang tanan nga mga lugas maayo alang sa pagkaon sa tawo” (D&P 89:16).

4. Dili gayud kita “magbuhat og labaw ka daghan kay sa [atong] kusog” (D&P 10:4).

5. Kinahanglan nga atong ugmaron ang hustong kinaiya sa pagkatulog aron “[ang atong] mga kalawasan ug [ang atong] mga hunahuna mahimo nga malagsik” (D&P 88:124).