Internasyonal nga Kompetisyon sa Art Nagdapit sa Kabatan-onan sa Pagpakita sa Ilang mga Talento

Sa Doktrina ug mga Pakigsaad 115:4–6, ang Ginoo mitawag sa tanang tawo sa Iyang Simbahan nga molihok, nagdapit kanila nga “tindog ug pakita” aron ang ilang “kahayag mao ang usa ka sukaranan alang sa tanan nga mga nasud.” Miawhag Siya kanila sa paghiusa aron sa pagsuporta sa usag usa ug mahimong “usa ka dangpanan gikan sa unos.”

Sa pagpalanog niini nga tawag, ang Church History Museum nagdapit sa kabatan-onan sa Simbahan nga nag-edad og 13 hangtud 18 sa pag-apil sa pinakaunang Internasyonal nga Kompetisyon sa Art alang sa Kabatan-onan sa museyo. Sulod sa pipila ka tuig ang museyo mipahigayon og internasyonal nga kompetisyon sa art alang sa mga hamtong nga miyembro sa Simbahan, ang susama nga kasinatian anaa na karon sa mga kabatan-onan pinaagi niining bag-o nga kompetisyon.

Ang kabatan-onan gihagit sa paghimo og mga buhat sa art nga nagpahayag unsa ang kahulugan sa hangyo sa Ginoo nga—“tindog ug pakita”—alang kanila. Ang museyo misugod sa pagdawat og mga salmot niadtong Lunes, Enero 2, 2012.

“Bisan unsa ka dili hingpit ang paghunahuna sa atong kabatan-onan sa ilang mga talento sa art, talagsaon gayud nga ang usa ka yanong butang sama sa usa ka drawing, litrato, o eskultura makatandog sa espiritu sa ubang tawo ug mahimong dakong tinubdan sa espirituhanong kalig-on kanila,” miingon si Angela Ames, luyo-luyong curator sa edukasyon sa museyo. “Ug samtang ang kabatan-onan mogamit sa ilang mamugnaong mga talento sa pagbayaw ug pagdasig sa uban sa espirituhanong paagi, sila usab madasig.”

Bisan unsa nga buhat sa art nga gisumiter sa kompetisyon kinahanglan nga gimugna human sa Enero 1, 2009. Ang mga sumasalmot makasumiter sa ilang buhat pinaagi sa internet hangtud sa Biyernes, Hunyo 1, 2012. Ang matag artist mahimong mosumiter og usa ka buhat ngadto sa kompetisyon. Ang impormasyon ug mga sumbanan sa pagsumiter makita diha sa lds.org/youthartcomp.

Tanan nga mga artistic media ug estilo dawaton sa kompetisyon—mga painting, drawing, litrato, eskultura, metalwork, panapton, alahas, pottery, ug uban pa. Sumala sa mga lagda ug kinahanglanon sa kompetisyon, “mga kultural ug matahum nga mga tradisyon sa tibuok kalibutan mapahayag sa artwork. Ang simbolikanhon ug literal nga artistic nga pagpasabut pagadawaton.”

Sa dili madugay ang website sa kompetisyon magmugna og interactive video, ubos sa seksyon sa “Your Creative Process [Ang Inyong Mamugnaong Proseso],” nga mahimong pakisayran sa batan-ong mga artist kon magkinahanglan sila og tabang sa paghunahuna og ideya o sa pagtino unsaon pagpahayag sa ilang ideya.

Pagkahuman sa duha ka hugna nga paghukom sa mga hurado, ang mga mananaog pilion ug hangyuon sa pagpadala sa ilang orihinal nga art ngadto sa museyo. Ang ilang mga salmot ipakita sa usa ka exhibit nga magsugod gikan sa Nobyembre 16, 2012, hangtud Hunyo 17, 2013.

Sa mga buhat sa art nga ipasundayag sa exhibit, mahimo nga 20 ang makadawat og Merit Awards, ihatag aron pag-ila sa talagsaon nga buhat, ug tulo ang makadawat sa Visitors’ Choice Awards, nga ihatag dayon sa dili pa mahuman ang exhibit.