Walay Tubig ang Bunyaganan

Kadto 7:45 sa usa ka ulanon nga kabuntagon sa Agosto dinhi sa Freetown, Sierra Leone, West Africa. Kami (full-time nga mga misyonaryo sa Freetown District) nakaplano og bunyag ug kami determinado sa paghimo niini, moulan man o moinit. Mao kadto nga gitawagan ko ni Brother Allieu, usa ka miyembro sa among branch, apan wala gyud ko kaayo makasabut sa iyang gisulti, kay paspas kaayo siyang nagsulti og Krio, ang lokal nga pinulongan. Giingnan ko siya nga moginhawa og lawum ug mosulti og hinay. Iya kining gibuhat ug miingon, “Elder Naeata, walay tubig sa bunyaganan. Pasayloa ko. Walay tubig.”

Nagpasalamat ko kaniya sa pagtawag ug dayon mipahibalo sa ubang mga elder sa bati nga balita. Diha-diha dayon nagsugod kami sa paghunahuna kon unsaon namo sa pagpahigayon niining sagradong ordinansa. Dayon si Elder Agamah mipahinumdom kanamo sa busay ug lim-aw sa ibabaw sa duol nga bukid nga ginganlan og Mellow. Ang tanang mga elder miuyon nga sulayan namo ug ipahigayon ang bunyag didto, busa nangayo kami og pagtugot sa pagbuhat niini.

Samtang ang tanan nagpundok nianang buntag sa ubos sa bukid, ang grupo klarong nakaamgo sa lisud kaayong buluhaton nga nagpaabut. Apan, ang determinadong grupo walay timaan sa pagduha-duha nga mopadayon. Ang mga lalaki ug babaye ug gani ang mga bata malipayong naglakaw ug nag-istoryahanay sa basa ug dangog nga agianan. Hinay-hinay nga nagsaka, kami miagi og short-cut sa pagtabok sa suba.

Samtang kami naglakaw, ang kadasig sa pipila ka mga kauban misugod sa pagkawala sa dihang mikusog ang ulan, apan kami nagpadayon nga may paglaum. Sa gihapon, ang lisud nga agianan mora og walay katapusan. Sa katapusan nakaabut kami sa among destinasyon. Ang among kasingkasing nagmaya, apan ang uwan nagpadayon sa pagbunok. Samtang nag-andam kami alang sa bunyag, kami mipasilong sa dakong kahoy sa mangga.

Among gibuksan pinaagi sa pagkanta sa himno “Ang Espiritu sa Dios” (Mga Himno ug mga Awit sa mga Bata, nu. 28). Human sa pangbukas nga debosyonal kami miadto sa dapit sa bunyaganan. Ang tubig nag-agas sa tubod ug ngadto sa lim-aw diin among ipahigayon ang sagradong ordinansa.

Ang amahan mitamak sa lim-aw ug mitabang sa iyang anak nga lalaki ngadto sa tubig dihang, sa kalit lang, mihunong ang ulan. Ang mga sidlak sa adlaw milusot sa mga panganod ug misanag sa lim-aw. Among mabati ang presensya sa Espiritu. Human ang amahan mibunyag sa iyang anak nga lalaki, ang bana mibunyag sa iyang asawa, ug dayon ang mga elder mibunyag sa ilang mga investigator. Ang adlaw nagpadayon sa pagsanag, ingon man ang mga pahiyum sa among mga panagway.

Among gitapos pinaagi sa pagkanta og “Come, Follow Me” (Hymns, nu. 116). Oo sa tinuod, kami misunod Kaniya. Among gisunod ang Manluluwas pataas ug paubos sa bukid, tabok sa lawom, nag-agos nga mga suba, saka sa tungason ug basa nga mga agianan, ug lahus sa ulan. Ug kadtong nabunyagan sa tinuoray misunod sa ehemplo sa Manluluwas sa dihang sila gibunyagan.