Ikaw Welcome sa Akong Balay

Niadtong Nobyembre 1997 gitawag ko sa pagserbisyo sa Chile Concepción Mission ug sa dili madugay makatuman sa akong tinguha sa pagtambong sa templo ug makadawat og dugang kahayag ug kahibalo. Apan nagsugod ko sa pagduha-duha. Sama nako nga huyang ug dili perpekto, takus ba gyud ko nga mosulod? Ang Ginoo mo-welcome ba gyud nako nga bukas ang mga bukton human nakapasilo ko Kaniya sa makadaghan?

Gipakigbahin nako ang akong mga pagduhaduha sa akong presidente sa stake, ug siya mitabang kanako sa pagsabut nga kon ang akong kinabuhi hapsay ug naningkamot pag-ayo sa pagbuhat sa tanang mga butang nga gitudlo kanako, takus ko nga mosulod sa balay sa Ginoo. Mibati nga mas maayo, miadto ko sa missionary training center sa Santiago, Chile. Mga pipila ka oras sa dili pa mosulod sa templo, ang akong pagduha-duha mibalik.

Talagsaon kaayo ang kanindot ug kalinaw sulod sa templo nga sa nagdugay ko didto, mas nakapangutana ko kon angayan ba ko didto. Pagkataud-taud sa celestial room, ang tanan gawas nako ingon og malipayon ug masanagon. Sa dihang migunit nako sa kuptanan sa pultahan aron mobiya, hinoon, aduna akoy pagbati nga dili masabut, ug mibati ko nga kinahanglan dili ko mobiya. Mibati usab ko nga ingon og adunay usa ka tawo anaa sa akong luyo, nga mihikap sa akong wala nga abaga aron mobalik ko. Hinay-hinay kong mibalik.

Sa bong-bong nakakita ko og dakong painting ni Jesukristo sa Iyang Ikaduha nga Pag-anhi nga bukas ang Iyang bukton. Dili ko makalihok. Dayon klaro kini nakong nadungog sa akong hunahuna: “Ikaw welcome sa akong balay.”

Usa ka mainit nga pagbati ang misanap sa akong tibuok lawas, ug nakahilak ko. Ang akong nahunahunaan mao ra gyud ang “Salamat.”

Sulod sa pipila ka minuto walay hunong ang akong paghilak. Ang akong kasingkasing napuno sa pasalamat ngadto sa akong Manluluwas. Mibati gihapon ko nga huyang ug dili perpekto, apan nasayud ko nga Siya naghiguma ug naglig-on kanako.

Daghan nang mga tuig ang milabay sukad niana nga kasinatian, apan sa matag adto nako sa templo, ang hingpit nga kalipay niadtong adlawa mobalik, ingon man kadtong makapahupay nga mga pulong: “Ikaw welcome sa akong balay.”