Mga Istorya sa Basahon ni Mormon Gihatagan og Kinabuhi sa Gi-update nga mga Video

Mga istorya sa Basahon ni Mormon gihatagan og kinabuhi sa gi-update nga mga video sa Istorya sa Basahon ni Mormon, anaa na karon sa Cantonese, English, French, German, Italian, Japanese, Korean, Mandarin, Portuguese, Russian, ug Spanish diha sa seksyon sa mga istorya sa kasulatan sa LDS.org.

Sa sinugdanan anaa sa internet isip mga slide show, ang mga imahe daw nahatagan og kinabuhi gamit ang usa ka binatid nga paagi nga gitawag og parallax animation. Ang mga larawan gigunting ug gipalihok-lihok sa canvas, ug ang pag-pan, pag-blur, ug pag-zoom naghatag og dugang biswal nga kanindot.

Ang mga video usab adunay mga sound effect ug orihinal nga soundtrack.

“Kini nga mga istorya sa kasulatan makatabang sa pagtanom sa liso sa pagpamatuod diha sa mga kasingkasing sa mga bata ug sa uban nga motan-aw niini nga mga video pinaagi sa pagtudlo sa mga kamatuoran sa ebanghelyo,” miingon si Brent Meisinger, tigdumala sa proyekto sa Scriptures Coordination Division sa Church Curriculum Department. “Ang mga video makahatag og makahuluganong kasinatian nga moawhag og regular nga inter-aksyon sa mga kasulatan ug motudlo og mga kahanas nga moandam sa mga mananan-aw alang sa dugan nga pagtuon sa kasulatan.”

Ang dako nga kausaban sa video naglakip og sobra sa tulo ka oras nga sulod nga gibahin sa 54 ka managlahi nga yugto, nga gihan-ay gikan sa “Giunsa Nato Pagkaangkon sa Basahon ni Mormon” (Kapitulo 1) ngadto sa “Ang Saad sa Basahon ni Mormon” (Kapitulo 54).

Ang mga imahe sa video mga paghulagway nga gihimo nila ni Jerry Thompson ug Robert T. Barrett. Ang ilang kinamot nga artwork sunod-sunod nga gimantala sa Friend ug sa Liahona halos sa usa ka dekada, sugod niadtong 1989, ug dayon gihiusa pag-imprinta niadtong 1997 isip Mga Istorya sa Basahon ni Mormon.

Ang mga mananan-aw makakita usab sa mga video isip podcast sa iTunes ug isip mga video clip sa YouTube ug sa Roku. Ang mga pamilya mahimo usab nga malingaw sa programa sa Mormon Channel nga “Scripture Stories [Mga Istorya sa Kasulatan],” diin ang mga bata ug usa ka moderator mobasa gikan sa mga istorya, mohisgut niini, mokanta, ug mopakig-ambit og mga pagpamatuod kabahin sa mga leksyon sa mga kasulatan.

Ang Mga Istorya sa Bag-ong Tugon nga mga video bag-ohay lang sad nga daw gihatagan og kinabuhi diha sa 11 ka mga pinulongan. Kini usab anaa na sa LDS scriptures page, iTunes, ug sa Mormon Channel sa YouTube.