Awhaga Sila sa Pag-ampo

Sa gamay pa ko nga bata, gitudloan ko sa akong mga ginikanan pinaagi sa ehemplo sa pag-ampo. Akong gisugdan pinaagi sa paghulagway sulod sa akong hunahuna nga ang Langitnong Amahan atua sa layo. Sa nagkahingkod na ko, ang akong kasinatian sa pag-ampo nausab. Ang hulagway nga naa sa akong hunahuna mao ang Langitnong Amahan nga anaa sa duol, kinsa gilibutan sa sanag nga kahayag, ug kinsa hingpit nga nakaila kanako.

Kana nga kausaban miabut dihang nakaangkon ako og sigurado nga pagpamatuod nga ang gisulti ni Joseph Smith kabahin sa iyang kasinatian niadtong 1820 sa Manchester, New York, tinuod:

“Ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.

“Diha-diha nga kini mipakita ako nakakaplag sa akong kaugalingon nga giluwas gikan sa kaaway nga migapos kanako. Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).

Ang Langitnong Amahan didto sa kakahoyan nianang matahum nga adlaw sa tingpamulak. Iyang gitawag si Joseph sa pangalan. Ug iyang gipaila ang nabanhaw nga Manluluwas sa kalibutan isip Iyang “Hinigugma nga Anak.” Bisan kanus-a ug bisan asa kamo mag-ampo, ang inyong pagpamatuod sa katinuod nianang mahimayaon nga kasinatian makapanalangin kaninyo.

Ang Amahan kang kinsa kita nag-ampo mao ang mahimayaon nga Dios kinsa milalang og mga kalibutan pinaagi sa Iyang Hinigugma nga Anak. Makadungog siya sa atong mga pag-ampo sama sa Iyang pagkadungog sa pag-ampo ni Joseph—ingon ka tin-aw sama nga kini gihalad diha sa Iyang presensya. Igo gayud ang Iyang paghigugma kanato nga Iyang gihatag ang Iyang Anak isip atong Manluluwas. Pinaagi niana nga gasa Siya mihimong posible nga kita makaangkon og pagka-imortal ug kinabuhing dayon. Ug Siya mihalad ngari kanato, pinaagi sa pag-ampo sa ngalan sa Iyang Anak, sa oportunidad nga kanunay nga pagpakigsulti Kaniya niini nga kinabuhi sumala sa atong pagpili.

Ang mga naghupot sa Priesthood sa Ang Simbahan ni Jesukristo sa mga Santos sa Ulahing mga Adlaw adunay sagradong buluhaton sa “pagduaw sa balay sa matag sakop, ug pag-awhag kanila sa pag-ampo sa dayag ug sa tago” (D&P 20:47; empasis gidugang).

Adunay daghang paagi sa pag-awhag sa usa ka tawo sa pag-ampo. Sama pananglit, mahimo kitang mopamatuod nga ang Dios nagsugo kanato sa pag-ampo kanunay, o mahimo natong ihulagway ang mga ehemplo gikan sa kasulatan ug gikan sa kaugalingon natong kasinatian sa mga panalangin nga miabut gumikan sa mga pasalamat, pangamuyo, ug pakisayud nga mga pag-ampo. Pananglitan, makapamatuod ako nga ako nasayud nga ang Langitnong Amahan motubag sa mga pag-ampo. Nakadawat ako og direksyon ug kahupayan gikan sa mga pulong nga misulod sa akong hunahuna, ug nasayud ako pinaagi sa Espiritu nga ang mga pulong naggikan sa Dios.

Si Propeta Joseph Smith adunay ingon niana nga kasinatan, ug mao usab kamo. Iyang nadawat kini nga tubag sa kinasingkasing nga pag-ampo:

“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;

“Ug unya, kon ikaw molahutay pag-ayo, ang Dios mobayaw kanimo sa kahitas-an” (D&P 121:7–8).

Kana mao ang pagpadayag gikan sa usa ka mahigugmaong Amahan ngadto sa matinud-anon nga anak nga anaa sa grabing kalisdanan. Ang matag anak sa Dios mahimong makigsulti pinaagi sa pag-ampo Kaniya. Walay pag-awhag alang sa pag-ampo ang may dakong epekto ngari kanako kay sa mga pagbati sa gugma ug kahayag nga moabut uban sa tubag sa mapaubsanong mga pag-ampo.

Makaangkon kita og pagpamatuod sa bisan unsa nga sugo sa Dios pinaagi sa pagtuman niana nga sugo (tan-awa sa Juan 7:17). Tinuod kini kabahin sa sugo nga mag-ampo kita kanunay sa dayag ug sa tago. Isip inyong magtutudlo ug inyong higala, akong isaad nga ang Dios motubag sa inyong mga pag-ampo ug nga pinaagi sa gahum sa Espiritu Santo, mahibalo kamo sa inyong kaugalingon nga ang mga tubag naggikan Kaniya.