Ang Akong Hagit sa Family History

Si Bishop Page, ang bishop sa among young adult ward, misugod pinaagi sa pagpasabut nga ang family history ug ang buhat sa templo dili lang para sa mga ginikanan o mga apohan—kini responsibilidad sa among henerasyon ug kabahin nganong kami gipadala dinhi sa yuta niining panahona. Dayon miabut ang hagit: ang FamilySearch indexing. Sa pagkatinuod, siya misugyot nga ang among ward mo-index og 100,000 ka mga ngalan.

Kini dako kaayo nga buluhaton. Ang kada tawo mo-index og 1,000 ka mga ngalan. Apan sa dihang si Bishop Page nangutana kon si kinsa ang mopasalig sa maong tumong, kaming tanan miisa sa among kamot.

Ang hagit nahimong importante diha-diha dayon sa akong kinabuhi. Gi-download nako ang software para sa FamilySearch indexing, gibasa ang tutorial, ug gisugdan.

Sa sinugdanan, ingon og lisud. Ang sinulat sa kamot dili kanunay sayon ihubad. Apan sa matag higayon nga ako makakompleto og grupo sa mga ngalan, mibati ko nga mas masaligon.

Tungod kay ang akong pamilya taga-Chile, mipili ko sa pag-index sa mga ngalan sa Spanish. Tingali tungod ana nga rason, ang kasinatian personal kaayo. Wala ko mobati nga yanong nag-type lang sa mga ngalan kay nakaamgo ko nga ang matag ngalan usa ka tawo nga mahimong modawat sa mga panalangin sa templo.

Dali kong nakadiskobre nga ang indexing usa ka nindot nga kalihokan ma-Dominggo. Tungod nagpuyo ko layo sa akong pamilya, usahay mobati ko nga wala kaayoy buhaton human og simba. Ang indexing nakatabang nako sa paggamit sa akong panahon sa mas mabungahong paagi, ug makapaminaw ko og musika o mga pakigpulong samtang nagbuhat niini.

Nalig-on ko sa dihang among president sa stake mikutlo ni Presidente Boyd K. Packer, Presidente sa Korum sa Napulog Duha ka mga Apostoles: “Walay buhat nga mas labaw pa nga panalipod ngadto niini nga Simbahan kay sa buhat sa templo ug sa pagsiksik sa family history nga nagsuporta niini. Walay buhat nga mas labaw pa ka makalimpyo sa espirituhanong paagi. Walay buhat nga atong gihimo nga mas naghatag kanato og dugang gahum. … Ang atong mga gipangtrabaho diha sa templo motabon kanato og usa ka taming ug usa ka panalipod, sa indibidwal nga paagi ug isip usa ka katawhan.”¹

Mora og ang mga young adult giatake pag-ayo sa “nagdilaab nga mga pana sa kaaway” (1 Nephi 15:24), ug dinhi gisaaran ko og protekyon. Mibati ko og dakong tinguha sa pagtabang sa mga miyembro sa akong ward nga masinati ang sama nga panalangin, busa ako ug usa ka higala miorganisar og indexing party. Daghang mga tawo ang nagdala og mga laptop. Ang mga tawo nga pamilyar na sa indexing mipakigbahin sa ilang mga computer ug mitubag sa mga pangutana sa kadtong bag-o lang nagsugod.

Sa misunod nga mga bulan, ang mga lider sa ward mihimo usab og mga kalihokan nga nagpahinungod sa among tumong. Kon adunay mawad-an og kadasig, kami mag-awhagay sa usag usa. Natingala ko sa diwa sa panaghiusa nga dungan namong napalambo sa pagserbisyo sa Ginoo ug sa usag-usag.

Sa katapusan, ang among ward wala makaabut sa 100,000 nga mga ngalan, bisan daghang indibidwal ang nakakompleto sa 1,000 ka mga ngalan. Ang hagit sa among bishop, hinoon, dili kabahin sa mga numero; kini kabahin sa pagtabang kanamo sa pag-angkon og pagpamatuod sa family history. Ug tungod kay naglakip kini og serbisyo, sakripisyo, ug pagluwas sa uban, among nabati ang makapalimpyo nga epekto niini.

Mapasalamaton ko sa oportunidad sa pag-apil sa buhat sa Ginoo. Sa pagbuhat sa Iyang trabaho, mas nakaila ko Kaniya.