Kini Ang Inyong Buhat

Si propeta Abraham nakasinati sa kausaban sa mga panahon sa kinabuhi, susama sa giatubang sa atong mga young adult karon. Kita makabasa kabahin kaniya sa Perlas nga Labing Bililhon: “Sa yuta sa mga taga-Caldea, sa pinuy-anan sa akong mga amahan, ako, si Abraham, nakakita nga kini gikinahanglan alang kanako sa pagkuha og lain nga dapit nga kapuy-an” (Abraham 1:1). Miabut ang panahon alang kang Abraham nga magkainaugalingon ug magsugod sa iyang kinabuhi isip usa ka adult. Siya nasayud nga “adunay labaw nga kalipay ug kalinaw ug kapahulayan” (bersikulo 2) alang kaniya.

Si Abraham nagtinguha ug nakadawat niadtong mga panalangin sa labaw nga kalipay, kalinaw ug kapahulayan, ug kini maanaa sa tanang mga miyembro sa Simbahan, lakip sa mga young adult. Unsaon ninyo sa pagdawat niini? Mo-focus kita sa usa sa daghang mga kalihokan nga inyong mahimo karon dayon: pag-apil sa buhat sa templo ug sa family history.

Isip mga Santos sa Ulahing mga Adlaw, inyong nakat-unan ang kaimportante sa templo ug sa mga ordinansa sa templo. Sa milabay nga mga siglo, daghang mga tawo ang namatay nga walay kahibalo sa ebanghelyo. Kining mga tawhana mao ang inyong suod ug layo nga mga paryente. Sila nagpaabut kaninyo sa pagbuhat sa gikinahanglang pagsiksik aron sa pagsumpay kauban ang inyong mga pamilya ug sa paghimo sa makaluwas nga mga ordinansa alang kanila.

Ang pagbaton og kahibalo sa teknolohiya nakatabang sa buhat sa templo ug sa family history. Kamo ang henerasyon nga giandam gayud nga adunay talento sa teknolohiya sa paghimo niini. Ang akong lola nga si Bangerter dunay dakong pagpamatuod ug pagbati sa kadinalian alang sa buhat sa family history. Daghang tuig na ang milabay, dihang gihugpong niya ang 25,000 ka mga ngalan sa iyang pamilya, gikinamot niya sa pagsulat ang matag ngalan ngadto sa mga porma. Mapasalamaton gayud unta siya kaayo sa computer program nga makatabang kaniya nga mas sigurado ug han-ay. Karon duna na siyay gatusan ka may talento nga kabatan-onan tali sa iyang mga kaliwat kinsa makahimo sa pagtabang kaniya gikan niini nga habig sa tabil.

Ang Ginoo misaad nga motanom diha sa inyong mga kasingkasing sa mga saad nga gihatag ngadto sa mga amahan ug nga ang inyong mga kasingkasing mobati ngadto sa mga amahan aron ang yuta dili hingpit nga malaglag sa Iyang pag-anhi (tan-awa sa D&P 2:2–3). Ang inyong teknikal nga mga kahanas mao ang tipik nga katumanan niini nga panagna, ug manghinaut ako nga mobati kamo og kadinalian mahitungod niini nga buhat. Gipakatawo kamo niini nga panahon sa paghimo sa buhat sa templo ug sa family history. Ang inyong pamilya nagkinahanglan sa inyong tabang. Ang inyong ward o branch nagkinahanglan sa inyong tabang niining importante nga responsibilidad.

Makadawat kamo og personal nga mga panalangin isip resulta sa pag-apil sa buhat sa templo ug sa family history. Usa niini mao ang oportunidad nga mo-qualify alang sa rekomend sa templo, nga nagpasabut sa inyong katakus atubangan sa Ginoo. Ang rekomend sa templo usa ka simbolo sa kamasulundon.

Ang bag-ong mga instruksyon gikan sa Unang Kapangulohan nagpatin-aw sa polisiya alang sa pag-angkon og rekomend sa templo ug pagdawat sa mga endowment. Gipasabut kini og balik nga ang pagkadawat og endowment sa templo usa ka seryuso nga butang nga ihatag lamang ngadto sa nakapangandam gayud ug hingkod na sa pagtuman sa mga pakigsaad nga ilang gisudlan. Ang Unang Kapangulohan mipahayag usab nga ang dili minyo nga mga miyembro nga mag-20 ang edad o kapin kinsa wala makadawat sa tawag alang sa pagmisyon o kinsa dili minyoonon sa templo dili gayud irekomendar sa pagsulod sa templo alang sa kaugalingon nilang endowment.¹ Ang matag takus nga miyembro nga nag-edad og 12 o labaw pa mahimo, hinoon, nga makadawat og limited-use recommend sa pagpahigayon og mga bunyag alang sa patay.

Kamo nga mga dili takus sa pribilehiyo sa paghupot og rekomend sa pagkakaron pakigtambayayong sa inyong bishop o presidente sa branch aron sa pagkahimong takus sa inyong mga kaugalingon alang sa rekomend sa pinakadali nga panahon. Palihug ayaw pagpakawala niining importante nga dokumento.

Mopamatuod ako nga ang Pag-ula tinuod ug ang mga sala mapasaylo sigon sa tukma nga paghinulsol.

Makatabang kamo sa templo nga mahimong busy. Ang buhat sa templo ug sa family history inyo nga buhat. Daghan ang nagaagad kaninyo! Daghan kaayo kamo og mahimo uban sa inyong enerhiya ug mga kahanas.

Samtang moapil kamo sa buhat sa templo ug sa family history, sigurado kamo nga maanaa kaninyo ang Espiritu aron sa paghupay kaninyo sa inyong mga hagit ug mogiya kaninyo sa importanting mga desisyon nga inyong himoon. Samtang kamo tagsa tagsa nga moapil niini nga buhat, sa inyong ward ug sa mga grupo sa institute, ug sa inyong mga Relief Society ug sa mga korum sa priesthood, makahulma kamo og maayong paghigalaay ug makaangkon kamo og makahuluganong sosyal nga mga kasinatian. Ug tungod kay milambo ang inyong pagpakig-uban ug panaghigalaay ug mabati ninyo ang Espiritu, adunay dakong oportunidad alang kaninyo nga makakaplag og paris ug makatukod og mahangturong pamilya.

Samtang kamo moapil isip mga indibidwal, uban sa inyong mga higala, ug mga grupo sa inyong korum, Relief Society, ug institute, kini nga mga kalihokan magdugang sa inyong hugot nga pagtuo ug kalipay sa tibuok ninyong kinabuhi. Mga timailhan kini sa pagkadisipulo nga molig-on sa inyong umaabut nga kaminyoon ug mga pamilya ug modapit sa Espiritu nga magauban kaninyo.

Ang gipahiuli nga ebanghelyo ni Jesukristo tinuod. Tungod kay tinuod man kini, daghan ang nag-agad kaninyo, ang nagtubo nga henerasyon. Manghinaut ako nga kamo—sama kang Abraham—mahimong sumusunod sa pagkamatarung, nga kamo magtinguha sa mga panalangin sa mga amahan pinaagi sa pag-apil niini nga buhat, ug nga kamo makakaplag og mas dakong kahibalo, kalipay, kalinaw ug kapahulayan.