“Ang akong mga ginikanan nagdiborsyo. Usahay makakuha ko og tambag gikan sa usa nila nga sukwahi sa tambag sa usa. Unsa man ang akong buhaton?”

Makapangayo ka sa imong bishop o presidente sa branch og tambag. Dako siya og ikatabang kanimo, tungod kay siya gitugutan sa atong Langitnong Amahan og gahum aron sa pagtabang kanato. Nahibalo ko nga lisud kaayo ang pagpili niini nga mga desisyon, apan gikinahanglan nga imong timbang-timbangon ang matag tipik sa tambag gikan sa imong mga ginikanan ug mopili sa unsay pinakamaayo aron makapadayon ka ug molambo.

Ingon og malisud kini, apan posible ang pagsugakod sa diborsyo—ug makaangkon og maayong kinabuhing pamilya. Ang makausab sa kinabuhi nga hitabo sama sa diborsyo magbutang sa mga tawo sa pipila ka lisud nga mga panahon, apan makatabang usab kini kanila nga makakat-on mahitungod sa ilang mga kalig-on ug magpahimutang og pipila ka bag-ong mga pangsugakod nga mga kahanas. Kon ikaw nagkinahanglan og tabang sa paghulagway unsaon sa pagsugakod, paghangyo og usa ka paborito nga ig-agaw o magtatambag sa eskwelahan o imong bishop. Ug kon maglisud ka man sa pagpakig-istorya sa imong mga ginikanan, sulayi ang pagsulat kanila.

Nakasinati ako og sama nga problema. Sa matag higayon nga makadawat ko og managlahi nga tambag, miluhod ako ug nag-ampo sa akong Langitnong Amahan aron masayud kon asa nga mga dapit sa tambag ang akong dawaton, sama sa gibuhat ni Propeta Joseph Smith aron masayud kon asa sa tanan nga mga sekta ang tinuod. Sa matag higayon moabut ang tubag nga kusog og klaro, ug mahibalo ako sa hingpit sa hustong tambag nga angay sundon.

Isip usa ka misyonaryo nakasugat ako og susama nga sitwasyon, ug kanunay nakong gamiton ang ehemplo ni Nephi sa pagka-masulundon. Matag higayon nga makadawat siya og tambag gikan sa iyang mga ginikanan, iya kining gamiton tungod kay kini maayo ug naggikan sa Dios. Apan sa dihang iyang nabali ang iyang pana, ang iyang amahan ug ang uban nagbagulbol. Si Nephi, pinaagi sa iyang ehemplo, migiya sa iyang amahan ngadto sa pag-ampo alang sa giya. (Tan-awa sa 1 Nephi 16:18–25.) Mao kini ang atong ehemplo. Dawata ang tambag sa imong mga ginikanan, apan kon ang usa motambag nga lahi sa unsay gusto sa Ginoo nga imong buhaton, pagmaisugon sa pagsulti kaniya sa matinahurong paagi sa rason nganong dili nimo sundon kana nga tambag. Ug ang pinakamaayong rason mao nga gusto kitang mopili sa husto.

Malisud kon ang duha ka tawo nga mas gipili nimong adtoan alang sa tambag magkasukwahi sa usag usa. Ang mga tawo mahimong magkalahi og mga opinyon. Apan sa mga sitwasyon nga sama niini, gikinahanglan lamang nimo ang pagpaminaw sa duha, ablihan ang hunahuna, ug sa katapusan modesisyon sa imong kaugalingon kon unsa ang pinakamaayong paagi ug unsang paagi ang uyunan sa Ginoo. Lisud nga imong isalikway ang tambag sa usa sa imong ginikanan, apan kinahanglan nimong hinumduman nga dili kana usa ka kompetisyon. Sila imo gihapong higugmaon, ug siguro malipay sila nga mihimo ka og husto nga desisyon, bisan og ang desisyon dili gayud mao ang ilang gisugyot.

Pag-ampo aron ikaw mahibalo sa tanang butang kabahin sa gipangayo nimo nga tambag sa imong mga ginikanan. Ang mga ginikanan usahay adunay managlahing hunahuna mahitungod sa mga sitwasyon. Ang Langitnong Amahan makatabang kanimo sa paghimo sa husto nga desisyon. Ang tambag sa mga ginikanan bililhon, apan kon magkasukwahi ang imong mga ginikanan, adtoa ang Langitnong Amahan alang sa giya ug tambag. Ang pag-ampo kanunay nga makatabang sa imong pagdumala niini nga mga sitwasyon.

Ang akong mga ginikanan sagad nga mohatag kanako og managlahing tambag, apan sa kanunay nahibalo ko unsa ang husto. Natawo ako sa ebanghelyo. Nahibalo ko sa kamatuoran, ug naghimo kini kanakong makaila kon asa nga tambag ang akong sundon. Sa pipila ka sitwasyon, atong gikinahanglan ang pag-ampo ngadto sa Langitnong Amahan ug maminaw lamang sa hinay hinagawhaw nga tingog sa Espiritu Santo o moadto sa bishop ug maminaw kon unsay iyang isulti.

Mahimo kang moadto kanunay sa imong mga lider. Pinaagi sa mga organisasyon sa Young Women ug sa Young Men, ang Ginoo mipadala og talagsaong mga lider aron modasig sa mga kabatan-onan. Gitawag sila aron sa pagtabang kanimo ug pagtudlo kanimo, busa sila mga talagsaong kapanguhaan sa inspirasyon og mga tubag. Makaadto ka usab sa imong bishop sa mao gihapon nga rason. Kini nga mga lider gi-set apart sa pagtabang ilabi na sa mga kabatan-onan.