Семинарын адислалууд

Яагаад семинар та нарт маш чухал вэ? Нэг шалтгаан нь гэвэл хожмын үеийн бошиглогчид, төлөөлөгчдийн дараах амлалтууд юм:

• Семинар нь дэлхийн түүхэн дэх хамгийн хүнд хэцүү үед орчин үеийн Израилыг аврахын төлөө Бурханаас илгээсэн адислал мөн.”¹

• Сэргээгдсэн сайн мэдээний захиасыг таньдаг хүмүүстээ танилцуулахад семинар та нарыг бэлтгэх болно.²

• Семинар “үнэний тухай нэн чухал ойлголттой” болоход тань тусална.³

• Та нарыг аз жаргалтай болгох сургаалуудыг ойлгож мэдэх гайхамшигтай боломжийг семинар олгоно. Семинар өөртэй чинь адил итгэл бишрэлтэй хүмүүстэй танилцах сайхан боломжийг олгоно.”⁴

• “Сайн мэдээний мэдлэг тань өсөн нэмэгдэнэ. Итгэл чинь улам бат бөх болно. Гайхамшигтай сайхан найз нөхөд, танилуудтай болно.”⁵

• “Семинар … бид бүгдэд тохиолддог нүгэл хилэнцийг эсэргүүцэх болон сайн мэдээний мэдлэгээ үлэмж өсгөн нэмэгдүүлэх сүнслэг байдал, ёс суртахууны хүч чадлыг төлөвшүүлдэг.⁶

• Энэ бол “номлолд үйлчлэх хамгийн сайн бэлтгэлийн нэг мөн.”⁷

Та семинарт явах цагтай байхын тулд сонирхдог өөр ямар нэг зүйлээ орхих хэрэгтэй болж мэднэ. Харин ийм золиослол хийхэд алдах юм байхгүй. Филиппиний Элайжа Бугаёнг ахлах сургууль төгсөх жилээ ийм шийдвэр гаргахаар сонгосон ажээ. Тэр ахлах сургуульд сурсан бүх үеийнхээ турш сурлагаараа сургуулийнхаа хоёр дахь сурагч байсан гэнэ. Тэр сүүлчийн жилдээ сурлагаараа тэргүүн сурагч болох зорилго тавьж, үүндээ хүрэхийн тулд гурван жил явсан семинартаа явахгүй байхаар шийдээд байтал

нэг өдөр бодол нь өөрчлөгдсөн ажээ. “Хичээл хийдэг ширээ уруугаа хартал судрууд, семинарын тэмдэглэл, гарын авлага гээд бөөн ном ширээний ойролцоо хөглөрч байлаа. ‘Аль нь хамгийн чухал бол?’ хэмээн сэтгэл санааныхаа гүнд өөрөөсөө асуув.

Элайжа хариугаа Матай 3:33-аас олжээ: “Харин эхлээд Түүний хаанчлал болон Түүний зөвт байдлыг хайгтун. Тэгвэл энэ бүхнийг та нарт нэмж өгөх болно.” Тэрээр семинарт дуулгавартай явахаар шийдэж, хичээл сурлагандаа зориулах цагаа зохицуулах арга замыг олсон ажээ. Элайжа жилийн эцэс гэхэд сургуулийнхаа шилдэг сурагчаар шалгарч, их сургуулийн тэтгэлэг хүлээн авчээ.

АНУ-ын Алабамын Спенсер Доуглас семинарт суралцахын тулд олон нийтийн зарим үйл ажиллагаанд оролцохоо больсон гэнэ. Тэр семинарт явахын тулд эхний хоёр жил өглөөний 4:00-д, сүүлийн хоёр жил 5:00-д босдог байсан гэнэ. “Би орой эрт унтах хэрэгтэй учраас үдшийн цагаар болдог олон үйл ажиллагаанд найз нартайгаа оролцож чадахаа больсон. Хэрэв тэгэхгүй бол, маргааш өглөө нь семинарт явж, хичээлдээ идэвхтэй оролцож чадахгүй шүү дээ” гэж тэр ярилаа. Спенсер зөвхөн семинарт явдаг төдийгүй, цагтаа сэрж, хичээлдээ бэлтгэдэг байжээ.

Арванхоёр Төлөөлөгчийн Чуулгын Ахлагч Даллин Х.Өүкс сургасан нь: “Ямар нэгэн зүйл сайн байна гэдэг нь үүнийг хийх хангалттай шалтгаан биш. Бидний хийж болох сайн зүйлсийн тоо тэдгээрийг хийх цагийн боломжоос хавьгүй их байдаг. Иймээс бид зарим онцгой сайн зүйлд тэргүүн зэргийн анхаарал тавих шаардлагатай болдог.⁸ Энэ бол семинарыг амьдралдаа эн тэргүүнд тавих шийдвэр гаргахад тань чухал зөвлөгөө юм.

Хэрэв чи ирээдүйд бүрэн цагийн номлогчоор үйлчлэх хүсэлтэй бол, семинар нь өнөөдөр гишүүн номлогч байгаа үедээ номлолын ажилд бэлтгэх маш сайн бэлтгэл болж чадна. Перугийн Франко Хюман Куриникю, семинарт судар судлах нь номлолд бэлтгэхэд тусалдгийг мэддэг ажээ.

Семинарт явахын тулд өглөө 4:00-д босч, үерийн саруудад далбаат завиар явж, дараа нь ангидаа хүрч очихын тулд лаг шавар дундуур туулдаг байсан нь чухамдаа номлолын бэлтгэл байлаа. Би номлолд бэлтгэхийн тулд семинараа төгсөөд институтэд явж, Сүмд өсөх болно” гэж тэр ярив. Судруудын тухай мэдэж, чухал шүлгүүдийг цээжилдэг нь сайн номлогч болоход нь тусалдаг учраас семинар түүнд маш чухал ажээ.

Дэлхий даяарх залуучууд семинарт идэвхтэй явснаар судар судалснаас олдгоос бүр илүү бат бөх итгэлтэй болж байна. Английн Камерон Лисни амьдралынхаа бүх талд адислагдсан гэж үздэг ажээ. “Семинар зөвхөн сүнслэг байдалд төдийгүй бас хичээл сурлагад тусалдаг.

Өглөө эрт боссоноор тэр өдөр тархи сэргэг байдаг. Зарим найз нар маань семинарт явах цаг алга гэдэг. Гэтэл энэ чинь өглөө 6:00-д босч математикийн хичээлээ давтахтай л адил шүү дээ, тийм үү?” хэмээн тэр асуулаа. Шамдан суралцвал, “Их Эзэн шалгалтанд чинь тусална, семинарт явбал Тэр чамд бүр илүү тусална” гэж Камерон хэлэв.

Семинар мэдээж хэрэг, гэрчлэлээ бэхжүүлэхэд нь Камеронд тусалжээ. “Миний гэрчлэл семинарын хөтөлбөрөөс эхлэлтэй. Би 14-тэйдөө сайн мэдээний мэдлэгтэй болох гэж зовж байлаа. Би Сүмд явах дургүй бүр хийх ёсгүй зүйлсийг хийдэг байсан гээд бод л доо. Ганц хоёрхон сарын дотор л би бүхнийг хаясан.” Гэвч нэг найз нь Камероныг семинарт яваач гэж урихад нь түүнтэй хамт явахаар шийдсэн гэнэ. Тэгэхэд нь түүнд адислал үнэхээр иржээ.

“Би Сүнсийг дахин мэдэрч эхэлсэн. Сүмд илүү их анхаарал тавьж, ням гарагийн болон санваартны хичээлүүдэд суудаг болов. Сэтгэл санаа хөнгөрч, аз жаргалтай байгаагаа мэдэрдэг болов. Би эцэстээ сайн мэдээний гэрчлэлтэй болсон” гэж Камерон ярилаа. Камерон семинарт яваад хоёр сар болсны дараа бишоптойгоо уулзаж, Аароны санваартан, багшаар томилогджээ.

Семинар дэлхийн уруу таталтуудыг эсэргүүцэхэд өөрт нь тусалдгийг Камерон мэднэ. “Семинарт явж байсан цагт, дэлхийгээс ирдэг сорилтуудыг шийдвэрлэхэд надад амар байдаг. Бидний амьдарч байгаа дэлхийд нүгэл хилэнц биднийг бүх талаас хүрээлэн бүсэлсэн учраас залуу хүнд тун амаргүй байдаг. Хэрэв та нар семинарт явбал уруу таталтаас өөрийгөө хамгаалах хүч чадлыг олох болно гэдгийг би гэрчилж байна. Семинар та нарын сүнслэг байдлыг хамгаалах бамбай болно. Олон хүнд сорилт, уруу таталт миний амьдралд тохиолдсон үед нарийн бөгөөд давчуу зам дээр үлдэхэд семинар чухам тийм бамбай болж тусалсан билээ.”

Семинар нь бас итгэл нэгтэй өсвөр үеийнхэнтэй уулзаж, танилцах боломжийг өөрт чинь олгоно. “Ёс суртахууны адил жишгүүд, адил санаа бодолтой бөгөөд Бурханд итгэдэг над шиг хүмүүсээс би сүнслэг нөлөө авдаг.” Хэрэв асуудал гарвал би семинарын багштайгаа эсвэл бусад суралцагчидтай зөвлөж болно. Би өөрийнхөө болон өрөөл бусдын гэрчлэлийг бэхжүүлэхийн тулд бодол санаа, гэрчлэлээ бусадтай хуваалцаж болно. Бид судруудыг хамт уншиж, сүнслэг агуулгыг нь тунгаан бодсоноор Бурханд болон бие биедээ улам ойртдог” хэмээн Оросын Вика Челишкова ярьж байна.

Украйны Ксения Гончарова мөн ийм бодолтой ажээ. “Бид туршлагаа бие биетэйгээ хуваалцсанаар илүү бат бөх итгэлтэй болж, судруудыг илүү сайн ойлгоно. Хичээлийн үеэр амьдралынхаа тухай ярилцах үед миний болон бусад хүмүүсийн амьдралд сайн мэдээ хэрхэн нөлөөлдөг арга замыг мэдэж авдаг” хэмээн тэр ярьж байна.

Семинар тэднийг хэрхэн адисалсан тухай хэсэг залуусаас саяхан асуусан юм. Семинар тэднийг Тэнгэрлэг Эцэг, Аврагч хоёрт илүү ойр дотно болоход нь тусалсныг тэдний хариулт харуулж байна. Арванхоёр Төлөөлөгчийн Чуулгын Ахлагч Давид А.Беднар сургасан нь: “Семинарт та нарын судалдаг бүх сэдэв чухал юм. Жил бүр судраас судлахад гол сэдэв нь Их Эзэн Есүс Христ байдаг.⁹

Семинар тэднийг Есүс Христэд хэрхэн ойртуулсан тухай өсвөр насны зарим суралцагчид юу гэж хэлснийг сонирхъё.

• “Олон бошиглогчийн бичсэн шастируудыг уншиж, би Түүнд хэчнээн чухал болохыг ойлгосноор Аврагч миний төлөө юу хийснийг мэдсэн юм. Тэрбээр надад хайртай учраас миний нүгэл хилэнцийн төлөө зовон шаналж, нас барсныг би ойлгосон.

• “Семинар бол миний өдрийн баясгалант эхлэл мөн. Би хэчнээн ядарсан ч, хүнд сорилтууд амьдралд минь тохиолдсон үед Аврагч минь надад хайртай учраас би зөв зүйлийн төлөө улам итгэлтэй зогсох болно гэдгээ өчүүхэн ч эргэлзээгүйгээр мэддэг билээ.”

• “Би Бол Сүмийн хөрвөгч. Бүр баптисм хүртэхээсээ өмнө семинарт явж эхэлсэн. Семинарт яваагүй бол би ер нь баптисм хүртэх байсан болов уу гэдгээ ч мэдэхгүй байна. Семинарт яваагүй бол эдүгээ миний амьдралд Аврагч байхгүй байсан болов уу. Эсвээс би нүглээсээ уучлагдаж болно гэдгийг мэдэхгүй байх биз ээ. Миний амьдралд Тэнгэрлэг Эцэг, Есүс Христ хоёр ерөөсөө байхгүй байж ч болох байсан. Семинар Бурхан Эцэг, Есүс Христ хоёрыг олж Тэднийг өөрийнхөө болон ирээдүйн үр удмынхаа үүрдийн амьдралын хэсэг болгоход надад тусалсан юм.

• “Семинарт өдөр бүр явах нь Түүний сургаалуудыг болон намайг хайрладаг Түүний агуу хайрыг мөн Түүнтэй хамт амьдрахаар хэрхэн эргэж очихыг мэдэж, Их Эзэн, Аврагч Есүс Христтэй улам ойр дотно болоход надад тусалдаг” хэмээн тэр ярилаа.

• “Би семинарт судруудын утгыг гүнзгий ойлгосон. Өдөр тутмынхаа ажил үйлсэд Христтэй адилхан байх ёстойг өглөө бүр санахад семинар надад тусалдаг.”

• “Семинар судар хэрхэн уншихыг, сударт зөвхөн дуртай байх төдийгүй үзэл санааг нь хэрхэн хэрэгжүүлэхийг надад заасан юм. Хайраар дүүрэн Тэнгэрлэг Эцэг, Есүс Христ хоёрын тухай гэрчлэлээ бэхжүүлэхэд надад тусалсан сургаал, зарчмуудыг би амьдралынхаа үлдсэн хугацаанд зүрх сэтгэлдээ тээж явах болно.

Дэлхий даяарх залуучууд семинарыг эн тэргүүнд анхаарах зүйлээ болгосноор үүнээс ирдэг үй олон адислалыг авдаг билээ.