Ang Pag-ampo sa Pasko Natubag

Si Peggy nahigmata sa buntag sa Pasko. Ganahan siyang modawat og makalingaw nga bag-ong dulaan ug magkumbira sa Pasko. Apan samtang siya nagtan-aw sa palibut, nasayud siya nga kining tuiga lahi. Bisan og ang iyang amahan nagtrabaho pag-ayo, nihit gihapon ang kwarta alang sa iyang pamilya.

Walay mga timailhan sa umaabut nga kumbira sa Pasko. Walay sulod ang mga sudlanan sa utanon, ug walay pagkaon sa refrigerator.

Si Peggy ug ang iyang igsoong lalaki, nga si Malcom, mipaingon sa kwarto sa ilang mga ginikanan ug nakakita nila nga nagluhod tupad sa ilang higdaanan. Hilom silang naminaw samtang si Mama ug Papa nag-ampo nga unta ang Langitnong Amahan motabang sa pamilya nga makabaton og pagkaon.

“Dali,” si Peggy miingon ngadto ni Malcolm. “Manggawas ta.”

Si Peggy ug si Malcolm migawas ug nanguha og mga wild fern nga mitubo duol sa tanaman. Tingali walay mga dulaan karong tuiga, apan ila gihapong mahimo nga ang Pasko anaa sa ilang balay.

Nindot ang ilang gibati human nila mabutangi og dekorasyon ang balay og berde nga mga fern, apan wala gihapoy timailhan sa pagkaon.

“Ang Ginoo motabang,” si Mama miingon. “Karon atong ipahimutang ang lamesa.”

Gibutang ni Papa ang mga plato diha sa lamesa samtang si Mama mibutang sa mga tinidor ug mga kutsara.

Ang mga bata nagtinan-away sa usag usa nga may kalibug sa ilang mga mata. Ang lamesa andam na, apan wala gihapoy pagkaon. Milabay na ang tingpamahaw ug nagkaduol na ang tingpaniudto. Mibati na og kagutom si Peggy. Naghunahuna siya unsaon kaha pagkakuha og pagkaon sa iyang pamilya.

Ang orasan mihagtok sa alas 12:00, dayon 12:30, dayon 12:45. Wala gihapon. Dayon si Peggy nakadungog og tuktok sa pultahan.

Midagan siya sa pag-abli sa pultahan ug nakugang nga nakita ang pamilyang Kirk nga nagbarug. Naggunit sila og hamon, pan, manok, mga salad, ug mga tam-is. Dili makatuo si Peggy sa iyang nakita.

“Bag-o lang kaming nanglingkod nga mangaon sa pagkaon sa Pasko sa dihang nakahunahuna mi ninyo,” miingon si Brother Kirk. “Hinaut nga magamit ninyo kini nga pagkaon.”

Gilamano ni Papa si Brother Kirk, ug nagsugod si Mama sa pagpahimutang sa pagkaon sa lamesa. Nakugang gihapon si Peggy. Misiga ang iyang mga mata nga nagtan-aw ni Mama ug Papa, apan ingon og nakahibalo na sila nga mahitabo kini.

Nasayud si Peggy nga ang iyang pagbati ganihang buntag eksakto. Kini nga Pasko lahi. Kini mao ang Pasko nga siya nakat-on nga ang Langitnong Amahan maminaw ug motubag sa mga pag-ampo. Ug kana mao ang labing maayo nga gasa nga iyang nadawat.