Niadtong Dominggo, Abril 29, 2012, Si Elder Erich W. Kopischke, Presidente sa Europe Area, mi-organisar sa unang stake sa Cape Verde (nailhan usab nga Cabo Verde) sa ulohang siyudad sa Praia, nga adunay labaw sa 1,000 ka mga Santos nga nanambong.

Gitawag ug gi-set apart sa pagdumala sa bag-ong Praia Cape Verde Stake mao si Rosiveltt Teixeira, presidente, uban ni Adilson Monteiro isip unang magtatambag ug José Pires isip ikaduhang magtatambag.

Ang masaysayong Hyde Park Chapel sa Simbahan didto sa London, England, gibag-o ug gipahinungod pag-usab isip usa ka chapel alang sa pagsimba ug ang visitors’ center sa wala pa ang 2012 Olympics, niadtong Hulyo 1, 2012.

Si Elder Erich W. Kopischke sa Seventy, Presidente kaniadto sa Europe Area, mipahinungod pag-usab sa building. “Manghinaut ako nga gatusan ka libo ka mga tawo ang mosulod sa building aron sa pagkat-on sa ebanghelyo ni Jesukristo,” miingon siya.

Niadtong Mayo 27, 2012, si Elder James J. Hamula sa Seventy, Presidente sa Pacific Area, miorganisar sa unang stake sa New Caledonia samtang nanambong ang 800 ka mga miyembro sa Simbahan.

“Ang mga Santos sa Ulahing mga Adlaw ug ang tibuok New Caledonia mapanalanginanan samtang itudlo ang ebanghelyo ni Jesukristo ug dawaton sa daghang mga tawo,” miingon si Elder Hamula.

Ang bag-ong stake, ang Noumea New Caledonia Stake, adunay 2,000 ka mga miyembro ug walo ka mga meetinghouse.

“Ang among labing importante nga misyon mao ang pagsangyaw sa ebanghelyo ug sa tanang mga baruganan ngadto sa mga tawo sa New Caledonia, nga makahatag og kalipay alang kanila, alang sa ilang mga pamilya, ug sa ilang trabahoan ug mga komunidad,” miingon si Georgie Guidi, kinsa gitawag nga unang presidente sa stake. Sila si Marc Mocellin ug Thierry Gorodey gitawag nga iyang mga magtatambag.

Ang mga miyembro sa Ethiopia nakakita na sa mga panalangin nga nagagikan sa unang meetinghouse sa nasud. Nahimutang sa highway tunga-tunga sa mga siyudad sa Addis Ababa ug Adama, ang building adunay tulo ka mga andana ug naglakip sa underground nga parkinganan.

Apan ang mas importante kay sa teknikal nga mga aspeto sa meetinghouse kon sa unsa nga paagi kini nagsilbi nga simbolo sa hugot nga pagtuo sa mga miyembro sa branch, kinsa nagmiting sa residential nga balay dili layo sa bag-ong building.

Ang presidente sa Branch sa Debre Zeit nga si Efrem Aemero Mekonen miingon, “matag higayon nga moadto ko sa bag-ong building makahinumdom ko sa atong mga pakigsaad. Sama ni Kapitan Moroni nga miisa sa titulo sa kalingkawasan, ako nalig-on.”