Unsaon Nato Pagpakaon ang Daghan Kaayo?

Isip presidente sa Relief Society, nasanapan ko sa mga panginahanglan ug mga hagit sa pipila ka pamilya nga giatubang sa among gamay nga branch. Lisud kaayo ang panahon, ug daghang mga miyembro ang nawad-an sa ilang trabaho.

Sa gawas sa Simbahan, ang kawala sa kadasig, kaguol, ug kawala sa paglaum makita sa mga mata sa daghang naglisud sa pagsangkap alang sa ilang pamilya. Gani ang mga bata ug kabatan-on mibati og grabeng walay kasiguroan ug kagubot.

Ang mga lider sa branch mibati sa panginahanglan nga mohatag og gamayng paglaum ug gugma ngadto sa nanginahanglan gyud pag-ayo—usa ka butang nga makatabang sa mga tawo sa among komunidad nga mobati nga ang mahigugmaong Langitnong Amahan nasayud sa ilang mga pagsulay ug nagtan-aw kanila.

Sa nagkaduol na ang Pasko, kami misugyot sa pagdapit sa pinakakabus nga mga bata sa among komunidad alang sa panihapon. Ang mga miyembro sa branch nag-fund-raising, nagpalit og pagkaon sa usa ka fast-food chain, ug nag-andam sa among meetinghouse para dawaton ang mga bisita. Ang tanan miapil, lakip ang mga bata sa Primary, batan-ong mga babaye, ug batan-ong mga lalaki.

Kami nakigsabut sa fast-food chain sa pag-andam sa pagkaon, ug gikontak namo ang mga social worker sa pagdeterminar sa mga pamilya nga nanginahanglan pag-ayo. Gihatagan kami sa mga worker og lista nga adunay 100 ka mga bata, nga sobra kaysa among gihunahuna. Wala kami mawad-i og paglaum, apan morag imposible nga makatigum sa igong kwarta aron sa pagpalit sa pagkaon sa ingon ka daghan nga mga bata.

Sa dihang adlaw na para sa panihapon, ang presidente sa branch, giubanan sa pipila ka mga deacon, mikuha sa pundo nga among natigom ug miadto sa restaurant, naghunahuna og maayo kon unsaon namo sa pagpakaon sa daghan kaayong mga bata nga limitado ang among pundo. Sila nag-ampo sa ilang pagpaingon didto, naghunahuna nga tingali dapiton lang ang labing gagmay nga mga bata, tungaon ang pagkaon, o dili padayunon ang kalihokan.

Sa ilang pag-abut sa restaurant, gibutang sa presidente sa branch ang kwarta diha sa counter. Mao kadtong higayona nga gitubag ang ilang mga pag-ampo.

Ang restaurant manager mitan-aw kanila ug, mipahiyom, miingon nga ikalipay niya nga ihatag ang mga pagkaon kutob sa gikinahanglan—nga walay bayad! Dili nako mahulagway ang kalipay nga among nabati sa pagkahibalo niining pagkamanggihatagon, nga nagtugot kanamo nga makadala og kalipay—ug daghang pagkaon—ngadto sa dakong grupo sa mga nanginahanglang mga bata.

Salamat sa pagkamanggihatagon sa tag-iya sa restaurant, among nagamit ang kwarta nga among natigom sa pagpalit og pagkaon ug paghimo og mga food basket ngadto sa labing nanginahanglan nga mga pamilya.

Gikan niini nga kasinatian kami nakakat-on nga walay paningkamot nga makawang kon atong ibutang ang atong mga talento ug maayong mga tinguha sa pagserbisyo sa atong isigka-tawo. Ang among mga pagpamatuod nalig-on nga ang Ginoo moandam og paagi kon atong buhaton ang tanan kutob sa atong mahimo.