Pag-focus sa Mahangturong Pamilya

Apan, sa dihang gipahibalo niadtong 2007 nga aduna na unyay Templo sa San Salvador El Salvador, ang ginikanan nila ni Kevin ug Jacqueline mihunong na sa pagsimba. Apan si Kevin, 18 anyos karon, ug si Jacqueline, 15 anyos, nagpadayon sa pagsimba, nag-ampo nga moabut ang adlaw nga ang ilang mga ginikanan mobalik sa pagsimba.

“Wala gyud ko mohunong sa pag-ampo ug paghangyo sa Langitnong Amahan nga sila maaktibo pag-usab,” miingon si Jacqueline. “Nasayud ko nga gusto sa Langitnong Amahan ang pinakamaayo para kanato, ug gusto Niya nga kita magmahangturon nga pamilya.”

Sila usab naningkamot nga mahimong maayong mga ehemplo sa ilang mga ginikanan. “Wala ko mawagtangi og paglaum,” miingon si Kevin. “Kanunay kong magbasa sa mga kasulatan ug mag-ampo, ug ang akong mga ginikanan makakita kanako nga magtuon ug mag-home teaching ug moadto sa mga kalihokan sa Simbahan. Samtang naningkamot ko sa pagsunod sa mga sugo ug sa paglambo, nakita sa akong mga ginikanan ang akong ehemplo.”

Ang mga pag-ampo nila ni Kevin ug Jacqueline para sa ilang mga ginikanan nasugdan sa pagtubag sa dihang hapit na mahuman ang pagtukod sa templo. “Sa dihang ang among mga lider mipahibalo sa pagpahinungod ug pagsaulog sa kultura, among gidapit ang among ginikanan,” miingon si Kevin. “Amo silang gisultihan sa among pribelehiyo isip batan-on nga maapil, ug kini nakapadasig kanila pag-ayo ug nakatabang kanila sa paglambo sa espirituhanong paagi.”

Dugang sa pagtambong sa pagsaulog sa kultura, ang pamilya nakatambong usab sa open house sa templo.

“Bisan tuod nga ang akong mga ginikanan wala na magsimbahan, ila gihapong gilantaw ang Simbahan ug ang ebanghelyo isip butang nga sagrado,” miingon si Kevin. “Sa among pagsulod sa templo, ang akong amahan misugod sa pagpasabut sa akong igsoon nga mga babaye ug kanako nga kon mosulod mi sa templo, kami magsul-ob og puti ug nga dinhi ipahigayon ang sagradong mga ordinansa.”

Si Kevin natingala sa iyang dos anyos nga igsoong babaye, kinsa sa kasagaran kiat, nagpabiling hilom samtang anaa sila sulod sa templo, ug siya nakabantay nga mihilak ang iyang inahan samtang nagtan-aw siya sa lain-laing mga kwarto ug painting. Sa dihang ang pamilya misulod sa sealing room, usa ka volunteer tour guide mipasabut kanila nga dinhi ang mga pamilya ibugkos nga mag-uban sa kahangturan.

“Ang among manghud nga babaye mihikap tagsa-tagsa kanamo ug miingon, ‘Akong inahan, akong amahan, akong Kevin, akong Jacqueline,’” miingon si Jacqueline. “Ingon og ang Langitnong Amahan namulong pinaagi kaniya sa pagsulti kanamo nga kaming tanan iyaha.”

“Dayon iya kaming gigakos ug mi-kiss namo ug mitudlo ngadto sa mga samin,” miingon si Kevin. “Among nakita ang repleksyon sa among kaugalingon nga nag-uban diha sa mga samin, ug nindot kaayo ni. Sa among paggawas sa sealing room nianang adlawa, kami mihimo og tumong nga mobalik didto.”

Human sa pagtambong sa open house sa templo, ang pamilya misugod sa pag-usab. “Sukad nga nakaadto mi sa templo, ang among pamilya nakaangkon pag-usab sa panglantaw,” miingon si Kevin. “Sukad adto nag-family home evening na mi, ug dad-on kami sa among ginikanan sa pagsimba ug motapad sa paglingkod namo sa atubangang laray sa lingkuranan sa simbahan.”

Niadtong Agosto 2011, sila si Kevin ug Jacqueline mibati nga napanalanginan nga makatapad sa ilang ginikanan sa stake center samtang ilang gitan-aw ang sibya sa pagpahinungod sa templo.

“Sa dihang ang templo gipahibalo niadtong 2007, ang akong mga ginikanan dili kaayo aktibo, ug nagtuo ko nga wala na koy oportunidad nga makauban sila sa pagpahinungod,” miingon si Kevin. “Sa dihang nagtapad kami, mabati gyud nako nga ang Langitnong Amahan mitubag sa akong mga pag-ampo. Ang makauban ang akong pamilya didto mao ang labing dako nga panalangin nga akong nadawat sa kinabuhi.”

“Kini nga kasinatian sa templo nakapalig-on kanako,” miingon si Jacqueline. “Ang nakapalig-on gyud nako pag-ayo mao nga makita nga ang templo makapausab sa kinabuhi, tungod kay kini nakatabang sa akong mga ginikanan nga maaktibo pag-usab sa Simbahan. Karon aduna mi tumong nga mabugkos didto sa templo. Nasayud ko nga gusto sa Langitnong Amahan ang labing maayo para kanato.”