Ang Hingpit nga Bisperas sa Pasko

Samtang nagdako ko, usa sa pinakanindot nga kalihokan matag tuig mao ang Bisperas sa Pasko. Ang akong pamilya ug ako maghimo og pizza, manaygon, ug dayon magpundok alang sa usa ka debosyonal sa Pasko. Kami manganta sa himno sa dili kaayo nindot nga upat ka tingog [four-part harmony] ug mopakusog sa among pagpanaygon gamit ang lain-laing mga instrumento sa musika. Tapuson ni papa ang gabii uban sa mensahe sa Pasko nga makapahilak namo sa kalipay. Wala nay mas nindot pa sa kinabuhi kaysa Bisperas sa Pasko.

Sa dihang nagdako na ko, ang akong mama misugod sa pag-atiman sa usa ka batan-ong silingan, si Kelly. Si Kelly moadto sa among balay human sa klase sa eskwelahan samtang ang iyang mama, si Patty, nagtrabaho. Si Kelly magsunod-sunod nako sama sa itoy—saba ug nanginahanglan. Makahupay gyud kon kuhaon na ni Patty ang iyang anak nga babaye ug mobiya sa among balay ug pamilya diha sa kalinaw.

Usa ka Disyembre, nahadlok ko sa dihang giimbitar ni mama sila si Patty ug Kelly nga moapil namo sa Bisperas sa Pasko. Ang Akong Bisperas sa Pasko. Si mama mipahiyom ug misiguro kanako, “Dili kini makausab og bisan usa ka butang.” Apan mas nasayud ko. Ilang hutdon ang among pizza. Kataw-an ni Kelly ang among pagpanganta. Akong nakita nga kini ang pinakabati nga Bisperas sa Pasko.

Sa pag-abut niadtong gabhiuna, sila si Patty ug Kelly miapil kanamo, ug kami nag-istoryahanay ug nagkinataw-anay ug nanganta. Sakto ang akong mama. Hingpit kadto. Pagkatunga-tungang gabii ila kaming gipasalamatan ug nagduha-duha sa pagpanlakaw. Mihigda ko nga ang kasingkasing mapasalamaton kaayo. Akong nadiskobrehan nga ang bililhong mga gasa sa Pasko dili makuhaan kon ipakigbahin. Hinoon kini mahimong matam-is ug managhan kon kini ipakigbahin.