Ang Pasko taliwala Kaninyo

Nagtuo ko nga ang tanan makahinumdom sa iyang unang Pasko nga layo sa panimalay. Ang rason nga nahilayo sa panimalay tingali tungod sa misyon o pagserbisyo sa militar, pag-eskwela, o panarbaho. Bisan unsa pa ang rason, ang unang Pasko nga malayo sa panimalay makaguol nga panumduman kanatong tanan. Alang niadtong nahilayo sa panimalay panahon sa Pasko, o mahimong mahilayo karong tuiga, akong ipahinungod kaninyo ang ako mismong panumduman.

Sa akoa mao kadtong nag-misyon ko. Sulod sa 19 ka tuig natagamtam nako ang Pasko nga gipalibutan sa akong pamilya ug mga higala. Tingali sa akong paghunahuna sa kaugalingon samtang batan-on pa wala gyud ko mokonsiderar sa paggahin niini sa laing paagi.

Dayon, sa hapit na ang Pasko niadtong 1960, nahimutang ko sa pikas nga bahin sa kalibutan nga layo niining mga butanga. Anaa ko sa England nga wala pa lang kaabut og tulo ka bulan sa dihang, sa unang adlaw sa Disyembre, gipatawag ko sa opisina sa misyon aron ikahimamat si Elder Eldon Smith, bag-ong miabut gikan sa Champion, Alberta, Canada—ang akong unang junior nga kauban. Kami gipadala nga mag-abli og bag-ong area sa konserbatibong siyudad sa Guildford, sa probinsya sa Surrey, usa ka dapit nga wala pay Santos sa Ulahing mga Adlaw nga mga misyonaryo ug, sa among nahibaloan, adunay usa lang ka miyembro didto nga pangitaunon pa namo. Kami mga batan-on, walay kasinatian, ug nasanapan og gamay, apan wala maluya among kasingkasing.

Kami miparehistro ngadto sa mga polis, mihan-ay sa among katulgan, ug, sa sinugdanan wala gyud namo makit-i ang bugtong miyembro sa Simbahan, nagsugod sa pagbuhat sa usa ka butang nga among nasayrang buhaton—manuktok sa mga pultahan. Manuktok mi sa mga pultahan sa buntag, manuktok mi sa mga pultahan sa udto, manuktok mi sa mga pultahan sa hapon, ug manuktok mi sa mga pultahan sa gabii. Kami magsakay sa among bisikleta sa kadalanan niadtong daw maoy pinakaulan nga Disyembre sa kasaysayan sa Britain—o ingon ana para kanamo. Basa mi sa buntag, basa mi sa udto, basa mi sa hapon, ug basa mi sa gabii, apan padayon mi nga nanuktok og mga pultahan. Ug wala gyuy midawat kanamo.

Nagpadayon kini hangtud Bisperas sa Pasko, dihang ang mga tawo dili na ganahang maminaw sa mga misyonaryo “gikan sa Estados Unidos.” Nianang gabhiona, gikapoy apan mapahinunguron, mipahulay mi sa among kwarto nga giabangan ug mipahigayon og debosyonal sa Pasko. Kami mikanta og himno sa Pasko ug dayon nag-ampo. Kami nagbasa sa mga kasulatan ug naminaw sa usa ka tape recording nga giulohan og The True Story of Christmas. Dayon mikanta mi og laing himno sa Pasko, nag-ampo, ug natulog. Gikapoy nami pag-ayo para magdamgo pa og mga butang kabahin sa Pasko.

Sa buntag sa Pasko gibuhat namo ang among eskedyul sa pagtuon matag buntag ug giablihan ang duha o tulo ka mga package nga gipadala kanamo human sa among transfer. Dayon migawas mi aron manuktok sa mga pultahan. Nanuktok mi sa buntag, nanuktok mi sa udto, nanuktok mi sa hapon, ug nanuktok mi sa gabii. Wala gyuy midawat kanamo.

Sa ingon nga ordinaryong Pasko—klaro nga kini ang pinakamingaw nakong nasinati sukad—may rason gayud ngano nga kadtong espesyal nga mga adlaw sa Disyembre sa 1960 dili gayud nako makalimtan (human sa sobra sa 50 ka tuig!) nga usa sa pinakatam-is nga Pasko nga akong nasinati. Siguro tungod kay kini ang unang higayon sa akong kinabuhi, ako mismong nakaplagan ang kahulugan sa Pasko kaysa pagtagamtam lang niini. Sa akong hunahuna sa pinakaunang higayon sa importante nga paagi, akong nasabtan ang mensahe sa pagkatawo ug kinabuhi ni Kristo—Iyang mensahe ug Iyang misyon ug Iyang sakripisyo para sa uban.

Unta ako na ning nasabtan sa mas bata pa ko, apan wala—dili gyud ingon ana ka kusog. Apan kadto nga Pasko sa England—isip gitugnaw, basa, ingon og nasanapan nga 19 anyos—ako “kining nasabtan.” Makasulti gyud ko nga tungod sa akong misyon, ang Pasko, sama sa ubang aspeto sa ebanghelyo, nahimong mas makahuluganon kanako matag tuig sukad adto nga kasinatian.

Niini nga Pasko akong ipabati ang akong gugma sa matag misyonaryo, matag lalaki o babaye sa militar, matag estudyante, ug matag empleyado ug tigbyahe kinsa wala sa “panimalay alang sa Pasko,”¹ sama sa lyrics sa usa ka kanta sa Pasko. Padayuna ang inyong hugot nga pagtuo. Tan-awa ang maayo sa inyong sitwasyon. Pagbuhat og usa ka maayo nga butang ngadto sa usa ka tawo. Tinguhaa si Kristo lapas pa sa mga putos ug gilakgilak. Inyong makaplagan nga bisan pa sa mga sirkumstanya, ang Pasko—susama sa gingharian sa Dios— “anaa ra sa taliwala kaninyo” (Lucas 17:21).