Sunbeams, Public Affairs, ug Kalipay sa Ebanghelyo

Pipila ka tuig na ang milabay, sa dihang si Elder M. Russell Ballard ug ako mao ang mga General Authority nga tigtambag sa Departamento sa Public Affairs sa Simbahan, nakaamgo kami nga ang media sa kasagaran mokontak og mga tawo nga dili mga miyembro sa Simbahan aron sa pagpakigsusi mahitungod sa Simbahan. Nagtinguha og kausaban, si Elder Ballard ug ako, ubos sa direksyon sa Unang Kapangulohan, nagsugod sa pagbisita sa mga editorial board sa dagkong mga pamantalaan, nagpakigbahin sa mensahe nga, isip mga Santos sa Ulahing mga Adlaw, kita walay gidapigan sa politika. Dili kita modapig og mga kandidato o mga grupo. Hinoon, kita gusto nga mao ang mopasabut sa atong kaugalingong relihiyon. “Gusto namo nga kamo,” giingnan namo sila, “moanhi ug makigsulti namo kon kamo gusto nga mohisgot unsay among gituohan.”

Kadtong mga pagbisita maayo pagkadawat, ug among nakaplagan nga ang among hangyo dunay epekto. Ug nakita na nato karon nga mas nakasabut na ang media sa mga Santos sa Ulahing mga Adlaw. Ang ubang karaang pagtuo nawala na, ug atong nakita nga ang ubang mga tawo miila na nato nga mga tawo nga kasaligan kinsa maningkamot sa pag-atubang sa kinabuhi gikan sa pagsabut sa usa ka edukado ug maalamon. Nakaamgo usab kami nga sa gawas sa Simbahan dili pareha ang tanang mga Santos sa Ulahing mga Adlaw; ang atong mga katawhan lahi gikan sa usag usa sa maayo ug makapaikag nga mga paagi.

Uban niining nagkausab nga mga kinaiya, nindot karon nga panahon nga mahimong miyembro sa Simbahan ug sa mga miyembro nga mosulti ug motubag sa mga pangutana sa ilang mga higala ug mga silingan mahitungod sa atong mga pagtuo. Sa atong pagbuhat sa ingon, walay laing mas importante kay sa atong bation nga kalipay ug nga kita nagmaya sa ebanghelyo ni Jesukristo. Nasayud kita unsa unya ang sangputanan, kita nakaila kinsa si Jesukristo, ug kita adunay oportunidad nga dunay usa ka mahigugmaong Amahan sa Langit nga mopanalangin nato.

Akong nakita nga makapaikag nga ang atong pinakamaayo nga miyembro nga mga misyonaryo, kadtong kinsa mipahimulos sa oportunidad sa pagpakigbahin sa ebanghelyo, sa kasagaran mao ang mga tawo nga malipayon. Sa dihang ako ang Executive Director sa Missionary Department, nakamatikod dayon kami og mga bunyag sa France. Nadasig, naghunahuna mi sa mga rason, ug dihay daghan. Apan usa sa importante nga mga rason mao ang usa ka sister kinsa motrabaho sa Lunes sa buntag ug maghisgot mahitungod sa Sunbeams. Human sa adlaw nga igpapahulay, siya—uban sa dakong kalipay ug kahimuot—mosulti sa iyang mga kauban sa trabaho mahitungod sa iyang kasinatian sa pagtudlo sa mga bata sa miaging adlaw. Sa wala madugay, ang iyang mga kauban dili na hapit makahulat nga mohisgot siya mahitungod sa Sunbeams. Ug unsay nahimo niana? Aniay grupo sa mga tawo nga nagpuyo uban sa samang mga kabalaka natong tanan mahitungod sa atong kalibutan ug sa umaabut, ug sa kalit lang, dihay usa ka tawo kinsa dili lang malipayon apan malipayon bahin sa mga bata—kinsa nagrepresentar sa umaabut. Kini nga sister klaro nga nahigugma sa Manluluwas, ug kana nga gugma misanag. Ang iyang mga kauban gusto nga makahibalo pa og dugang.

Kon kita malipayon unsay ania nato, kon kita mobati og kalipay ug mopadayag niini, mas malipayon kita. Atong gibuhat unsa ang gusto sa Ginoo nga atong buhaton, mahimo kitang mas maayo nga mga tawo, ug pinaagi sa asosasyon, kadtong naglibut nato—ang atong mga anak ug mga higala ug mga silingan—mas magmalipayon. Ang kalipay mao ang yawe. Samtang atong ipakigbahin ang kalipay sa ebanghelyo, atong matuman unsa ang gusto sa Ginoo nga atong matuman.