Sagradong mga Kausaban

Niadtong Septyembre 20, 2008, mga 600 ka mga Santos sa Ulahing mga Adlaw ang nagpundok sa bungtod nga nabasa pag-ayo tungod sa ulan sa siyudad sa San Salvador, El Salvador. Sila nagbarug sa yuta nga gigamit sulod sa mga katuigan isip plantasyon. Ubos sa direksyon sa Central America Area Presidency, sila nagdungan sa pag-ampo ug nagpakigbahin sa ilang pagpamatuod. Pipila kanila midogkal sa yuta gamit ang bag-ong mga pala, nagpaabut og kausaban nga mahitabo niana nga napiliang dapit.

Niadtong Agosto 21, 2011, liboan ka mga matinahurong naghinam-himan nga mga Santos sa Ulahing mga Adlaw ang miabi-abi sa usag usa diha sa sama nga bungtod. Dili na usa ka plantasyon, kini nausab ngadto sa usa sa labing sagrado nga dapit sa El Salvador. Ang mga Santos nagtapok libot sa templo. Sila naghinam-hinam nga nagpaabut sa pag-abut sa usa ka propeta, si Presidente Henry B. Eyring sa Unang Kapangulohan, kinsa mopahinungod niana nga templo sa Ginoo. Usa sa dugay na kaayo nga miyembro sa Simbahan, halos naghung-hong na lang, miingon nga ang dapit nalahi gayud sa naglibut niini—“usa ka tipik sa langit dinhi sa yuta.”

Niadtong Abril 2010, si Evelyn Vigil nabalaka nga ang iyang bana, si Amado, hapit na mawad-an sa iyang pagtuo. Wala na siya magsimba sulod sa 11 ka tuig, nakahukom nga wala na ang tinuod nga Simbahan. Sa samang panahon, si Evelyn wala gayud mohunong sa pagtuo sa Dios, ug siya magsimbahan sa lain-laing simbahan, nanghinaut nga makadungog sa Iyang pulong apan wala gayud matagbaw sa iyang nadunggan. May mga buntag nga mobangon siyang luhaan. Sa ingon niining mga adlaw, siya naghangyo og giya gikan sa iyang Langitnong Amahan. Siya nangutana Kaniya nganong dili niya mabati nga husto ang bisan unsang simbahan nga iyang gisimbahan, bisan gusto na kaayo niya nga makat-on kabahin Kaniya. Siya usab nag-ampo nga unta sa umaabot ang iyang pamilya magkahiusa sa usa ka simbahan.

Niadtong Agosto 23, 2011, sila si Amado ug Evelyn Vigil nakasinati og kausaban sama sa kausaban nga nahitabo diha sa bungtod sa ilang kapital nga siyudad. Nagsinina og puti, sila misulod sa sealing room uban sa ilang anak nga babaye, nga si Michelle, nwebe anyos, ug ilang anak nga lalaki, si Christian, tres anyos. Sila ang unang pamilya nga nabugkos sa karon ug sa kahangturan sa Templo sa San Salvador El Salvador. Sama sa templo nga ilang gisudlan, sila bag-ohay lang nagpahinungod sa pagserbisyo sa Ginoo, ug sila nagkahiusa sa ilang pagpahinungod.

“Ang among istorya nagsugod,” mihinumdom si Amado, “sa dihang nakakita kami og usa ka paris sa mga elder—aw, sila diay ang nakakita namo. Kami migawas na sa balay sa mga ginikanan ni Evelyn, ug kami nagbitbit og mga shopping bag. Kami nakamatikod nga ang mga elder nakakita namo ug mitabok sa dalan paingon kanamo. Usa kanila mabinationg nangutana kon makatabang ba sila namo.

“Nangutana usab sila kon motugot ba mi nga sila mobisita namo. Miingon ko og oo, tungod lang gyud sa akong kakuryuso. Niadtong higayona, wala pa kaayo koy nahibaloan kabahin sa Simbahan—mga komentaryo lang nga akong nadungog gikan sa ubang tawo.

“Human ko miuyon nga ang mga elder makabisita sa among panimalay, giingnan nako ang akong asawa, “Ayaw og kahinam pag-ayo kabahin niini. Ayaw pag-ilusyon nga magpamiyembro ko sa simbahan. Kuryuso lang ko kon unsa ang ilang itudlo.’

“Ang mga elder misugod sa pagbisita kanamo. Andam ko nga matinahurong mopagawas kanila sa among balay kon adunay butang nga dili eksakto para kanako. Apan mabination kaayo sila, ug nahimuot ko nga dili sila mosulti og bati kabahin sa ubang simbahan. Nagtudlo sila uban sa gugma ug kakugi, ug sila mapailubon kon mangutana ko og daghan. Dali silang nasuod namo.”

Hinay-hinay, si Amado ug Evelyn nag-andam nga mabunyagan ug makumpirmahan isip miyembro sa Ang Simbahan ni Jesukristo sa mga Santos sa Ulahing mga Adlaw. Ang dakong hagit ni Evelyn mao ang Pulong sa Kaalam. Siya nagguol sa kamatuoran nga kinahanglan niyang hunungon ang iyang pag-inom og kape. Si Amado walay bisyo; kinahanglan lang niya nga makat-on sa paghupot sa kamatuoran. Siya mituo sa gipangtudlo sa mga misyonaryo, ug gani siya nakamatngon sa daghang mga doktrina ug praktis nga siya ug ang iyang asawa mibati nga wala sa ubang simbahan, sama sa mahangturong pamilya, bunyag para sa patay, ug pag-fellowship ug pag-organisar sa Simbahan. Apan nagduha-duha siya nga magpabunyag. Nabalaka siya nga kon magpamiyembro siya sa Simbahan, iya lang unyang mahibaloan nga sayop ang iyang desisyon.

Sa wala madugay kini nga mga kabalaka nawala. Si Evelyn nag-ampo sa panabang ug nabuntog ang iyang batasan sa pag-inom og kape, nag-ingon, “Dili ko motugot nga kini makapahikaw kanako sa pagdawat sa mga panalangin.” Human sa duha ka bulan nga pagduha-duha, si Amado mipasalig nga magpabunyag. Karon, sumala ni Evelyn, siya kanunay ang moingon, “Kinahanglan nato nga dawaton ang doktrina.”

Sila si Amado, Evelyn, ug Michelle nabunyagan ug nakumpirmahan niadtong Hunyo 2011. “Sukad kami nabunyagan,” miingon si Evelyn, “mibati ko nga ang tanan nagsugod sa pag-usab. Ang akong pamilya nagkahiusa sa Simbahan. Among nakaplagan ang gipahiuli nga ebanghelyo. Kami adunay mga pagsulay ug mga sakit sukad adto, apan ang atong Langitnong Amahan mibu-bu og daghang panalangin ngari kanamo.”

Si Amado nakaobserbar: “Ang unang kausaban nga akong namatikdan mao ang panaghiusa sa among pamilya. Dili ingon nga aduna mi dakong problema sa una, apan mas nagkahiusa mi karon. Ang mga doktrina sa ebanghelyo nakatabang kanamo. Samtang ang mga lider sa Simbahan nagtudlo kanato kabahin sa kasagrado sa pamilya, kami naghunahuna og maayo kabahin sa mithi nga among sundon sa among pamilya.”

Ang bishop sa mga Vigil, si César Orellana, nakakita usab og kausaban sa ilang kinabuhi. Sa wala madugay human sa ilang bunyag, si Amado miduol ni Bishop Orellana ug miingon, “Gusto namong mobayad og ikapulo, apan wala mi kahibalo kon unsaon.”

Si Bishop Orellana mipasabut nga ang ikapulo mao ang 10 porsyento sa ilang kinitaan. Si Amado ingon og nabalaka. Nianang higayona, si Evelyn adunay trabaho, siya wala. “Kanunay gyud nga magkulang among kwarta,” mipasabut si Amado ngadto sa iyang bishop, “apan gusto namo nga mobayad sa ikapulo.”

Si Bishop Orellana mitubag, “Brother, ang Ginoo naghimo og daghang mga saad.” Dungan nilang gibasa ang mga kasulatan kabahin sa mga panalangin nga madawat gikan sa matinuorong pagbayad og ikapulo, lakip ang mga pulong sa Ginoo pinaagi ni propetang Malaquias: “Dad-a ninyo ang tibuok ikapulo sa balay nga tipiganan, … ug pinaagi niini sulayi ninyo ako karon, nagaingon ang Ginoo sa mga panon, kong dili ba buksan ko kaninyo ang mga tamboanan sa langit, ug bubuan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10).

Human sa pagdungan og basa niining kasulatan, gitan-aw ni Bishop Orellana ang bag-ong kinabig ug miingon, “Kon ang pagbayad sa ikapulo nagpasabut nga dili ka kabayad sa tubig o kuryente, bayad og ikapulo. Kon ang pagbayad og ikapulo nagpasabut nga dili ka kabayad sa abang, bayad og ikapulo. Bisan gani kon ang pagbayad og ikapulo nagpasabut nga wala kay igong kwarta sa pagpakaon sa pamilya, bayad og ikapulo. Dili ka pasagdan sa Ginoo.”

Pagkasunod Dominggo, giduol ni Amado si Bishop Orellana pag-usab. Niining higayona wala na siya mangutana. Iya lang gidunol ang sobre ngadto sa iyang bishop ug miingon, “Bishop, ania ang among ikapulo.”

Naghunahuna pag-ayo niining kasinatian, si Bishop Orellana miingon, “Sukad adto, sila matinud-anong tigbayad sa ikanapulo.” Ang pamilya nakadawat og mga hinabang gikan sa balay tipiganan sa bishop sa ilang mga kalisud sa pinansyal. Gawas niana, ang Ginoo mipanalangin kanila nga sila makabarug sa ilang kaugalingon. Si Evelyn na-promote sa trabaho, ug si Amado nakakita og maayong trabaho. Sa wala madugay nawad-an og trabaho si Evelyn, apan nagpadayon sila sa pagbayad og ikapulo ug nakadawat og espiritwal ug temporal nga mga panalangin tungod sa ilang pagkamatinuoron. Kausa si Bishop Orellana nangutana ni Amado kon kumusta ang pinansyal sa pamilya. Si Amado mitubag, “Maayo ra mi. Usahay dili mi daghan og pagkaon, apan aduna mi paigo lang. Ug labaw sa tanan, kami misalig sa Ginoo.”

Human sa mubong panahon nga nagbayad sila sa ikapulo, sila si Evelyn ug Amado nakighisgut uban ni Bishop Orellana sa mga panalangin nga ilang nadawat. Nagpasabut ngadto sa Malaquias 3:10, sila miingon, “Among nasulayan ang Ginoo.” Ug tinuod ang saad ni Bishop Orellana, nga wala gayud sila pasagdi sa Ginoo.

Si Evelyn ug Amado malumo nga maghisgut sa adlaw nga ang ilang pamilya nagkahiusa sa sealing room. Sila nabalaka nga sa panahon nga sila ma-endowed ug maandam sa ordinansa sa pagbugkos sa sama nga adlaw, ang ilang mga anak magkiat. Sila nabalaka pag-ayo sa ilang lihokan nga tres anyos nga anak nga lalaki, si Christian. Apan misulod ang mga bata sa sealing room nga may malinawong balaang pagtahud, nagpakita nga ilang nasabtan ang rason nganong anaa sila didto. Ug sa panahon na sa mga bata nga moapil sa ordinansa sa pagbugkos, si Christian, walay instruksyon o pagdasig, milakaw paingon sa altar ug miluhod tapad sa iyang mga ginikanan.

Si Evelyn nakahinumdom nga nakakita sa repleksyon sa ilang pamilya diha sa mga samin. Si Amado naghisgut usab nga nakakita, dili lang sa templo apan sa matag adlaw nga kinabuhi. Siya mipahayag og pasalamat sa mahangturong panglantaw nga karon naggiya sa iyang kinabuhi—usa ka panglantaw nga daw nabati nila ni Michelle ug Christian sa dihang anaa sila sa balay sa Ginoo. Kini nga panglantaw mas milapad pa pag-ayo sukad niadto, ilabi na nga ang mga Vigil mi-welcome og bag-ong anak nga babaye sa pamilya—si Andrea, kinsa natawo diha sa pakigsaad niadtong Agosto.

Ang pamilyang Vigil mahangturon nga mausab pinaagi sa maulaong pagsakripisyo ni Jesukristo ug sa impluwensya sa Iyang templo sa ilang yuta. Tungod kay ang usa ka plantasyon nausab ngadto sa usa ka sagrado nga yuta, ang ila mismong panimalay nahimong mas sagrado.

Sa daghang mga pamaagi sila nagrepresentar sa saad sa tibuok nasud. Ang El Salvador panimalay sa minilyon nga buotan, matinud-anong mga tawo kinsa gitintal sa kalibutanong mga butang matag adlaw. Ang mga Salvadoran nga mga Santos nahigugma sa ilang yutang natawhan, ug sila nakakaplag og bag-ong paglaum samtang ilang nakita ang templo sa Ginoo didto. Sila nakakaplag og kasiguradoan sa mosunod nga mga pag-ampo sa pagpahinungod sa templo nga gisulti ni Presidente Eyring:

“Kami nag-ampo nga ang Imong mga panalangin maanaa sa nasud sa El Salvador. Tandoga ang mga kasingkasing niadtong nagdumala, nga ang mga tawo mapanalanginan sa kagawasan ug oportunidad. Unta ang kalinaw maghari sa yuta.

“Palamboa ang Imong buhat niini nga yuta. Unta ang mensahe sa ebanghelyo makatandog sa mga kasingkasing sa mga tawo sa tibuok nasud. Unta sila magpabunyag, ug magpabiling matinud-anon ug matinuoron nganha Kanimo. …

“… Uban sa mapasalamatong kasingkasing, kami mopahinungod niining balaang estraktura ug ang mga nataran niini aron matuman ang Imong kabubut-on ug matuman ang Imong mahangturong buhat. Kami nag-ampo nga ang impluwensya niini mabati sa tibuok yuta isip usa ka kahayag sa ibabaw sa bungtod.”¹

Ang dako nga impluwensya niini siguradong mabati pinaagi sa serbisyo ug ehemplo sa mga tawo sama sa pamilyang Vigil. Gamit ang iyang kamot sa pagpahid sa mga luha ug nanlimbasug sa pagsulti tungod sa emosyon, si Amado Vigil karon mapinanggaong naghisgot sa mga misyonaryo kinsa mihimong posible alang kaniya ug sa iyang pamilya sa pagduol ngadto kang Kristo ug sa pagdawat sa mga panalangin sa templo. “Kami naglaum nga ang among mga anak makaserbisyo og misyon,” siya miingon, “aron ilang mapanalanginan ang ubang mga pamilya, sama niadtong batan-ong mga lalaki nga mipanalangin kanamo.”