Ang mga bata sa Primary sa La Florida Third Ward sa Santiago, Chile, mibisita sa nataran sa templo uban sa ilang mga lider sa Primary ug mga sakop sa bishopric. Samtang naglibut sila sa matahum nga mga tanaman, naghisgot sila sa katuyoan sa mga templo, ug nanganta sila og “Gusto Ko nga Makita ang Templo” (Children’s Songbook [Songbook sa mga Bata], 95). Nakakita usab sila og video mahitungod sa kinabuhi ni Jesukristo.

Sa Primary atong nakat-unan ang “Unang Pag-ampo ni Joseph Smith” (Mga Himno ug mga Awit sa mga Bata, nu. 26), ug karon mao ni ang akong paborito nga himno. Kon ako usa na ka misyonaryo, akong ipakigbahin ang istorya sa Sagrado nga Kakahoyan uban sa mga tawo nga akong tudloan. Gihigugma nako si Jesukristo ug si Propeta Joseph Smith. Ako nasayud nga ang Simbahan tinuod.

Si Helena C., edad 9, gikan sa Costa Rica, mibati dayon ingon nga siya usa ka miyembro sa Simbahan human siya mabunyagi sa iyang amahan. Malingaw siya sa mga leksyon sa family home evening mahitungod ni Jesukristo. Ganahan usab siya nga moadto sa eskwelahan ug magdula uban sa iyang mga higala.

Mopadala ko og pagtimbaya gikan sa templo. Usa kadto ka maanindot nga adlaw sa dihang ako ug ang ubang mga bata gikan sa Libertad Ecuador Stake nakabisita sa nataran sa Templo sa Guayaquil Ecuador. Giimbitar namo ang tanang mga bata sa kalibutan sa pag-adto sa templo kon makahimo sila—maanindot kini nga lugar.

Sa milabayng unom ka bulan, ang mga bata sa Primary sa Fuji Ward sa Shizuoka, Japan, mihimo og chigiri-e, usa ka koleksyon gikan sa ginisigisi nga papel, naghulagway ni Presidente Thomas S. Monson. Nagkinahanglan kini og taas nga panahon ug trabaho, apan ang tanan nagtinabangay samtang naghunahuna ug nagkat-on mahitungod ni Presidente Monson.