Ang Akong Gasa ni Jesus

Panahon alang sa family home evening! ”Si papa mitawag.

Nagdali ko padulong sa sala. Kanunay kaming maghimo og makalingaw nga mga butang sa unang family home evening sa Disyembre.

Ang akong manghud nga babaye, si Michelle, miuna pagdagan nako ug milukso sa humok nga asul nga lingkuranan.

“Di kana makiangayon!” Misinggit ko. “Ikaw ang milingkod diha sa miaging semana. Ako na sad.”

“Akoy nakauna dinhi, maong ako ang molingkod dinhi,” nakiglalis siya. “Mahimong molingkod ka sa sopa.”

“Dili ko gustong molingkod sa sopa,” masuk-anon ko.

Midagan ko ngadto sa rocking chair ug gipatalikod kini aron di ko makakita ni Michelle. Usahay iya kong pasuk-on! Nagtuo siya nga iyang makuha bisan unsay iyang gusto. Kon magbagulbol ko, si Mama moingon nako nga kinahanglang dili ko maghinakog.

Human namo makanta ang himno ug nag-ampo, si Papa miingon, “Ang Pasko usa ka nindot nga panahon, ug kinahanglan kitang mahinumdom sa tinuod nga kahulugan sa holiday. Karong gabhiona atong sugdan uban sa atong mga gasa ngadto ni Jesus.”

Ang among mga gasa ngadto ni Jesus. Nakalimot ko niana!

“Gisaulog nato ang Pasko tungod kay si Jesus natawo,” mipadayon si Papa. “Gihimo Niyang posible alang nato nga makadawat sa labing mahinungdanon nga gasa—ang kinabuhing dayon uban sa Langitnong Amahan.”

“Ug unsay Iyang gihangyo nga atong buhaton?” Si Mama nangutana.

“Sa pagsunod Kaniya ug pagtuman sa Iyang mga sugo,” mitubag ang akong igsoong lalaki.

Mihatag si mama namo og kard ug lapis. Among isulat kon unsaon namo sa pagpakita ni Jesus nga kami nahigugma Kaniya. Mao kadto ang among gasa—sa pagpili og butang nga among buhaton aron mas mahisama ni Jesus.

Nasayud ako diha-diha unsa ang akong gasa. Gitudloan kita ni Jesus sa paghigugma sa uban, bisan kon sila nakapasuko nato. Nasayud ko nga si Jesus gusto nga mahalon nako ang akong igsoong babaye. Misulat ko, “magbinuotan ko ngadto ni Michelle.”

Among gibutang ang among mga kard sa usa ka kahon nga giputos og bulawan nga papel. Gibutang namo ang kahon ilawom sa Christmas tree. Kada higayon nga kami motan-aw sa kahon, kinahanglang among hinumduman ang gasa sa Manluluwas ngari namo ug among gasa ngadto Kaniya.

Pipila ka mga adlaw, akong nakita nga gikuha ni Michelle ang akong paborito nga shirt nga wala mananghid. Singgitan unta nako siya. Dayon mitan-aw ko sa bulawan nga kahon ug nahinumdom kon unsa nako ka mahal si Jesus. Makapakita ko og gugma Kaniya pinaagi sa pagbinuotan ngadto sa akong igsoong babaye. Miingon ko, “Gwapa kaayo ka tan-awon karon, Michelle.”

Mipahiyum siya. Pasayloa ko nga wala ko mananghid nga isul-ob ang imong shirt. Wala ka didto sa dihang nag-ilis ko, ug gusto ko nindot tan-awon alang sa akong Christmas party karon.”

Nindot ang akong gibati. Nalipay ko nga mipili nga magbinuotan ngadto ni Michelle imbis masuko kaniya.

Alang nianang bulana, naningkamot ko nga hinumduman kanang nindot nga pagbati ug ang akong tumong nga mahimong sama ni Jesus. Mas milambo pa ko sa pagpasensya ug paghigugma.

Sa gabii sa Pasko, si Papa mibasa sa istorya sa pagkatawo ni Jesus, ug kami ang midrama-drama niini. Nakahukom ko nga ako ang anghel imbis makiglalis ni Michelle kon kinsa ang modala sa papel ni Maria.

Sunod among giablihan ang bulawan nga kahon ug mibasa pagkusog sa among mga gasa ngadto ni Jesus. Sa dihang akong gibasa ang ako, si Mama miingon, “Akong namatikdan nga buotan na kaayo ka kang Michelle. Mapasigarbuhon kaayo ko nimo!”

Mapasigarbuhon usab ako. Wala pa gani nako maablihi ang bisan unsa nga mga gasa, apan nakadawat na ako og butang nga espesyal: usa ka pagbati gikan sa Espiritu Santo nga nagsulti nako nga ako naghimo sa eksakto nga butang.