Popcorn, mga Pioneer, ug Kalinaw

Gibutang ni mama ang bika sa oven ug dayon giputos kini og habol aron magpibiling init ang among tiil samtang nagbiyahe kami sa sakyanan nga walay heater. 1935 pa kadto, ug nagbiyahe mi og 60-ka milya (96 km) gikan sa Siyudad sa Salt Lake ngadto sa Payson, Utah, sa pagbisita sa among mga apohan sa sayo sa Disyembre. Ang snow hinay lang nga nangatagak sa among palibut ug nagtuyok daw gagmay nga mga alimpulos sa unahan sa dalan. Ang akong magulang, si Fred, ug ako giputos og baga nga mga coat ug medyas ug mga muffler nga hinimo sa katol nga wool. Ang pagbiyahe ingon og walay kahumanan para kanako isip siyete anyos nga bata.

Himoon ni namong pagbiyahe matag Disyembre. Ang panahon sa Pasko dili magsugod hangtud kami maanaa sa init nga kusina nila ni Lola ug Lolo Tanner maghimo og mga popcorn ball. Si Lolo ang mopasiga sa oven, ug si Lola ang mobutang sa wire basket nga may popcorn ug uyog-uyogon kini pag-ayo sa ibabaw sa kalayo hangtud mapuno kini sa humok, puti nga popcorn. Dayon bubu-an ni Lola og init nga honey butter ang ibabaw sa popcorn diha sa dakong cast-iron kettle ug sagulan og mga mani. Kon mabugnaw na, kami dayon magsugod sa pagkaon nga ang kamot puno sa butter ug mahimo og festive nga mga bola aron ipakigbahin sa pamilya ug mga higala.

Karon nga Pasko, hinoon, lahi. Kasagaran si Fred ug ako maglingkod sa luyo nga lingkuranan sa sakyanan, apan karong tuiga kami huot nga gipatung-an sa among mga ginikanan sa atubangan. Usa ka gamay nga puti nga lungon asa naghigda ang patayng lawas sa akong usa ka tuig nga manghod, si Gerold, anaa sa luyo. Ang tipdas migrabe nga nahimong pneumonia ug mikalas sa iyang linghod nga kinabuhi. Bag-ohay lang didto kami sa gihayaan sa patay aron kuhaon ang gamayng lungon nga hinimo sa kahoy.

Samtang nagbiyahe kami og duha ka oras, si Papa naggiya kanamo sa pagpanganta og mga awit sa Pasko. Nagdungan og kanta sila si Mama ug Papa, ug ang maanindot nga musika mihupay kanamo samtang kami nagguol sa pagkawala sa among igsoon.

Sa among pag-abut sa balay ni Lolo, ang kasagarang malipayong pundok sa pamilya ug mga paryente masulub-ong nagpaabut. Ang lungon gikuha sa luyo sa sakyanan ug gidala ngadto sa limpyo nga parlor ni Lola. Ang bishop sa akong mga apohan namulong og pipila ka mabinationg mga pulong, ug dayon misakay mi og balik sa sakyanan aron moadto sa sementeryo, diin kaming tanan nanghilak samtang kini nga talagsaong batang lalaki gilubong sa bugnaw kaayo nga yuta.

Pasko na. Nagsiga na ang kalayo, ang popcorn gi-pop na, ug ang festive popcorn balls gihatud ngadto sa balay ni Lolo gamit ang sleigh nga gibitad sa kabayo. Adunay kaguol niadtong adlawa apan aduna usab kalinaw samtang naminaw ko sa akong mga matinud-anong mga apohan nga nagbasa sa istorya sa pagkatawo ni Kristo.

Ang akong mga apohan natawo sa mga ginikanan nga mga pioneer kinsa milubong og daghang mga bata ngadto sa yuta. Samtang ang among pamilya nagguol tungod sa pagkamatay, kami misalig kon asa misalig ang among mga katigulangan—sa Anak sa Dios ug sa Iyang mga pulong. Gihinumduman nako ang istorya sa Pasko nga may laing kahulugan niadtong tuiga, kay tungod sa bata nga natawo sa pasungan nga ang bata nga among gilubong sa yuta mabuhi pag-usab ug among makauban.

Daghang mga dekada ang milabay sukad niadto, apan matag Pasko magbu-bu gihapon ko og honey butter ibabaw sa popcorn, sagulan og mani, moporma niini og mga bola, ug mohinumdom.