Nanghinaut Ko nga Adunay Usa ka Tawo nga Mohigugma Kaniya

Sa dihang ang akong anak nga lalaki tres anyos ug ang akong anak nga babaye kwatro anyos, apil sila sa grupo sa preschool sa kasilinganan. Niana nga tingtugnaw kami nga gisangunan sa grupo mihukom nga mobuhat og proyekto para sa Pasko nga naglakip nga ang kada bata mohatag og dulaan ngadto sa usa ka pamilya nga nanginahanglan.

Kami mitudlo og daghang mga leksyon nianang mga semana sa wala pa ang kalihokan kon sa unsang paagi ang pagkamapasalamaton ug pagpakigbahin sa uban makalipay kanato. Giingnan nako ang akong mga anak sa pagsugod og hunahuna kon unsa nga mga dulaan nga ilang ganahang ihatag, ganahan ko nga makasinati sila sa pagpili unsa ang ihatag. Limitado ang among panalapi sa pamilya, ug kuryuso ko kon asa sa ilang diyotay nga mga dulaan ang andam nilang ihatag.

Usa ka Sabado sa buntag giingnan nako ang mga bata nga panahon na sa pagpili asa sa ilang dulaan ang ihatag. Gitabangan nako sa pagputos si Hunter sa truck nga iyang napilian ug dayon giadto si Mikelle sa pagsusi sa iyang gibuhat. Ang eksena nga akong nakita gikan sa pultahan sa iyang kwarto nakapahilak kanako.

Si Mikelle nagkupot sa iyang paborito nga monyeka, si Mella, gisininaan kini sa iyang pinakanindot nga sinina, ug iya kining gikantahan. Dayon iyang gibutangan og gamay nga habol sa sulod sa usa ka gift bag. Gipahiyuman niya ang monyeka, gigakos ug gihagkan kini, ug mabinantayong gibutang kini sa bag. Pagkakita nako, siya miingon, “Andam na si Mella, Ma. Nanghinaut ko nga adunay usa ka tawo nga mohigugma kaniya.”

Nasayud sa pagbati sa akong anak nga babaye niining monyeka, natingala ko ngano iya kining ihatag. Buot unta kong mosulti ni Mikelle nga dili niya kinahanglang ihatag ang iyang paboritong monyeka, apan akong gipugngan ang akong kaugalingon.

“Siya nakasabut sa pagkamanggihatagon,” naghunahuna ko. “Iyang gihatag ang iyang pinakanindot.”

Diha-diha dayon akong naamguhan nga usa ka bahin nako andam sa paghatag ug pagpakigbahin apan dili dako kaayo nga personal nga sakripisyo. Gilimitahan nako ang akong kalooy, ug nasayud ko nga kinahanglan kong mag-usab.

Naghunahuna ko kon giunsa paghatag sa Langitnong Amahan ang Iyang bugtong hingpit nga Anak ug mitugot Kaniya nga mag-antus ug mamatay para kanako. Akong gilantaw ang usa ka mahigugmaong Amahan sa Langit nga gihagkan ang Iyang Pinalanggang Anak ug Iyang gipadala dinhi sa yuta isip usa ka bata, naglaum nga kita mohigugma ug mosunod Kaniya.

Ang Manluluwas Mismo walay gikawilihan ug Iyang gihatag ang tanan.

Naghunahuna ko kon mausab ba ang hunahuna ni Mikelle sa wala pa ang programa sa Pasko, kon ipanghatag na ang mga dulaan, apan wala mausab iyang hunahuna. Naghunahuna ko kon magbasol ba siya sa iyang pagpili ug mobati og kaguol, apan wala siya magbasol.

Nakakita sa sama kang Kristo nga ehemplo sa akong anak nga babaye, mihukom ko nga kon ako adunay dako o gamay nga ihatag, malipayon kong ihatag ang akong pinakamaayo kon adunay oportunidad sa pagpakigbahin.