Mga Pahina sa Pinulongan Naghatag og mga Materyal sa Simbahan sa Labaw sa 100 ka mga Pinulongan

Alang sa mga miyembro sa tibuok kalibutan kinsa dili makasulti og usa sa 10 ka nag-unang mga pinulongan—Chinese, English, French, German, Italian, Japanese, Korean, Portuguese, Russian, ug Spanish—makakaplag tingali nga lisud ang pagpangita og mga materyal sa Simbahan sa ilang lumad nga pinulongan. Apan kadtong kinsa nakahibalo sa LDS.org nga mga pahina sa pinulongan, maka-access sa importante nga mga materyal sa Simbahan sa pipila lamang ka mga klik.

Sa ibabaw nga tuong bahin o sa ubos sa walang bahin sa LDS.org nga homepage, i-klik ang litrato sa kalibutan sa pagpangita sa mga link sa tanang anaa nga mga pinulongan sa mga pahina sa LDS.org. Sa katapusan sa 2012, ang LDS.org team naglaum mga adunay 108 ka pinulongan, lakip sa Hrvatski (Croatian), Malagasy (sinultihan sa Madagascar), ug Twi (sinultihan sa Ghana).

Ang mga materyal nga anaa sa kada pinulongan magkalahi, apan ang kada item mahimong iprinta ug ma-download.

Karong tuiga ang mga pahina sa pinulongan gibag-o uban sa pipila ka bag-ong mga item, lakip sa PDFs sa Liahona lokal nga mga pahina sa labaw sa 40 ka pinulongan ug yanong teksto nga PDF sa Abril 2012 nga kinatibuk-ang komperensya sa labaw sa 90 ka pinulongan. Ang PDFs sa Basahon ni Mormon sa 99 ka pinulongan nadugangan og 24 ka pahina sa pinulongan kadtong anaa na sa LDS.org.

Nahubad nga mga item makita sumala sa tibuok kalibutan nga plano sa Simbahan sa pagpaila sa mga materyal sa Simbahan sa piho nga mga pinulongan.

Niining bahin sa plano, importante nga mga item—mga pag-ampo sa sakrament, ang Mga Artikulo sa Hugot nga Pagtuo, ang manwal sa Gospel Fundamentals, pagpili og mga pakigpulong sa kinatibuk-ang komperensya, ug ang pamphlet sa Pagpamatuod ni Propeta Joseph Smith, pananglit—maoy unahon sa paghubad.

Dugang nga nahubad nga mga materyal sama sa mga kasulatan, musika, “Ang Pamilya: Usa ka Pamahayag ngadto sa Kalibutan,” ug ang mga Mensahe sa Unang Kapangulohan ug Visiting Teaching mahimong ilakip samtang ang gidaghanon sa mga miyembro sa Simbahan kinsa nagsulti og usa ka pinulongan magkadaghan.

Ang mga materyal hubaron ug ipagawas human maaprobahi sa Unang Kapangulohan ug sa Korum sa Napulog Duha ka mga Apostoles. Ang mga Kapangulohan sa Area makasugyot usab nga kana nga mga materyal maanaa sa piho nga pinulongan kon makita nila ang panginahanglan.

“Kini nga mga pahina magamit sa tanang mga miyembro alang sa personal ingon man usab magamit sa Dominggo,” miingon ang manedyer sa digital channels senior product nga si Matt Robinson. “Ang lokal nga mga lider makagamit niini nga kapanguhaan alang sa ilang personal nga pagtuon ingon man usab pag-awhag sa mga miyembro sa paggamit niini sa mga calling ug mga pamilya.”

Si Sargis Ayvazyan, ikaduhang magtatambag sa kapangulohan sa Yerevan Armenia District, mireport nga ang mga miyembro nga Taga-Armenia nalipay nga mogamit sa pinulongang pahina sa Armenian sa pagprinta og mga materyal nga makatabang nila sa pagtuman sa ilang mga calling. Gigamit usab kini nila sa pagdawat ug pagbasa og impormasyon mahitungod sa Simbahan ug sa pagpangita og mga materyal sa kinatibuk-ang komperensya sa ilang lumad nga pinulongan.