Sa Daan
Paghihintay sa Winter Quarters
Isang Bagong Lungsod
Matapos mapatay si Propetang Joseph Smith, naging mapanganib na lugar ang Nauvoo, Illinois. Nilisan ng mga Banal ang kanilang tahanan para maghanap ng mas ligtas na lugar na matitirhan. Noong Pebrero 1846, nagsimulang maglakbay pakanluran ang unang grupo ng mga Banal, ngunit nagpabagal sa kanila ang masamang panahon at karamdaman. Nang nakatawid na sila sa Iowa, huli na para matawid nila ang Rocky Mountains bago sumapit ang taglamig sa taon na iyon. Kaya pumili ng lugar ang mga lider ng Simbahan kung saan maaaring manatili ang mga Banal habang taglamig. Pinangalanan nila itong Winter Quarters.
Pagtutulungan
Ang ilan ay nagtayo ng bahay na yari sa troso o lupang madamo. Ang iba ay nanirahan sa mga tolda at kuweba. Sinikap ng mga Banal na maging masaya sa gitna ng matagal at maginaw na taglamig. Nagtulungan sila. Nagpunta sila sa mga konsiyerto at nag-awitan at nagsayawan. Gumawa sila ng gilingan ng harina, nagtayo ng bulwagang bayan, at pagawaan ng basket.
Pagpapatuloy
Napakahirap ng panahong ginugol ng mga Banal sa Winter Quarters. Marami ang namatay. Ngunit nanalig ang mga pioneer na pagpapalain sila ng Panginoon at tutulungan silang makarating sa Sion. Nang sumapit ang tagsibol, nilisan ng unang grupo ng mga pioneer ang Winter Quarters para maglakbay patungong Salt Lake Valley.
Ngayon ay makikita ninyo ang magandang Winter Quarters Nebraska Temple at mabibisita ang Mormon Trail Center sa Winter Quarters para marami pang malaman tungkol sa mga pioneer.