O Se Filifiliga Manumalo

Ata

Product Shot from October 2015 Liahona

Na faanatinati atu Miranda i le faitotoa i luma, na faafetai ua sili le malu o lona fale nai lo le tau vevela o le taumafanafana i fafo. Sa afu tele o ia mai lana taaloga soka mulimuli o le vaitau ma na loto vaivai ona o le faiaina o le au Teal Turbos. E toe tupu foi.

Sa sau tina i totonu o le potu o loo siiina mai se fagu vai ma se tagapepa o tipiga moli na totoe mai le taaloga. “Na lelei tele lau taalo. O le puipuia o le tini o se galuega faigata.”

O Miranda sa taalo lelei—sa ia polokaina le tele o sikoa ma na kiki malosi atu nai lo le mea na masani ai. Ae o le toatele o isi teineiti o lana au e lei taaalo soka muamua lava, ma o le aso na faaaloaia ai: na faiaina uma a latou taaloga o lenei vaitau.

“Maimau lava pe ana mafai ona ou i ai i se au e manumalo mai lea taimi i lea taimi, a ea?” Na maligi ni nai loimata mai tulimanu o mata o Miranda ma palasi i luga o lona mitiafu lanu moana-lanu meamata. A o ia faamoeiiniina mau ona mata, sa tatagi le telefoni.

Na piki i luga e Tina le telefoni ma ina ua mavae sina taimi na fai mai, “E mo oe.”

“Talofa, Miranda? O Toma lea, le faiaoga o le Chili Kickers. Sa ou matamata i lau taaloga i le aso. E maoae lau taalo iina.”

Sa amata ona tatope le tata o le fatu o Miranda. O le Chili Kickers o le au soka sili ona lelei i le liki!

“O le matou au o le a alu i le suega siamupini o le risone i le masina a sau. Na matuai lelei lau taalo i le aso ma ou te manao e te sau ma i matou e avea ma se puipui tini faaleoleo.”

Na toeitiiti lava oso mai i fafo le fatu o Miranda mai lona fatafata. O lona avanoa lenei e taalo ai i se au e manumalo!

“Ou te fiafia e alu atu!” Le tala lea a Miranda. Na la talatalanoa mo ni nai minute e uiga i faamatalaga a o lei ia tuu i lalo le telefoni ma tamoe atu i le isi potu e ta‘u atu ia Tina. Na la amata faatasi ona tusitusi aso o faataitaiga ma taaloga i luga o le kalena a le aiga.

Na faafuasei lava ona taofi e Tina le tusitusi, o lana peni na i luga ae o se tasi o faatafafa o le kalena.

“A-oi. Miranda, o nei taaloga e fai i le aso Sa. Lea, vaai.” Sa ia faasino atu i le faasologa o taaloga ma liliu atu ia Miranda ma ni foliga faanonou ma le popole. “O le a sou manatu i le mea e tatau ona ta faia?”

Sa tau pe le fatu o Miranda, ma sa ia ūina lona laugutu a o mafaufau o ia i ona avanoa. E mafai lava e Tina ona faataga o ia e taalo pe a ia fesili i ai, ae na ia mafaufau e uiga i le taaalo i le Aso Sa—ma aemaise lava le misia o le lotu—na ia mauaina se lagona le lelei i lona manava. Sa ia iloaina o le Aso Sa e mo le alu i le lotu ma tapuai atu i le Tama Faalelagi, ma e le mafai ona ia faia na mea a o taalo soka.

“Ou te manatu e tatau ona ou valaau atu ia te ia e ta‘u atu ia te ia e le mafai ona ou taalo,” le tala lea a Miranda. Sa ia taumafai malosi ina ia le tagi. E ui lava sa ia iloa o le filifiliga sa‘o, sa faigata ona tuua se mea sa matuai manao lava o ia i ai.

“Ma e te iloa lou manatu?” O le tala lea a tina, ma tuuina atu ia te ia se opo lapoa lava. “Ou te manatu o oe ose tamaitiiti maoae tele lava.”

O lena Aso Sa, a o nofo Miranda i le Peraimeri, sa ia mafaufau e uiga i le filifiliga lelei na ia faia. Sa ofo le faiaoga ina ua valaau atu Miranda ma fai atu e le mafai ona ia taalo soka i Aso Sa. Sa ia [faiaoga] taumafai ina ia suia lona mafaufau, ae sa ia tumau i lana filifiliga. O lenei la, a o faalogologo atu i pese o le Peraimeri ma lesona, sa ataata Miranda. Na tau atu e le lagona toafilemu i lona loto ia te ia o loo i ai o ia i le nofoaga sa‘o. Sa ia faia se faaiuga o le manumalo lava.