O Le Fuafuaga o le Faaolataga: O Se Oa Paia o le Malamalama e Taialaina i Tatou
Saunia e Elder Robert D. Hales
O Le Korama a Aposetolo e Toasefululua
O le ki i lo tatou manuia i le muai olaga o lo tatou lagolagoina o le fuafuaga a le Tama. E faapena foi le ki i lo tatou manuia i le olaga faaletino.
Sa ou mafaufau soo ai i le leai o se faamoemoe o fanau a le Atua e feoai i le lalolagi pouliuli ma le pagatia, e lē iloaina po o ai i latou, pe o fea na latou o mai ai, pe aisea ua latou i ai i le lalolagi, po o fea latou te o i ai pea mavae o latou olaga faaletino.
E le tatau ona tatou feoai solo. Ua faaalia mai e le Atua upumoni e faavavau e tali ai fesili nei. E maua i Lana fuafuaga sili mo Lana fanau. I tusitusiga paia ua ta‘ua lenei fuafuaga o le “fuafuaga o le togiola,”1 le “fuafuaga o le fiafia,”2 ma le “fuafuaga o le faaolataga.”3
O LE BEECHES, SAUNIA E ASHER BROWN DURAND, © O LE FAALEMATAAGA O FAATUFUGAGA A METROPOLITAN, PUNA O ATA: PUNA O FAATUFUGAGA, NY, E LE MAFAI ONA KOPIINA
E ala i le malamalama ma le mulimuli ma le usiusitai i le fuafuaga a le Atua, tatou te tausia i tatou lava mai le o ese atu mai le ala e toe foi atu ai i lo tatou Tama Faalelagi.4 Ona, ma e pau lava lena o le ala, e mafai ona tatou ola ai i le ituaiga olaga ua Ia taitaia, o le “ola e faavavau,… le meaalofa silisili lea o meaalofa uma a le Atua.”5
O le meaalofa o le ola e faavavau e matuai aoga lava mo soo se taumafaiga e suesue, aoao, ma faaaoga le fuafuaga o le faaolataga. O le a toetutu tagata uma ma maua faamanuiaga o le tino ola pea. Ae ina ia ausia le ola e faavavau—le ola o loo taitaia e le Atua6—e taua le ola ai i le fuafuaga o le faaolataga ma lo tatou loto atoa, mafaufau, agaga, ma le malosi.
Malamalama i le Fuafuaga o le Faaolataga
E ese le mamana o le iloaina o le fuafuaga! O le fuafuaga o le faaolataga o se tasi o oa silisili o le malamalama e mafai ona tuuina atu i tagata ona o loo faamalamalama mai ai le faamoemoega e faavavau o le olaga. A aunoa ma lena malamalama, tatou te feoai moni lava i le pogisa. O le mafuaaga lenei e tuuina atu ai e le mamanu a le Atua poloaiga i Ana fanau “ina ua uma ona ia faaali ia te i latou le fuafuaga o le togiola.”7
O lo‘u naunau e fesoasoani ia i tatou taitoatasi ia faaaoga lenei oa o le malamalama—ia malamalama atili ai i le fuafuaga o le faaolataga ma faaaoga lena malamalama i o tatou olaga i aso taitasi.
Faitalia
Ona o le faitalia e taua i lenei fuafuaga, ia tatou amata iina. Ua tuuina mai e lo tatou Tama ia i tatou le gafatia e galulue ai, po o le mumusu e galulue ai8 e tusa ai ma upumoni e faavavau—o upumoni ua faia le Atua i le mea ua i ai nei o Ia ma le lagi i le mea ua i ai nei.9 Afai tatou te faaaogaina lo tatou faitalia e talia ma ola i nei upumoni, tatou te maua le olioli tumau-faavavau. I le isi itu, afai tatou te faaaogaina lo tatou faitalia ina ia le usiusitai, e tetee i tulafono a le Atua, tatou te oo i mafatiaga ma faanoanoaga.10
O le saolotoga e maua ai se tulaga talafeagai mo mataupu e tolu o le fuafuaga o le faaolataga: muai olaga, olaga faaletino, ma pe a mavae le olaga nei.
Muai Olaga
E pei ona tautino mai i le “O Le Aiga, o se Folafolaga i le Lalolagi,” o i tatou taitoatasi “o se atalii po o se afafine agaga faapelepele o ni matua faalelagi” ma “se natura paia ma se taunuuga.”11 I se fono i le muai olaga, na faamalamalama mai ia i tatou e le Tama Faalelagi Lana fuafuaga o le togiola.12 Na faavae Lana fuafuaga i le aoaoga faavae, tulafono, ma mataupu faavae ia na i ai lava i taimi uma.13 Na tatou aoaoina afai tatou te taliaina ma mulimuli i le fuafuaga, o le a manaomia i tatou e tuua le afioaga a lo tatou Tama ma le naunautai ma tofotofoina i tatou e faaali atu ai pe o le a tatou filifili e ola e tusa ma Ana tulafono ma poloaiga.14 Sa tatou fiafia i lenei avanoa15 ma lagolagoina ma le agaga faafetai le fuafuaga aua ua ofoina mai ia i tatou le ala e avea ai faapei o lo tatou Tama Faalelagi ma mautofi ai i le ola e faavavau.
Ae o le fuafuaga sa aunoa ma le tulaga lamatia: afai tatou te filifili i le olaga nei e le ola e tusa ai ma tulafono e faavavau a le Atua, o le a tatou maua se mea e itiiti ifo nai lo le ola e faavavau.16 Na silafia e le Tama o le a tatou tautevateva ma agasala e pei ona tatou aoaoina e ala i aafiaga i le olaga nei, o lea na Ia saunia ai se Faaola e togiola ai mai le agasala tagata uma e salamo ma faamalolo ai manu‘a faaleagaga ma faalelagona o i latou o e usiusitai.17
O Iesu Keriso o le Alo pele o le Tama, na filifilia ma muai faauuina talu mai le amataga.18 Na Ia lagolagoina le fuafuaga a le Tama ma ofo atu e avea ma o tatou Faaola, ma fetalai mai: “O Au lenei, auina atu au.”19 O lea la, o Iesu na tofia e le Tama e avea ma Tagata e ola i se olaga e leai se agasala i le olaga nei, o le togiola mo a tatou agasala ma puapuaga, ma toetu mai ia motusia ai noataga o le oti.
O Lusifelo, o lea ua lauiloa nei o Satani, sa ola foi i le muai olaga.20 Mo mafuaaga manatu faapito na ia teena ai le fuafuaga, ma saili e faaumatia le saolotoga o le tagata, ma tetee atu i le Tama.21 O se taunuuga, o Satani ma i latou o e na mulimuli ia te ia o le a le maua lava se tino. Sa latou faamelea lo latou avanoa e auai i le fuafuaga a le Tama ma leiloa ai lo latou taunuuga paia.22 I le aso o loo latou faaauau pea lo latou taua o le fouvale faasaga i le Atua ma saili e liliu mafaufau ma loto o tagata ola ia faasagatau atu ia te Ia.23
Sa mamanuina lenei lalolagi ma foafoaina mo i latou o e taliaina le fuafuaga a le Tama.24 O iinei tatou te maua ai se tino ua foafoaina i le faatusa ma foliga o le Atua. O iinei e tofotofoina ai i tatou ma faamaoniaina ai. O iinei tatou te maua ai le aafiaga e manaomia e maua ai le ola e faavavau.25
Olaga Faaletino
O le Atua na foafoaina Atamu ma Eva ma tuu faatasia i laua o se tane ma se ava, na tuuina i laua i le Faatoaga o Etena, ma poloaiina i laua ia maua ni fanau.26 I le faatinoina o lo la faitalia, na pauu faatasi ai Atamu ma Eva mai le afioaga o le Atua ma avea ai ma tagata faaletino.27 O lenei mea na faataunuuina ai le fuafuaga a le Tama e ala i le mafai ai e i laua ona maua ni fanau, lea e le mafai ona la faia i le Faatoaga o Etena.28 E ala i le tulafono e faavavau, o le mana paia o le foafoaga e tatau ona faaaogaina i totonu o tuaoi ua faataatia e lo tatou Tama Faalelagi. O le faia o lena mea e maua ai avanoa mo le olioli e faavavau. O soo se faaaogaaga o lenei mana paia i fafo atu o tuaoi a le Atua o le a iu lava i le faanoanoa.29
O Satani, e manao i tagata uma “ia pagatia tagata uma e pei o ia lava”,30 e taumafai e toso ese i tatou mai avanoa ia e maua i le fuafuaga a le Tama. Aisea e faatagaina ai e le Tama Faalelagi Satani e faaosooso i tatou? Aua ua Ia silafia o mea faafeagai e tatau ai mo lo tatou tuputupu ae ma le suesueina i le olaga nei.31 O le faafeagai e aumaia ai ia i tatou se avanoa e liliu atu ai i le Atua ma faalagolago ia te Ia. Ona o le lelei ma le leaga e i ai pea lava pea i o tatou luma, e mafai ona manino lo tatou faaleoina atu o manaoga o o tatou loto e ala i le taliaina o le tasi ae teenaina le isi.32 E mafai ona maua le faafeagai i faaosoosoga a Satani, ae faapea foi i o tatou lava vaivaiga, o le vaivaiga faaletino o loo i ai i le tulaga faaletagata.33
Ina ia fesoasoani ai ia i tatou e filifili ma le atamai, ua faaalia mai e le Atua Lana fuafuaga o le togiola ma ua tuuina mai poloaiga,34 le Malamalama o Keriso,35 ma le mafutaga a le Agaga Paia.36 Ae e ui lava i nei meaalofa uma, o soo se tasi o i tatou i lenei lalolagi e pau e agasala lava, ma ua mafai ai e i tatou uma lava ona ulufale atu i le afioaga o le Atua ia tatou lava galuega.37 O le mafuaaga lena o Lana fuafuaga alofa mutimutivale ina ia saunia se Faaola.
O Iesu Keriso na afio mai i le lalolagi o le Alo e Toatasi na Fanaua e le Atua ma faataunuuina Lana misiona na atofaina ma le atoatoa e ala i le gauai atu i le finagalo o le Tama i mea uma.38 E tusa ai ma le fuafuaga alofa mutimutivale a le Tama, ua faatoilaloina ai aafiaga o le Pau e ala i le Toetu o le Faaola,39 e mafai ona faatoilaloina taunuuga o le agasala, ma vaivaiga e mafai ona liliu atu i le malosi pe afai tatou te faaaogaina le Togiola a Iesu Keriso.40
Christ’s Image, saunia e Heinrich Hofmann, faaaloaloga o le C. Harrison Conroy Co.
E faatoa mafai ona tatou agavaa mo le ola e faavavau i le usiusitai i poloaiga. E manaomia ai le faatuatua i le Alii o Iesu Keriso, salamo, papatisoina, mauaina o le meaalofa o le Agaga Paia, ma tumau e oo i le iuga i le mulimuli i faataitaiga a le Faaola.41 I se faaupuga talafeagai, e tatau ona tatou mauaina sauniga uma e manaomia o le perisitua ma tumau e oo i le iuga i le tausia o feagaiga e o faatasi ai.
Pe a Mavae le Olaga Nei
Pe a tatou oti, o le a tatou laulaututu taitoatasi i se aso i luma o le Faaola ina ia faamasinoina.42 Ona e alofa mutimutivale le Atua, o i latou o e faaalia lo latou faatuatua ia Keriso i le salamo o le a faamagaloina ma maua ai mea uma o loo i le Tama, e aofia ai le ola e faavavau.43 Ona o le Atua e amiotonu, o tagata taitoatasi e le salamo o le a le mafai ona maua le meaalofa o le ola e faavavau.44 O le a tauia tagata taitoatasi e tusa ai ma lona faatuatua, salamo, mafaufauga, manaoga, ma galuega.45
O le faaaogaina o le Fuafuaga o le Faaolataga i o Tatou Olaga i Aso Taitasi
O le taimi lava tatou te malamalama ai i le faamoemoega atoa o le fuafuaga ma vaaia i tatou lava i totonu, tatou te maua ai se mea e taua tele, e manaomia lava: le vaaiga e faavavau. Ua faailoa e se vaaiga e faavavau a tatou faaiuga i aso taitasi ma faatinoga. Na te faatoaina o tatou mafaufau ma agaga. Pe a taavili faataamilo ia i tatou manatu faatauanau ae faavavau le sese, tatou te tutumau ma le le mafaagaeetia.
E pei ona aoao mai Elder Neal A. Maxwell (1926–2004) o le Korama a Aposetolo e Toasefululua: “A aunoa ma se malamalama i le fuafuaga o le faaolataga, e aofia ai lo tatou muai olaga ma le faamasinoga ma le toetu, ma taumafai ia i ai se uiga o lenei olaga na o ia lava o le a pei o le vaaia na o le vaega lona lua o se tala faatino e tolu-vaega.”46 E tatau ona tatou malamalama i le vaega muamua (muai olaga) ina ia mafai ona iloa le auala e faia ai filifiliga e sili ona lelei i le vaega lona lua (olaga faaletino), lea o le a e iloa ai le mea e tupu ia i tatou i le vaega lona tolu (pe a mavae le olaga nei).
I se isi faaupuga, o le malamalama i le fuafuaga o le faaolataga, faatasi ai ma le tatalo faamaoni, e suia ai le ala tatou te vaai ai i le olaga, i tagata uma e siomia i tatou, ma i tatou lava. O le malamalama i le fuafuaga e faamanino ai la tatou vaaiga faaleagaga ma mafai ai ona tatou vaai i mea e pei ona i ai moni lava.47 E pei o le Urima ma le Tumema na mafai ai e le Perofeta o Iosefa Samita ona maua faaaliga ma le taitaiga,48 o le a faapena ona faaalia ai e le malamalama i le fuafuaga ia i tatou pe faapefea ona “faia e tusa ma mataupu faavae ma mataupu autu e faatatau i le lumanai, e tusa ai ma le faitalia” ua tuuina mai e le Alii ia i tatou.49 O lea la, o le a faamalosia ai lo tatou faatuatua, ma o le a tatou iloa ai pe faapefea ona faatautaia le ala o lo tatou olaga ma faia ni faaiuga e tusa ai ma le upumoni e faavavau.
O ni nai faataitaiga nei e faapitoa le taua i lo tatou taimi.
O Le Faamoemoega o le Faaipoipoga i le Fuafuaga a le Atua
ATA NA TUSIA E JAMES JOHNSON: Christ’s IMage, SAUNIA E HEINRICH HOFFMANN
O le faaipoipoga ma le aiga o loo i lalo o le osofaiga aua ua iloa e Satani o mea na e taua i le mauaina o le ola e faavavau—e pei o le taua o le Foafoaga, le Pa‘ū, ma le Togiola ma le Toetu o Iesu Keriso.50 I le lē faamanuiaina i le faaumatiaina o soo se tasi o na poutu o le fuafuaga, ua saili Satani e faaumatia lo tatou malamalama ma le faatinoga o faaipoipoga ma aiga.
Faatasi ai ma le fuafuaga a le Tama Faalelagi i le avea ai ma se vaega ua tamau o mau faasino, o le faamoemoega o le faaipoipoga o le a manino lava i le vaai. O le poloaiga e tuua le tama ma le tina, e faatasi i le tasi ma le isi i le faaipoipoga,51 ma fanafanau ma uluuluola ma faatumuina le lalolagi52 ua mafai ai ona faataunuuina Lana fuafuaga. E ala i le faaipoipoga, ua tatou aumaia ai Ana fanau agaga i le lalolagi ma avea ma se paaga faatasi ma Ia i le fesoasoani ai i Ana fanau e auai i Lana fuafuaga.53
O le fuafuaga a le Tama ua tatou maua ai le auala e mautofi ai i le ola e faavavau, o le olaga ua taitaia e o tatou matua faalelagi. I le fuafuaga, “e leai se tane pe a le o i ai le fafine, [po o ] le fafine pe a le o i ai le tane, i le Alii.”54 O le aano moni o le ola faavavau e aofia ai le faaipoipoga e faavavau o le alii ma le tamaitai, o se vaega taua o le avea e faapei o o tatou matua faalelagi.55
O le Faaipoipoga i le va o le Alii ma le Tamaitai
I le faaipoipoga ua tatou faaatoatoa ai le tasi i le isi, aua ua na o alii ma tamaitai faatasi ai ma o latou eseesega tulaga ese e mafai ai. O le savavali i le olaga faaletino o se tane ma se ava, tatou te ola faatasi, ma faalatalata atili atu i le Faaola a o tatou usiusitai, faia osigataulaga e faia le finagalo o le Atua, ma fausia Lona malo faatasi. O le iloaina o le faaipoipoga e faavavau o se poloaiga a le Atua, ma ua Ia saunia se ala mo Lana fanau ina ia faataunuuina mea uma ua Ia poloaiina,56 ua tatou iloa ai o le a faamanuiaina a tatou faaipoipoga pe a tatou aufaatasi i le tausiga o feagaiga na tatou osia.
E ala atu i sauniga o le perisitua ma le filifiliga e tausia feagaiga e tatau i ai na tatou te maua ai le mana faaleatua a o tatou feagai ma luitau o le olaga faaletino.57 O sauniga o le malumalu e faaeeina mai ia i tatou le mana mai luga, ma mafai ai ona tatou toe foi atu i le afioaga o lo tatou Tama Faalelagi.58 O sauniga o le faamauga e mafai ai e le tane ma le ava ona tutupu ae faatasi e ala i le mana o le Atua ma avea ma tagata e tasi i le Alii.59 Soo se tasi e suia lenei ituaiga o faaipoipoga o le a lē faataunuuina ai Ona faamoemoega paia mo i tatou po o le augatupulaga o Ana fanau o mulimuli mai.60
Faatosinaga ma Manaoga
O i tatou taitoatasi e o mai i lenei lalolagi agasala ma vaivaiga po o luitau na fananau mai o i ai i le tulaga faaletagata.61 O le malamalama i le fuafuaga a le Atua e mafai ai ona tatou vaai i vaivaiga uma o le tagata soifua—e aofia ai faatosinaga ma manaoga e le tusa ai ma Lana fuafuaga—e le tumau.62 O le iloaina sa tatou nonofo i le muai olaga o ni atalii ma afafine faapelepele o ni matua faalelagi, ua mafai ai e i tatou ona malamalama i lo tatou faasinomaga patino mai lo tatou amataga paia. O lo tatou tulaga o le avea ma se atalii po o se afafine o le Atua—e le o o tatou vaivaiga po o faanaunauga—o lona uiga o le puna moni o lo tatou faasinomaga.63
Faatasi ai ma lenei vaaiga, e sili atu ona mafai ona tatou faatalitali ma le lotomaualalo ma le onosai i le Alii,64 ma talitonu e ala i lo tatou faatuatua, usiusitai, ma tumau e oo i le iuga, o o tatou uiga ma manaoga o le a faamamaina, o le a faapaiaina o tatou tino, ma avea moni lava i tatou ma atalii ma afafine o Keriso, ua faaatoatoaina e ala i Lana Togiola.
E aumaia e le vaaiga e faavavau o le fuafuaga le mautinoa e faapea, mo le au faatuatua, o le a mautinoa lava le oo mai o le aso o le a “soloiesea foi e le Atua loimata uma; … e leai foi se toe puapuaga: aua ua mavae atu mea muamua.”65 O lenei “susulu atoatoa o le faamoemoe”66 o le a faatoafilemuina o tatou mafaufau ma loto ma mafai ai ona tatou faatalitali ma le onosai, ma le faamaoni i le Alii.
Folafolaga mo i Latou o e Tumau ma le Faatuatua
O i latou e mafaufau pe o lo latou aafiaga i le taimi nei po o le tulaga e vavaeeseina ai i latou mai le ola e faavavau e tatau ona manatua e “E leai se tasi na muai fuafuaina faapea e itiiti mea na te maua nai lo mea uma o i le Tama mo Ana fanau.”67
E leai se faamanuiaga e teena i e faamaoni. Na tautino mai e Peresitene Lorenzo Snow: “E leai se tagata o le Au Paia o Aso e Gata Ai, o lē maliu i le mae’a ai ona soifua i se olaga faamaoni, o le a lē mauaina se mea e tasi, ona o le lē mafaia ona fai o nisi mea patino, ina ua lē mauaina avanoa mo i latou. I se isi faaupuga, afai o se alii po o se tamaitai talavou ua le mauaina se avanoa e faaipoipo ai, ma sa ola faamaoni e o’o lava i le oti, o le a latou mauaina faamanuiaga uma, faaolataga ma mamalu e mafai ona maua e soo se alii po o se tamaitai, sa maua lenei avanoa ma faaleleia atili ai. O mautinoa ma lelei lena tulaga.”68
Folafolaga mo i Latou Uma o e Iloa le Fuafuaga ma Faaaogaina i Aso Taitasi
AOAO I LATOU IA MALAMALAMA, SAUNIA E WALTER RANE
O i tatou taitoatasi sa lagolagoina ma le loto atoa le fuafuaga a le Tama i le muai olaga. Sa tatou iloa sa alofa o Ia ia i tatou, ma sa tatou maofa i Lana ofo agalelei o lenei avanoa e mautofi i mea uma ua ia te Ia, e aofia ai le ola e faavavau. O le ki i lo tatou manuia i le muai olaga o la tatou lagolago i le fuafuaga a le Tama. E faapena foi le ki i lo tatou manuia i le olaga faaletino.
O lea la, o la‘u valaaulia ina ia tatou tutu faatasi e lagolago le fuafuaga a le Tama. Tatou te faia lenei mea ma le alofa mo tagata uma, aua o le fuafuaga lava ia o se faailoaga o le alofa o le Atua.
A o tatou faaaogaina i aso uma lo tatou malamalama i le fuafuaga a le Tama, o le a i ai se uiga loloto atu o lo tatou olaga. O le a tatou feagai ma o tatou luitau ma se faatuatua sili atu. O le a tatou fetaomi atu i luma ma le faamoemoe mautinoa, susulu, ma le maofa o le ola faavavau.