E tusa ai ma le fuafuaga o le fiafia a lo tatou Tama Faalelagi mo i tatou, o lo tatou toe foi atu i Lona afioaga e faavae i luga o le oti ma le toetu, lea o le a fesoasoani ia i tatou e suia ai mai lenei tulaga faaletino i se tulaga faavavau. E tau lava o lou taliaina o le mea moni o le oti o se vaega o le fuafuaga ma talitonu o le a i ai se aso o le a mafai ai ona e toe faatasi ma lou tina ua maliu. Ia iloa o lou tina o loo i le lalolagi o agaga ma o loo ia faatalitali mai mo oe.

O lo‘u tina na ma’i i le kanesa i le lua tausaga talu ai. Ou te lei fiafia e vaai atu i lona tiga, ma sa ou moomoo maimau pe ana mafai ona ou fesoasoani. Ma e ui lava ina amata ona manuia lo‘u tina, sa avea o se aafiaga faigata. Ua i ai lou tina i se nofoaga lea o le a ia le lagonaina ai le tiga po o le mafatia. E faigata le le toe vaai ia te ia, ae e le o tuua na o oe. O le a ia alofa pea ia te oe, ma o lo tatou Tama Faalelagi o le a i ai pea iina e siitia ai oe pe a e faanoanoa. O le a le lafoaia lava oe. Sa puapuaga Iesu Keriso mo tiga o le lalolagi; Na te silafia ou lagona ma mea o loo tutupu ia te oe. Fai e pei ona ou faia i taimi o tofotofoga: alu atu ia te Ia ma o le a Ia faamamaina au avega.

Na maliu lo‘u tina ina ua faatoa 12 o’u tausaga. I le taimi lena e le o au o se tagata o le Ekalesia. Ina ua ma‘i o ia, sa ou tatalo i le tele o taimi ina ia toe manuia lo’u tina. Sa tele lou faatuatua, ma sa ou faalagolago i le Atua i le faamoemoe o le a toe atoatoa lona soifua maloloina. O le mea e faanoanoa ai sa lei toe manuia o ia. Sa ou fesiligia pe aisea sa tatau ai ona ia maliu ao talavou lava ma tuua ai au a o ou talavou pea. Sa ou ita ma na oo i le tulaga lea sa ou le talitonu ai faapea sa i ai se Atua. O lea ua avea nei au ma se tagata o le Ekalesia, sa ou malamalama i le fuafuaga o le faaolataga. Ou te iloa o loo ia faatalitali mai mo a‘u ma o le a toe faatasia lo matou aiga.

O lo‘u tina na maliu i le tolu tausaga ua mavae. O la oulua sootaga ma lou Tama Faalelagi ma le Faaola o le a faatupulaia pe afai e te vaai atu ia te i Laua i ou taimi faigata. O le a e iloa ai o lenei tofotofoga, po o le a lava le ogaoga, e mafai foi ona avea o se faamanuiaga. Tatalo i lou Tama oi le Lagi mo le filemu ma le faamautinoaga. Faalagolago i le fuafuaga a le Alii mo oe. Taliaina faapea o le Tama Faalelagi e silafia le mea o loo tatou i ai ma mea tatou te manaomia ina ia oo ai iina. E alofa le Alii ia te oe ma e finagalo ia e maua le olioli. O o tatou luitau ua fuafuaina e aoaoina i tatou ma faamalolosia ai i tatou.

Na maliu le tina o lo‘u tina ina ua 17 tausaga o lo’u tina. Na anapopogi le aiga ma tatalo mo ia mo ni nai vaiaso a o lei maliu o ia. Sa tuuina atu foi ia te ia se faamanuiaga faaleperisitua. O le mea autu na aumai ai le filemu i lo‘u tina o le iloa lea o le a mafai ona ia toe vaai i lona tina i le olaga a sau. O le sini a lo‘u tina o le ola ai i lona olaga, ina ia agavaa o ia mo lena faamanuiaga. Ou te faanoanoa o le a le mafai lava ona ou feiloai ia te ia i lenei olaga atoa, ae ou te tulimatai atu i le taimi o le a ma feiloai ai mulimuli.