Sa Saunoa Mai ia te Au Sister Spafford

Sa ou taalo i se taaloga o le faleaiga i le initoneti i le tuneva o se tasi po ae savali ane lo‘u toalua ma faailoa mai o le a alu e moe.

“O le a ou alu atu nei lava,” sa ou fai atu ia te ia.

“O le a ou talitonu i ai pe a ou vaai i ai,” o lana tala lea.

Sa ou taalo i se taaloga lea ou te kuka ai meaai e faafoliga i se faleaiga e faafoliga mo ni tagata e faafoliga. Sa ou tilotilo atu i le lau o le komepiuta ma fai atu, “O le mea Moni, e i ai ni meaai e oo mai i le isi 15 minute.”

Ina ia faapasi le taimi a o ou faatalitali, sa ou aumaia i luga le Afafine i Lo‘u Malo: O le Talafaasolopito ma le Galuega a le Aualofa, lea sa taatiatia i luga o le kesi talu ona ou mauaina i le Aualofa. Sa amata ona ou faitauina le faatomuaga. I le itulau lona tolu sa ou maua ai le saunoaga lenei a Belle S. Spafford, le peresitene aoao lona iva o le Aualofa.

“O le tamaitai averesi i le taimi nei, ou te talitonu,” na ia tusia, “o le a lelei pe a iloiloina mea e fiafia i ai, iloilo gaoioiga e punouai ai, ona faia lea o laasaga e faafaigofie ai lona olaga, faamuamua mea e taua, tuu le faamamafa i le mea e silisili ona tele ai faamanuiaga ma sili ona tumau, ma taofia ai ia lava mai gaoioiga e le manuia” (2011, xiii).

E ese mai i tusitusiga paia, e lei i ai lava se mea ua ou faitauina muamua na ou matuai ootia ai lava. O lenei tamaitai o le na maliu i le silia ma le 30 tausaga ua mavae sa tautala mai ia te au. O ana upu e ono sili atu ona talafeagai i aso nei nai lo le taimi sa ia saunoa mai ai.

Sa ou iloaina vave lava o le a ou le toe faia lava ni taaloga i le initoneti. Sa ou tapeina le komepiuta, alu i le moega, ma ta‘u atu i lo’u toalua la‘u filifiliga. O le aso na sosoo ai ou te lei kiina lava le komepiuta. Nai lo lena, sa ou faitauina le tele o itula sa ou faamaimauina i luga o na taaloga i aso uma.

Sa ou faateleina le tolu itula i le aso i le 365 (aso i se tausaga) ma vaevaeina i le 24 (itula i se aso). Sa ou ofo i le iloaina sa ou faamaimauina ia aso e 45.62 i le tausaga. O na itula taua ma aso ua mavae atu e faavavau. Sa tatau ona ou faaaluina e faitau ai au tusitusiga paia, faaaluina le taimi faatasi ma lo‘u toalua ma la’u fanau, auauna atu i isi, po o le faalauteleina o o‘u valaauga.

E masani lava ona talanoaina lenei mataupu e le Au Pulega Aoao i taimi o konafesi aoao. Ae e lei i ai lava se uiga, ma sa ou manatu sa le faatatau ia te au.

Ou te faafetai na fesoasoani mai le Agaga Paia ia te au ou te iloa ai o le Au Pulega Aoao—ma Belle S. Spafford—sa saunoa mai ia te au.