Savali a le Au Peresitene Sili
Faauma ma Lau Sulu o Loo Mumu Pea
Saunia e Peresitene Dieter F. Uchtdorf
Fesoasoani Lua i le Au Peresitene Sili
Ata na pueina e Comstock/Stockbyte/Thinkstock
I Eleni anamua, o tagata tamomoe na tauva i se moligafua e taua o le lampadedromia.1 I le tuuga, e uu e tagata tamomoe se sulu i o latou lima ma pasi atu i le tagata tamoe na sosoo ai seia oo ina kolosi e le tagata mulimuli o le au le laina o le tini.
O le taui e le tauaaoina atu i le au na sili ona televave le tamoe—na tauaaoina atu i le vaega muamua e oo atu i le laina o le tini ae o loo mumu pea le sulu.
O loo i ai se lesona maoae iinei, lea na aoao mai e perofeta anamua ma aso nei: e ui e taua le amata i le tuuga, e sili atu ona taua le faauma ma le sulu o loo mumu pea.
O Solomona na amata o Malosi
O le Tupu maoae o Solomona o se faataitaiga o se tagata na amata o malosi. A o talavou, sa ia “alofa ia Ieova, na savali foi o ia i poloaiga a lona tama o Tavita” (1 Tupu 3:3). Sa fiafia le Atua ia te ia ma fetalai mai, “pe sea se mea ou te avatua ia te oe” (1 Tupu 3:5).
Nai lo le manao atu mo oa po o se olaga umi, na ole atu Solomona mo “se loto matala ina ia faamasino e ia i lou nuu, ma ia masino ai i le lelei ma le leaga” (1 Tupu 3:9).
O lenei mea na fiafia tele ai le Alii ma na Ia faamanuiaina Solomona e le gata i le poto ae faapea foi i le tamaoaiga e le mafuatiaina ma se olaga umi.
E ui o le mea moni lava na matuai poto lava Solomona ma sa faia le tele o mea maoae, ae sa le‘i faaumaina i le malosi. O le mea e faanoanoa ai, mulimuli ane i lona olaga, “ua amioleaga Solomona i luma o Ieova, ua le matua mulimuli atu o ia ia Ieova” (1 Tupu 11:6).
Faaumaina o La Tatou Lava Tuuga
Pe faafia ona tatou amataina se mea ae le faaumaina? Fuafua meaai? Polokalama Faamalositino? O tautinoga e faitauina tusitusiga paia i aso taitasi? O faaiuga e avea ma soo e sili atu ona lelei o Iesu Keriso?
E faafia ona tatou faia filifiliga ia Ianuari ma tuliloa i latou ma le naunautai ua aasa le mumu mo ni nai aso, o ni nai vaiaso, po o ni nai masina ae tei ane ia Oketopa, o le mu saesae o la tatou tautinoga ua sili laitiiti atu lava i lo le lefulefu malulu?
I se tasi aso sa ou vaai ai i se ata malie o se taifau o taotooto i autafa o se fasi pepa sa ia saesae niniiina. Sa faitauina faapea, “Tusi Faamaonia o le Aoaoina o Taifau Usiusitai.”
Tatou te faapena i nisi taimi.
Ua ia i tatou ni faamoemoega lelei; tatou te amata malosi; tatou te mananao e avea mani tagata e sili ona lelei. Ae i le iuga, tatou te tuua ai a tatou filifiliga ua saesae niniiina, ua lafoaia, ma ua faagaloina.
O le natura o le tagata o le tautevateva, toilalo, ma o nisi taimi e manao e aluese mai le tuuga. Ae i le avea ai ma ni soo o Iesu Keriso, ua tatou tautino atu e le gata ina amata le tuuga, ae ia faapea foi ona faauma—ma faauma ao mumu saesae pea lo tatou sulu. Na folafola atu e le Faaola i Ona soo, “O le tumau seia oo i le gataaga, e faaolaina lea” (Mataio 24:13).
Sei ou toe faaupuina le mea na folafola mai e le Faaola i o tatou aso: Afai tatou te tausia Ana poloaiga ma faauma ma la tatou sulu o loo mumu pea, o le a tatou maua le ola e faavavau, o le meaalofa sili o meaalofa uma a le Atua (tagai i le MF&F 14:7; tagai foi i le 2 Nifae 31:20).
O le Malamalama e le Mate Lava
O nisi taimi pe a mavae ona tautevateva, toilalo, po o le fiu foi, tatou te lotovaivai ma talitonu o lo tatou malamalama ua mate ma o la tatou tuuga ua leai se mea. Ae ou te molimau atu o le Malamalama o Keriso e le mafai ona matineia. E susulu i le po aupito sili ona pogisa ma o le a toe faamalamalamaina ai o tatou loto pe afai na ona tatou liliu atu o tatou loto ia te Ia (tagai i le 1 Tupu 8:58).
Tusa lava pe fia taimi po o le a le mamao tatou te pauu ai, o le Malamalama o Keriso e mumu saesae pea. E oo lava i le tuneva o le po, pe afai tau lava o lo tatou laa atu ia te ia, o Lona malamalama o le a faaumatia ai le ata lafoia ma toe faaolaina o tatou agaga.
O lenei tuuga o le avea ma soo e le o se tuuga momoe; o se malafoni. Ma e faia ai sina eseesega laitiiti pe o le a le saoasaoa tatou te o ai. O le mea moni, pau lava le ala e mafai ona tatou faiaina ai i le tuuga o le iu lea ina fiu ma faamaamulu.
Pe a tatou faaauau pea ona tulai i luga ma agai atu i lo tatou Faaola, tatou te manumalo ai i le tuuga ma a tatou sulu o loo mumu saesae.
Aua o le sulu e le o i tatou, po o mea tatou te faia.
Ae o le Faaola o le lalolagi.
Ma o se Malamalama lena e le mafai ona faaitiitia. O se Malamalama e faaumatiaina le pogisa, faamaloloina o tatou manua ma mumu saesae e oo lava i le lotolotoi o le faanoanoaga ogaoga ma le pogisa e le mafuatiaina.
O se Malamalama e sili mamao atu i malamalamaaga uma.
Tau ina ia tatou faauma taitoatasi le ala na tatou amataina. Ma faatasi ai ma le fesoasoani a lo tatou Faaola ma le Togiola, o Iesu Keriso, o le a tatou faaumaina ma le fiafia ma a tatou sulu o loo mumu pea.