Auaunaga i le Ekalesia
Pe na Lava Mea na Ou Faia?
E alala le tusitala i Iuta, ISA.
O se lesona e uiga i le mamoe na se na fesoasoani ia te au e malamalama ai i le auala e sili atu ona faataunuu ai lo‘u valaauga.
Ata uma na tusia e Mike Boyland/iStock/Thinkstock ma Oleksiy Fedorov/Hemera/Thinkstock
I le 23 o tausaga, sa valaauina au o se peresitene o le Aualofa i la matou uarota a tamaiti aoga ua faaipoipo. Ou te manatua le le atoatoa sa ou lagonaina, faatasi ai ma le manao e faia le mea sili ou te mafaia. Sa ou naunau ma le fiafia e auauna atu ae sa masalosalo i lo‘u gafatia e avea ma se taitai lelei.
Ina ua mavae ni nai masina o peresitene o le Aualofa, sa ou lagonaina e le o lava mea na ou faia. Sa ou manao ina ia mafai ona fesootai ma uso ma faalogo i o latou manaoga taitoatasi, ae sa ou lagonaina sa ou le mafaia.
Sa ou talanoa ma lo‘u epikopo ma faailoa atu ou atugaluga. Sa ou faamatala atu lou le mafai ona oo atu i uso uma sa ou manao ai. Sa ou faamatalaina lou moomooga pe ana lima ni ou tagata e fai ai le galuega i le auala na ou manatu e tatau ona fai ai. Sa ou taumafai e faamama o‘u atugaluga ma faamalie, ae sa vave ona tumu ou mata i loimata o le lotovaivai. Sa ataata o ia ma ofo mai nisi o fautuaga sili faaletaitaiga ua ou maua.
“Pe e te masani i le tala i le leoleo mamoe na, leiloa se tasi o lana lafu, na tuu le ‘le ivasefulu ma le iva’ ina ia maua ai?” na ia fesili ai (tagai i le Luka 15:4–7). Sa luelue lo‘u ulu.
“E foliga mai o loo i ai le poto tele i lena faataoto,” sa ia faaauau ai. “Na iloa e le leoleo mamoe o le ivasefulu ma le iva o le a lelei mea uma pe afai na te tuua i latou ae saili mo le mamoe na se.”
Ona ofoina mai lea e lo‘u epikopo le fautuaga lenei:
“Vaai oe, o le ivasefulu ma le iva ua i ai se ala sili e tausia ai e le tasi le isi pe a e alu ese. O le a latou sapai e le tasi le isi ma galulue faatasi ma le manuia. Ou te fautua atu e te taulai atu i e e foliga mai ua leiloloa. O le vaega o totoe o le a le afaina.”
Sa ou lagonaina se molimau malosi o le mea na ia tau mai ia te au e moni, ma ou te le manaomia le popole e uiga i le lafu mamoe atoa i lea lava taimi. O lo‘u faamoemoega o le saili lea o i latou o e na leiloloa, ma valaaulia i latou e toe foi mai i le lafu. I lena auala, e mafai ona faataunuuina faamoemoega a le Tama Faalelagi, ma mafai ona avea au ma se meafaigaluega i Ona aao.
Ao ou faalogo i fautuaga a le epikopo, sa ou lagonaina se fuataga maoae o le malamalama i le ala a le Alii mo au e auauna atu ai i Lona malo. Sa ou maua foi ni taunuuga faaleagaga na faamalosia au i lo‘u valaauga, aua sa ou auauna atu e pei ona sa faatonuina e le Faaola. E ala mai le mana o le Agaga Paia, na tuuina mai e lou epikopo ia te au se meaalofa sili o le malamalama ma se vaaiga.
Ou te molimau atu a o tatou tatalo ma saili atu i musumusuga mai o tatou taitai perisitua, o le a musuia i latou e faaali mai ia i tatou pe faapefea ona taitai i auala amiotonu.