Mauaina o le Fesoasoani
E alala le tusitala i Iuta, ISA.
Ua mavae le vaeluapo, ae na iloa e Tate ua oo i le taimi e talanoa ai.
“Heav’nly Father, now I pray, guide and guard me ev’ry day” (Children’s Songbook, 19).
Sa taotooto Tate ma mataala i le pogisa, ma tautaofiofi ona loimata. Sa ia tatalo mo se fesoasoani, ae na foliga mai e pei o se ao uliuli mamafa o loo i ona luga, ma tapunia ai le Agaga.
“Ae faapefea pe a ou le faagaloina lava lena ata matautia o le TV?” sa ia popole ai.
I ni nai aso talu ai, na vave uma lana meaaoga ma na ia kiina ai le TV. Ae na te lei faamoemoeina e vaai i se mea faapena i luga o le lau. Sa faateia tele Tate na galo ai ona tape le televise i le vave e pei ona sa tatau ona ia faia.
O se mea na tupu faafuasei. Na te lei faamoemoe e matamata i se vaaiga faapena, ae o lenei ua le mafai ona galo ia te ia. O nisi taimi e oo mai i lona ulu i le ogatotonu o le aoga, i le laulau ai—e oo lava i le lotu. I taimi faapena, sa fiafia o ia e le mafai e Tina ma Tama ona faitau lona mafaufau. Na aoaoina Tate e ona matua e aua le vaai i ata o tagata e leai ni lavalava o faia. Sa ia iloa foi ua latou faamoemoeina o ia e aloese ai mai ata faatupu faalavelave o le TV, ata tifaga, ma taaloga vitio.
“O lea la ua ou iloa le mafuaaga,” le memumemu a Tate ia te ia lava.
Na oso ese Tate mai le moega ma toe tootuli. O le a se mea e mafai ona ia faia?
“Le Tama Faalelagi,” o le musumusu lea a Tate. “Faamolemole fesoasoani mai ia te au e taofi le mafaufau i mea na ou vaaia.” Sa ia soloiesea loimata na tumu ai ona mata ma faalogologo. Na televave le tata o lona fatu. Sa ia manatu na ia lagonaina le Agaga Paia ua uunaia o ia, ae e le o le tali lea sa ia manao ai.
E tatau ona ia ta‘u atu i ona matua.
“Aisea?” Sa mafaufau ai Tate. O le a ia lagonaina le pei o se pepe e alu i totonu o le potu a ona matua i le ogatotonu o le po. Ma ia faamatala ia i laua? Sa ia lagonaina le maasiasi ma toe ma‘i ai.
Ona oo mai lea o se manatu manino i lona mafaufau: E finagalo le Tama Faalelagi ia te ia ina ia fiafia. E finagalo le Tama faalelagi ia te ia ina ia toe lagona le Agaga, ina ia mafaufau e uiga i mea lelei, ma ia faamaoni i lona aiga. Ae maise lava sa finagalo o Ia ia Tate e avea ma se umia agavaa le Perisitua Arona, ina ua atoa lona 12 i ni nai masina. Na iloa e Tate, afai sa ia taofi mau i mea na ia vaaia ma tausia faalilolilo, o le a ia tumau i le le fiafia i ai.
Na iloa e Tate sa ia manaomia se fesoasoani—ma sa ta‘u atu e le Agaga Paia ia te ia le mea e maua ai.
Sa tilotilo atu Tate i le numera susulu o le uati faafuainumera i autafa o lona moega. Toeitiiti ta le 1:00 i le vaveao. Sa ia tu i luga ma agai atu i le alasavali pogisa e agai atu i le potu a ona matua. Ma le foloina ma le popole, sa ia tuitui ai i le la faitotoa.
“Tina? Tama?”
“Tate, o oe lena?” na faapea mai ai le leo fiamoe a Tina.
“O i ai se mea ua tupu?” o le fesili lea a Tama.
“Ioe,” o le tala lea a Tate. “E mafai ona tatou talanoa? Ma atonu e mafai ona ou maua se faamanuiaga?”
Na ki e Tama le moli o lona moega ma valaaulia Tate i totonu. Mo le taimi muamua i le tele o aso, sa lagona ai e Tate le mafanafana, faamoemoe, ma le malamalama.