Maukeni po o Meleni?

Ata

illustration of a pumpkin on a vine

Ata na tusia e Carolyn Vibbert

Sa fai lava si faateia o lou tama i le iloaina o fatu maukeni na ia totoina i le tausaga ua mavae na filifili e totogo mai i le ogatotonu o le vaega o meleni i lenei taumafanafana. O meleni ua ola lelei lava—ae faapena foi maukeni. O lenei la, o le mea moni, sa faaosoosoina lou tama ina ia tuu atu i laau o maukeni e faaauau pea ona feola. Ae sa ia iloa pe afai na te faia o lea, o maukeni o le a faalavelave i le tutupu ae o meleni.

O lea sa i ai sana filifiliga e fai. Sa mafai ona ia vele ese maukeni ina ia maua ai e meleni se avanoa e sili atu ona lelei e ola lauusiusi ai po o le tuu o maukeni e ola pea ae ia tuu atu i laau maukeni e tutupu ae ma vaavaai ao latou ono faavaivaia laau o meleni, lea atonu o le a aumaia ai ni fua e itiiti ifo mai laau uma e lua. Maukeni po o meleni? O lenei filifiliga sa i le va o filifiliga lelei e lua.

I le fuaina o le lua, sa filifili ai lo‘u tama e vele ese laau o maukeni o loo ola lauusiusi. E le gata ina ua tuai ona totogo mai, ae sa filifili o ia, na ia manao i meleni na fuafuaina e sili atu nai lo lona manao i maukeni taufaate‘i.

O lenei aafiaga na uunaia ai au ou te manatu e uiga i filifiliga tatou te faia, ae maise lava i lo tatou sootaga ma isi. Pe faatasi ma o tatou aiga, a tatou uo, o tatou pule, po o i latou tatou te tafao faamasani pe faaipoipo i ai, pe afai o se filifiliga i le va o ni mea lelei se lua, o le iloaina o le mea sa‘o po o le vaega e sili ona lelei e faigata i nisi taimi, ae maise lava pe a tatou mananao e aloese mai le faia o filifiliga sese. O le fefe i le faia o filifiliga sese o nisi taimi e taia ai i tatou, ma o lena fefe e mafai ona taofiofia ai i tatou mai le agai i luma i le faatuatua. Ae o le mea moni lava, o nisi taimi e leai se filifiliga sese. Ua na o se filifiliga. I le tulaga o lo‘u tama, na faavae lana filifiliga i mea na sili ona ia faatauaina. Na le fiafia o ia e vaai atu i maukeni ua pepe, ae sa ia iloaina o le a ia salamo i le leaga o le a latou faia i meleni mulimuli ane.

I le olaga, o nisi o filifiliga tatou te feagai e le afaina, e pei, o a meaai e tatau ona ou aia mo le aiga o le taeao? O le a le lanu o le ofu e tatau ona ou ofuina i le aso? Pe a feagai ma se filifiliga i le va o ni mea lelei se lua, e mafai ona tatou faia e pei ona faia e lo‘u tama ma fesili vave lava, “O le a le mea e sili atu lou faatauaina?” Ona fai lea o se faaiuga ma agai i luma i le faatuatua, ma faalagolago i le Alii e faasa‘oina i tatou pe afai tatou te sese i se isi itu.

Ae o nisi o filifiliga e taua tele lava. Sa saunoa peresitene Thomas S. Monson: “E tatau lava ona tatou faia pea lava pea o faaiuga. Ina ia poto, e manaomia le lototoa—le lototoa e fai atu ai leai, le lototoa e fai atu ai ioe. O faaiuga e fuafua ai le taunuuga” (“O R e Tolu o Filifiliga,” Liahona, Nov. 2010, 68). Pe a feagai ma nei ituaiga o filifiliga, o se fesili e sili atu ona lelei e fai atu, “o le a le mea e sili atu le faatauaina e le Alii?” Afai tatou te iloa le tali i lena fesili, pau le mea e tatau ona tatou faia o le faaogatusa o tatou ma Ana tulaga faatauaina ona mulimuli lea i lena filifiliga. O le a avea pea lava pea ma filifiliga sa‘o.