Tatalo mo Lo‘u Ala i Rotuma
John K. Muaror, New South Wales, Ausetalia
(Ua maliu le tusitala.)
Ata na tusia e Allen Garns
“Na malaga ese atu le Westerland ananafi,” na fai mai ai lo‘u tuafafine faaletulafono a o ia faafeiloaia i matou i le malae Vaalele Faavaomalo o Nadi i Fiti.
Sa ou faanoanoa ma le fiafia i le tala. O le MV Westerland o le vaa lea sa tatau ona ave ai i matou e vaai lo‘u uso matua i le Motu o Rotuma. O Rotuma pe tusa ma le 375 maila (600 km) i matu i sisifo o Viti Levu, le motu e aupito tele o Fiti. Afai e te misia le vaa, e tele lava ina e faatalitali i ni aso po o ni vaiaso mo le isi vaa e sosoo ai.
O se tausaga na muamua atu na ou alu ai i Rotuma e fesoasoani i lo‘u uso e faafou le fale o lo matou tina matua, ma sa ou tuua ai o ia ona o se feeseeseaiga e faatatau i le galuega. O lenei ua ou fia vaai ia te ia faafesagai ma ta‘u atu ia te ia ua ou matuai salamo lava.
I le vaiaso ae ma te lei felelei atu i Fiti, ma lo‘u toalua o Akata, mai Ausetalia, na tau mai ia te au e si o’u tei o le Westerland o le a alu i Rotuma i le aso e sosoo ai ma le aso na fuafua ma te taunuu atu ai. Sa vave lava ona ou valaau i le ofisa o le vaa ma aioi atu ia i latou e tolopo le malaga mo aso e lua.
“Leai, matou te le mafai e tusa lava pe matou te mananao i ai,” na tali atu ai. “O le Aufono o le Motu o Rotuma o loo faia ni sauniuniga mo se aiga faafeiloai, ma e manaomia e le vaa ona alu ese atu e pei ona faatulagaina.”
Sa oso mai se manatu i lo‘u mafaufau, ma sa ou filifili e anapogi ma tatalo.
“Tama Faalelagi pele e,” sa ou tatalo ai, “ou te matua manao ia maua lena vaa i Rotuma. Ou te talitonu e le mafai ona latou taofia le malaga ese atu mo se isi aso pe lua, ae ua ia te Oe le mana e fai ai. Pe mafai lava faamolemole ona E aveese se nati lava se tasi i soo se mea i luga o le vaa ina ia mafai ai ona taofia le malaga ina ia mafai ai ona ou malaga? Ou te manaomia ona ou alu i Rotuma ma faalelei ma lo‘u uso.”
Ina ua ou faalogo i le tala faanoanoa, sa matou o atu i le uafu i le isi itu o le motu. O iina, e ui i lea, na matou iloaina o le vaa na i ai se faafitauli i le afi ma e le‘i tuua lava. Sa tali mai le Tama Faalelagi i la’u tatalo! O le mea na tupu, o le afi atoa—ae le na o se nati se tasi—na tatau ona aveese ina ia faalelei ai se faafitauli tele o le suauu ua liki.
Ina ua iu lava ina ua malaga ese le vaa i se vaiaso mulimuli ane, sa ou i ai i luga. Ina ua ou taunuu i Rotuma, sa ou opo mai lo‘u uso ma faatoese i ai, ma na toefuatai mai le ma mafutaga. Na mautinoa lava o se aso o le olioli.
O le a faavavau lava lou faafetai i lenei aafiaga faaleagaga matagofie ma le talalelei toefuataiina a Iesu Keriso. O se molimau o loo tutupu pea vavega i le taimi nei, o loo soifua le Tama Faalelagi ma tali mai i a tatou tatalo faamaoni, o le tatalo ma le anapogi e o faatasi, ma e moni le talalelei—e oo lava i se nuu laitiiti i luga o le motu laitiiti o Rotuma.