Bae Mi Stap Laet blong Yu

Lod i tingbaot oltaem ol wokman blong Hem mo bin mekem ol komitmen long olgeta. Hem i bin mekem ol komitmen ia tru ol kavenan.

Long Josua, Lod I talem, “. . . olsem we mi bin stap wetem Moses, semmak bae mi stap wetem yu; bae mi no save ronwe o fogetem yu. Stap strong mo gat strong tingting.”

Long famli blong Lihae, taem we oli bin wokbaot i go long promes graon, Lod i talem, “Bae mi stap wan laet blong yu long drae ples . . . bae yu save se mi ia nao mi bin lidim yufala.”

Tedei long Pasifik Eria yumi gat ol Lihae mo Josua blong taem blong yumi tedei we oli kam blong tingbaot ol gud samting mo ol blesing blong Lod long ol laef blong olgeta blong bifo mo blong tedei. Olsem we i stap se “blong tingbaot i wan saen blong stap talem tangkyu”. Truaot long Eria blong yumi, yumi bin invaetem ol senia kapol blong kam mo givim seves long ol pat blong Pasifik long ol ples we Jos i stap long wan level we i stap gro yet.

Long olgeta we oli bin stap givim mo gohed blong givim seves, hem i wei blong givimbak long ol nara man we oli jes niu mo konvet i kam long Jos. Ol kapol misinari ia taem oli stat blong kam long Jos i bin longtaem, taem ol misinari blong Amerika i bin kam blong tijim ol olfala blong olgeta we oli bin akseptem gospel. Ol fasfala olfala long aelan we oli bin konvet, blong fastaem oli no save gud niufala fet ia we oli gat, semmak olsem olgeta we oli niu nomo tedei long Jos we i stap gro yet. Naoia yumi singaotem ol senia kapol long taem blong yumi tedei we oli kam long Jos we i stanap finis blong kam mo helpem mekem ol brata mo sista blong olgeta i kam strong moa insaed lon ol jos we oli stap gro yet. Mo tu, oli stap “givim laet”. Spirit blong Lod bae i testifae tru ol eksampol blong olgeta, se hem i tru long paoa blong Lod we i lidim olgeta.

Ol Senia kapol misinari oli stap mekem samting i defren taem oli yusum ol eksperiens blong olgeta mo tijim ol memba blong Jos we i stap gro yet long olsem wanem blong kondaktem Jos, mo olsem wanem blong praktisim gospel long evri dei laef blong olgeta. I gat wan andastaning long saed blong kalja wetem ol pipol long ol ples olsem Papua Niu Gini, Ol Solomon Aelan, Vanuatu, Ol Marsol Aelan mo Kiribati. Ol kapol ia we oli stap givim seves oli kam long Samoa mo Tonga, semmak olsem Ol Man Samoa mo Tonga we oli stap long Amerika, Niu Silan mo Ostrelia. Mifala i bin gat wan brata blong Papua Niu Gini mo waef blong hem we oli bin go long misin.

Tingting long ol testemoni blong ol kapol ia, we oli bin givim seves, o oli stap givim seves long wan misin naoia:

“Tu yia misin blong mifala long ol Aelan blong Solomon i bin wan long ol top eksperiens we mitufala i bin gat tugeta long laef blong mitufala, . . . we i bin helpem mitufala blong kasem wan strong testemoni . . . blong andastanem lav blong Papa blong yumi long Heven mo Sevya blong yumi we Tufala i gat long yumi mo evri pikinini blong Hem. Mitufala i bin filim se mitufala i kam yangfala bakegen, mo kam strong moa, mo “wokbaot mo ae i no dak”. Mitufala i bin witnesem ol merikel mo han blong Lod long ol laef blong mitufala mo long ol laef blong ol Sent long taem we wok i stap kam antap”. —Brata Viiga mo Sista Lupe Fuimaono, Pesega Samoa Stek

“Blong plante yia, mi bin givim seves anda long daereksen blong defdefren stek presiden olsem wan stek klak. Save mo eksperiens we mi bin kasem, i bin mekem mitufala i rere blong givim seves mo helpem ol prishud mo okseleri lida long Daru Papua Niu Gini Stek. Mitufala i luk hemia olsem wan blesing. Blong givim seves long Lod wetem kompanion blong mi we i no save finis Sista Taala, I oltaem wan blesing”. —Brata Lames mo Sista Loreta Taala, Pago Pago Samoa Wes Stek

“Seves blong mitufala long Papua Niu Gini i gat wan big mining long mitufala, speseli blong Brata Jackson, olsem wan manples blong kantri ia. Seves blong mitufala i bin wan strong tingting blong wantem gobak long PNG blong talemaot gospel ia we i kambak blong Jisas Kraes long ol famli mo pipol blong mifala. Blong werem ol misinari nemtag evri dei i givim mitufala moa bigfala paoa blong fet mo hop . . .” —Brata Pita mo Sista Serena Jackson, Eit Mael Plen Ostrelia Stek

“Tangkyu blong mekem se ol gudfala kapol ia i kam mekem misin long PNG. Oli bin stap ol bigfala help blong developem Jos mo mekem ol memba long ples ia oli kam strong moa. Oli bin wok olsem ol lida, ol advaesa, ol trena mo ol tija long ol branj mo wod blong olgeta. Oli helpem tu ol fultaem Elda blong givhan long tugeta, ol non-memba mo ol lesaktiv memba blong kambak fulwan long aktiviti. Olsem wan ansa, mi stap luk namba blong atendens long sakramen i kam antap. Ol sista oli stap help long Praemeri, Yang Woman mo Rilif Sosaeti, blong mekem ol okseleri ia oli kam strong moa”. —Misin Presiden Finau Hafoka, Papua Niu Gini Port Moresbi Misin

Tru seves blong olgeta, ol misinari kapol blong yumi oli stap stanemap Jos. Oli wei ia nao, we Lod, tru long olgeta, i givim laet blong gospel blong Hem long wan pipol mo wan kantri. Oli planem ol sid long ol gudgud hat mo maen. Promes blong Lod i tru, “Bambae [Hem i stap] long raet han blong [olgeta], mo long lef blong [olgeta], mo Spirit blong [Hem] bambae i stap insaed long hat blong [olgeta], mo bol enjel blong [Hem] oli stap raonem [olgeta], blong sapotem [olgeta]”.