Wan Drim I Kamtru

Maria Kupun Mael, we i bon long Papua Niu Gini i oltaem drim blong kasem wan yunivesiti digri be i no bin save olsem wanem blong mekem drim ia i kamtru. Hem i fesem jalenj long saed blong mane, wetem sam nara samting moa we i mekem edukesen wan rod we i had blong folem, be ol samting i bin stat blong jenis taem hem i bin joenem Jos blong Jisas Kraes blong Ol Lata-dei Sent long 2004.

Long nekis eit yia afta, Maria i bin givim seves long wan fultaem misin long Vanuatu, afta hem i bin maredem hasban blong hem Luk Robert Mael mo gobak long Vanuatu mo statem wan famli longwe. Truaot ol samting ia, drim blong hem blong kasem wan digri i neva lus.

“Mi oltaem prea from samting ia. Mi bin save se wan dei bae drim blong mi i kamtru” hem i talem.

Long 2012, Maria i bin mitim wan senia Edukesen sista misinari blong Niu Silan we nem blong hem I Ruth Maha. Ruth i bin givim long hem wan aplikesen fom blong Perpetual Education Fund blong Jos. Sista Maha i bin talem long Maria se bae hem i save kasem sapot tru long mane basket ia mo save kasem digri blong hem.

Pepetuol Edukesen Fand (PEF) lon program blong Jos blong Jisas Kraes blong Ol Lata-dei Sent i bin helpem ol memba blong Jos blong save kasem edukesen. Program ia i bin blesem laef blong 90,000 man o moa olsem Maria—raon long wol—stat long taem we i bin stat long 2001.

Wetem help blong PEF, Maria i bin joenem Yunivesiti blong Saot Pasifik Emalus Kampas long Vanuatu 2013. Afta we hem i drim blong plante yia, Maria i kasem stat blong rod blong hem, be long rod blong hem ia i bin fulap wetem plante hadtaem.

Maria i bin bonem nambatri pikinini blong hem taem we hem i stap traehad from digri blong hem. Hem i bin tekem fo kos long wan semesta, we i “no bin isi nating,” hem i talem.

Plante taem bae hem i wokbaot i go long ol klas blong hem, wan aoa i go mo kambak, blong no tekem bas mo save sevem mane blong ol pikinini blong hem oli no save hanggri.

Samfala fren mo famli oli agensem tingting ia blong Maria blong go long skul, mo stap talem long hem se hem i nidim blong stap long haos mo lukaotem gud famli blong hem. Ol toktok ia i bin mekem Maria i harem nogud be hem i no wantem givap. Hem i bin tanem hem i go long Lod tru prea blong kasem kamfot. Tru long Tabu Spirit, hem i faenem tras se hem i save mekem; blong gat tras long hemwan, hem i gohed long rod blong hem blong skul.

Saeklon Pam i bin kasem Vanuatu long 2015 mo damejem haos blong Maria mekem se hem i nogat haos blong wan wik.

“Evri kos buk blong mi oli bin damej,” Maria i talem.

Wetem tingting ia blong no givap, hem i bin askem blong yusum fastaem ol buk long laebri mo gohed wetem ol stadi blong hem. Maria i no bin gat intanet long haos blong hem, mekem se hem i yusum intanet long skul blong mekem stadi mo blong daonlodem mo ridim ol not blong hem.

Wetem sapot we man blong hem i gohed blong givim, Maria i bin winim plante hadtaem. “Hasban blong mi i bin sapotem mi bigwan long ol stadi blong mi,” hem i talem, “nomata ol agens, hem i talem long mi blong neva givap. Hem i bin lukaotem gud ol pikinini taem we mi bin stap go long skul long ol klas blong mi mo blong sabmitim ol wok blong mi.”

Maria i faenem kamfot long ol toktok blong ol profet. “Ol Profet mo Ol Aposol oli tijim se edukesen i wan prinsipol we i no save finis,” hem i talem, “Elda Dieter F. Uchtdorf i talem: blong ol memba blong Jos, edukesen i no jes wan gud tingting—hem i wan komanmen.”

Maria i bin graduet long 30 Novemba 2018, faef yia afta we hem i bin statem ol stadi blong hem. Hem i bin kasem bajela digri blong hem long komes, mo mekem dabol meja long Manejmen mo Pablik Administresen, mo Sosioloji. Hem i plan blong gohed mo kasem masta digri mo wan PhD.

“Mi wantem stap wan gud eksampol blong ol pikinini blong mi long aelan ia.” Hem i talem. “I minim blong stap kwalifae, gat wan gud wok, kam moa indipenden mo givim seves long ol narawan. Mi biliv se Lod bae i provaedem wan wei blong mi kasem ol samting ia. Lod i wantem yumi blong gohed mo laef gud mo hemia yumi nidim blong gat fet long yumiwan, muv i go fored, winim ol hadtaem mo kasem ol drim blong yumi.”