“Mo Yufala I Mas Openem Maot blong Yufala Evri Taem”

Long ol eli eli taem blong moning, taem mifala i go sevem wan long ol eria blong Wod 1 long Port-Vila Stek, Vanuatu, mifala i kasem wan ples we pipol i stap wet long ol bas blong go long wok, skul, o maket.

Long medel blong olgeta, hem i Betty Tamata, wan memba blong Presbiterian Jos long wan paris we brata blong hem wan foma Praem Minista blong Vanuatu i bin bildimap wan japel we i tekem nem blong hem. Mifala i faenem hem tru long insperesen. Sam seken bifo hem i go long bas, wan tabu wok i kambak long maen blong mitufala”. . . yufala i mas openem maot blong yufala evri taem, blong talemaot gospel blong mi wetem noes blong stap glad” (Doktrin mo Ol Kavenan 28:16). Semtaem nomo, mi mo kompanion blong mi, i muv.

“Betty, yu laekem blong mitufala i save kam samtaem blong serem wetem yu mesej blong gospel we i kambak blong Jisas Kraes?”

“Mi wok long 7.30 long moning, mo kam hom let long evri dei,” hem i talem.

“Olsem mifala i save kam long 6 klok long moning?” Mitufala i askem.

“I oraet.” Hem i talem.

Hem i wan simpol storian nomo! Bae i save mekem wan jenis long laef blong wan.

Long haf pas faef hemia long nekis dei, mifala i stap wet finis long apoenmen blong mitufala wetem Betty. Taem hem i luk se mitufala i kam eli olsem, samting ia i bin tajem hat blong hem; mo hem i bin komitim hem blong stap long evri 6 klok aftenun apoenmen. Hem i bin prea, ridim Buk blong Momon, mo stadi ol buk we mitufala i bin givim long hem. Hem i gat kwestin evri taem we mitufala i visitim hem. Samtaem, bae hem i singaotem mitufala blong kam tijim hem moa sapos hem i no go wok. Tabu Spirit i bin stap wok wetem hem.

Taem ol man oli askem Betty from wanem hem i wantem kam memba blong Jos blong Jisas Kraes blong Ol Lata-dei Sent, hem i talem, “From se hemia i Jos blong Jisas Kraes, mo oli laef folem wanem we oli prijim.” Betty i mas krae evri taem we hem i serem ol filing blong hem abaot ol tijing blong gospel. Iven long wota blong baptaes, hem i bin krae plante. Hem i bin talemaot ol filing blong glad mo tangkyu taem hem i bin jusum blong sakem sin, folem Jisas Kraes mo kasem baptaes.

Taem wan wok i kam long Lod mo go long maen mo hat blong yumi, yumi mas mekem samting ia wetem fet. Smol mo simpol desisen blong mitufala blong folem Spirit mo toktok wetem Betty bifo hem i go long bas i lid i go long bigfala samting. Desisen blong Betty blong folem Spirit we i fulumap hat blong hem taem hem i stap lanem abaot Jos blong Jisas Kraes we i kambak we i lid i go long naesfala Satedei ia aftenun ia long Febwari 2019, we, mi mo kompanion blong mi i bin gat spesel janis ia blong witnesem taem we hem i bin mekem ol tabu kavenan ia long wota blong baptaes. I bin wan dei blong glad long heven mo long wol mo hemia from wan simpol aksen ia nomo blong openem maot blong mitufala.