Wan Laef we I Gat Blesing Tru long Gospel blong Jisas Kraes

Relijin i no wan niu samting long mi taem mi faenem Jos blong Jisas Kraes blong Ol Lata-dei Sent. Papa mo mama blong mi oli ol strong memba blong Angliken jos. Bubuman blong mi i bin wan hae pris mo anggel blong mi tu. Taem mi stap gro kam antap, mi bin atendem Katolik misin praemeri skul long Aelan blong Santo. Long taem ia we mi smol yet, mi bin atendem tugeta Angliken mo Katolik jos long defdefren taem. Long mi, olsem wan yang man, i luk olsem se ol jos oli semmak nomo.

Papa blong mi i stap bildim ol bot long Merelava aelan, mo mama blong mi i wan nes long Motalava aelan long Banks grup. Tufala i bin ol gudfala papa mo mama we oli bin tijim mi abaot Jisas Kraes, mo mi glad tumas from taem blong tufala long God we i kam wan sid blong fet we oli planem long hat blong mi.

Long 1993 taem mi gat 13 yia, mi bin mitim sam memba blong Bahai fet. Mi bin stap lukaotem trutok mo laekem wanem we mi faenem long jos blong olgeta. Mi joenem olgeta mo stap wan strong memba blong fet ia blong fo yia. Mi stap go long Bahai senta evri dei blong stadi. Nomata se oli no gat ful gospel ia, taem ia wetem olgeta i bin helpem mi lanem moa abaot Kraes mo i bin mekem mi rere blong mitim ol misinari; mi tingbaot taem mi bin luk olgeta blong fastaem.

Hem i bin long wan medel dei mo i bin hot. Mi bin luk tu yangfala man wetem ol waet sot we oli stap wokbaot raon long eria we mi stap long hem. Mi singaotem tufala, “Hey Momon Pasta, kam mo dring wota.”

Oli bin kam, mo glad long wota speseli long hot san ia, mo mifala i stat blong toktok. Mi oltaem biliv se Jos blong Jisas Kraes we Hem i bin stanemap long taem blong Hem i nomo stap long wol. Taem mi stap lisin long ol elda oli stap tokbaot Josef Smit mo restoresen blong gospel blong Jisas Kraes, i bin intresting tumas mo mi wantem save moa.

Oli bin givim mi wan kopi blong Buk blong Momon mo promesem mi se sapos mi ridim mo folem wanem we Moronae long Moronae 10:3–5 i talem, se bae mi kasem ansa long prea blong mi. Mi bin tekem jalenj ia mo mekem oli tijim mi ol misinari lesen taem we mi stap ridim Buk blong Momon semtaem. Spirit i bin fulumap evri pat blong laef blong mi truaot long taem ia. Mi bin gat wan filing blong pis mo glad blong save se Jos blong Jisas Kraes i bin stap bakegen long wol tedei mo mi wantem blong kam pat long hem. Mi bin baptaes long Septemba 1998 mo gohed blong luklukbak long yia olsem wan yia blong merikel.

Gospel i gohed blong blesem laef blong mi kasem dei ia tedei. Mi bin gat plante jalenj, i tru, be fet blong mi long Jisas Kraes i bin tekem mi go tru ol jalenj ia. Afta we mi bin rere blong go mo givim seves long misin long Fiji Suva Misin, mi bin wantem wan famli. Mi mas wet blong 13 yia blong waef blong mi. Hemia i bin wan hadtaem i tru, be mi bin kasem blesing wetem plante koling long branj mo distrik we i bin helpem mi stap strong mo mekem fet i kam antap. Taem mi kasem blesing ia blong mitim Mary Iata Kapalu long 2016, mi bin save se fasin blong mi blong wet long taem ia hem i no blong nating.

Mitufala i mared long Maj 2016 mo wan yia afta mitufala i bin sil tugeta long Suva Fiji Tempol. Long 2018 mitufala i welkamem fasbon gel blong mitufala i kam insaed long famli, Alfoncin Emy Rosflender.

Laef blong mi i fulap long blesing. Mi gat gospel, mi gat Sevya, mo mi gat wan famli we i no save finis. Mi glad mo talem tangkyu long ol misinari ia we oli bin wokbaot long hot san ia i kam mo givim mi Buk blong Momon.