Mi Lavem blong Luk Tempol
Hem i insaed long tempol nao we bambae yumi save kasem kwaet save ia se ol famli rilesensip bae oli gogohed afta long ded mo bae oli stap blong taem we i no save finis.
Ol dia brata mo sista. Mi talem tangkyu tumas blong stap wetem yufala long fas sesen ia blong Jeneral Konfrens. Ol spika, miusik, mo prea i bin tekem Spirit i kam—mo tu, wan filing blong laet mo hop.
Filing ia i tekem memori i gobak long fas dei we mi wokbaot insaed long Sol Lek Tempol. Mi mi wan yang man. Papa mo mama blong mi, tufala nomo i kompanion blong mi long dei ia. Insaed, tufala i stop smol taem blong wan we i wok long tempol i welkamem tufala. Mi wokbaot i go fastaem, miwan.
Wan smol woman wetem waet hea we i werem wan tempol dres, i welkamem mi. Hem i lukluk i kam long mi, mo i smael, mo i talem long kwaet voes: “Welkam long tempol, Brata Eyring.” Smol taem ia, mi ting se hem i wan enjel from se hem i save nem blong mi. Mi no bin luksave se i gat wan smol kad wetem nem blong mi i stap long hem we oli putum long klos blong mi.
Mi wokbaot i go mo mi stop. Mi lukluk i go antap long wan hae waet siling we i mekem rum i laet, we i luk se i olsem se i open i go long skae. Mo long tetaem ia, tingting i kam long maen blong mi wetem ol klia toktok ia: “Mi bin stap long ples ia we i gat laet bifo.” Be stret afta, long maen blong mi, ol toktok ia oli kam be i no long voes blong mi: “No. Yu neva kam ia bifo. Yu stap rimemba wan taem ia bifo yu bin bon. Yu bin stap long wan tabu ples olsem.”
Long aotsaed blong evri tempol blong yumi, yumi putum ol toktok ia: “Tabu fasin long Lod.” Mi save long miwan se ol toktok ia oli tru. Tempol i wan tabu ples, we insaed long hem, revelesen i kam long yumi isi sapos hat blong yumi i open long hemia, mo yumi klin inaf from.
Samtaem afta, long fas dei ia, mi bin filim sem Spirit ia bakegen. Insaed long seremoni blong tempol, i gat samfala toktok we i givim wan filing we i bon insaed long hat blong mi, we i konfemem se wanem we i stap, i tru. Wanem mi bin filim, i blong miwan nomo long saed blong fiuja blong mi, mo i kam ril 40 yia afta, tru long wan koling we i kam long Lod blong mi givim seves.
Mi bin gat semfala filing ia taem mi bin mared long Logan, Yuta Tempol. Presiden Spensa W. Kimbol i mekem siling ia. Long sam sot toktok we hem i talem, hem i givim kaonsel ia: “Hal mo Kathy, laef long wan wei we, taem singaot i kam, bae yutufala i save wokbaot i go isi nomo.”
Taem hem i talem ol toktok ia, mi bin luk klia, long maen blong mi, long ful kala, wan hil we i stip mo wan rod i go kasem top blong hil. Wan waet fanis i stap long lefsaed blong rod, mo i lus biaen long sam tri long top blong hil ia. I gat wan waet haos i stap we mi no save luk gud biaen long ol tri ia.
Wan yia afta, mi bin luksave hil ia taem palika blong mi i draevem mitufala long rod ia. Evri ditel i stap olsem we mi bin luk, taem Presiden Kimbol i givim kaonsel blong hem long tempol.
Taem mitufala i kasem top blong hil, palika blong mi i stop long waet haos ia. Hem i talem long mitufala se hem mo waef blong hem, tufala i pem ples ia mo hem i wantem se gel blong hem mo mi i stap long smol haos blong ol ges. Bae tufala i stap long bigfala haos, we i stap i no longwe. Mekem se, long ol tenfala yia we mifala i bin laef long famli laef ia, waef blong mi mo mi i stap talem: “Bae yumitu mas glad long hemia, from se bae yumitu no save stap long ples ia longtaem.”
Wan singaot i kam long Jos komisina blong edukesen, Neal A. Maxwell. Woning ia, we Presiden Kimbol i bin talem, blong save “wokbaot i go isi” i kam wan tru samting. Hem i wan singaot blong lego wan gudfala famli situesen blong save go wok long wan wok long wan ples we mi no save eni samting long hem. Famli blong mitufala i rere blong lego taem mo ples ia we i gat blesing, from se wan profet, long wan tabu tempol, wan ples blong revelesen, i bin luk wan fiuja taem we bae mitufala i rere from.
Mi save se ol tempol blong Lod oli ol tabu ples. Stamba tingting blong mi tedei, blong tokbaot ol tempol, i blong kam antap long tingting blong yu, mo blong mi, blong stap klin inaf, mo stap rere from moa janis we bae i kam blong gat eksperiens long tempol, we oli stap kam long yumi.
Long mi, wanem i pusum mi bigwan blong stap klin inaf from ol eksperiens blong tempol, i wanem we Lod i bin talem abaot ol tabu haos blong Hem:
“Mo folem hamas ol pipol blong mi oli bildim wan haos long mi long nem blong Lod, mo oli no letem eni samting we i no klin i kam insaed long hem, blong oli no spolem, bambae glori blong mi bae i stap long hem;
“Yes, mo glori blong mi bambae i stap ia, from we bambae mi kam insaed long hem, mo evriwan we oli gat wan hat we i klin gud we oli kam insaed long hem, bambae oli luk God.
“Be sapos oli mekem haos ia i no klin, bambae mi no kam insaed long hem, mo glori blong mi bambae i no stap ia; from we bambae mi no kam insaed long ol tempol we oli no tabu.”1
Presiden Russell M. Nelson i mekem i klia long yumi se, yumi save “luk” Sevya long tempol, long wei ia se bae i gat wan taem we, Sevya, i nomo wan man we yumi no save Hem. Presiden Nelson talem hemia: “Mifala i andastanem Hem. Mifala i andastanem wok ia blong Hem mo glori blong Hem. Mo yumi stat blong filim long laef blong yumi, risal blong bigfala wok ia we i no gat en blong laef ia blong Hem we i no gat samting i kasem mak blong hem.”2
Sapos yu o mi, i go long tempol, we yumi no klin gud inaf, bae yumi no save luk, tru long paoa blong Tabu Spirit, tijing long saed blong spirit abaot Sevya we bae yumi save kasem insaed long tempol.
Taem yumi klin inaf blong kasem kaen tijing ia, long ples ia, bae, tru long eksperiens blong tempol, yumi gat moa hop, glad, mo gud tingting truaot long ol laef blong yumi. Hop, glad mo gud tingting ia, oli stap nomo tru long fasin blong akseptem ol odinens we oli mekem insaed long ol tabu tempol. Hem i insaed long tempol nao we bambae yumi save kasem kwaet save ia se ol famli rilesensip bae oli gogohed afta long ded mo bae oli stap blong taem we i no save finis.
Sam yia i pas, taem mi bin stap olsem wan bisop, wan naes yang man i no akseptem invitesen blong mi, blong kam klin inaf blong laef wetem God insaed long ol famli, blong oltaem. Long wan strong wei, hem i talem long mi abaot ol gud taem we hem i stap gat wetem ol fren blong hem. Mi letem hem i toktok. Afta, hem i talem long mi abaot wan taem long ol lafet blong hem, long medel blong ol bigfala noes, nao hem i rili filim se hem i stap hemwan. Mi askem hem wanem i bin hapen. Hem i talem se hem i bin tingbaot wan taem, taem hem i smol, we hem i sidaon long leg blong mama blong hem, mo han blong hem i raonem hem. Blong smol taem, taem hem i stap talem stori ia, hem i krae. Mi talem long hem wanem nao mi save se i tru: “Wan wei nomo we yu save gat filing ia, blong famli i holem hem blong oltaem, i blong kam klin inaf hemwan, mo blong helpem ol narawan blong kasem ol siling odinens blong tempol.
Yumi no save ol ditel blong ol famli rilesen insaed long spirit wol, o wanem i kam afta we yumi laef bakegen long ded. Be yumi save se profet Elaeja i bin kam, olsem we God i promesem, blong tanem hat blong ol papa i go long ol pikinini, mo hat blong ol pikinini i go long ol papa.3 Mo yumi save se hapines blong yumi, we i no save finis, i dipen long hamas yumi mekem blong mekem se semfala hapines ia i gohed blong hamas famli we yumi save mekem.
Mi filim semfala tingting long hat blong mekem gud blong invaetem ol memba blong famli blong mi we oli laef, blong wantem kam klin inaf blong kasem, mo blong givim ona long siling odinens ia blong tempol. Hemia i pat blong kam tugeta blong Isrel we God i promesem long ol las dei long tugeta saed blong vel.
Wan long ol bigfala janis blong yumi, i taem we ol memba blong famli blong yumi oli yangfala yet. Oli bon wetem Laet blong Kraes, we i wan presen. Laet ia i mekem se oli gat tingting i open, we oli save wanem i gud mo wanem i nogud. From risen ia, iven blong luk wan tempol, o wan pikja blong wan tempol, i save mekem se, insaed long hat blong wan pikinini, bae wan tingting blong wantem kam klin inaf mo gat spesel janis ia wan dei, blong go insaed, i bon insaed long hat blong hem.
Dei ia bae i save kam, we, olsem wan yut, oli kasem wan tempol rekomen blong mekem ol proksi baptaes insaed long tempol. Long eksperiens ia, filing ia blong olgeta i save gro, se ol odinens blong tempol, oltaem oli poen i go long Sevya mo Atonmen blong Hem. Taem oli stap filim se oli stap givim janis long wan long spirit wol blong i kam klin aot long ol sin blong hem, bae filing blong olgeta i gro blong stap helpem Sevya long tabu wok ia blong stap blesem wan pikinini blong Papa blong yumi long Heven.
Mi bin luk paoa blong eksperiens ia i jenisim laef blong wan yangfala. Sam yia i pas, mi bin go wetem gel blong mi, i go long wan tempol long let aftenun. Hem i laswan blong wok olsem wan proksi long ples blong baptaes. Oli askem gel blong mi blong stap smol taem moa blong finisim ol odinens blong evriwan we oli bin rere long nem blong olgeta. Hem i talem yes.
Mi lukluk smol gel blong mi i go insaed long ples blong baptaes. Ol baptaes oli stat. Smol gel blong mi, wota i stap ron long fes blong hem evri taem we oli leftemap hem i kamaot long wota. Evri taem, oli askem hem, bakegen mo bakegen: “?Yu save mekem sam moa?” Evri taem, hem i talem yes.
Olsem wan papa we mi wari, mi stat blong hop se bae oli talem long hem se i inaf nao. Be mi tingbaot yet, se hem i strong, taem oli askem hem sapos hem i save mekem moa, mo wetem wan strong smol voes, hem i stap talem “Yes.” Hem i stap kasem taem we laswan long lis blong dei ia i bin kasem blesing blong kasem baptaes long nem blong Jisas Kraes.
Taem mi wokbaot i go aotsaed long tempol wetem hem long naet ia, mi stap askem miwan wanem nao mi bin luk. Wan pikinini we Lod i bin leftemap hem mo jenisim hem long fored blong ae blong mi from se hem i bin givim seves long Lod insaed long haos blong Hem. Mi tingbaot yet filing blong laet mo pis ia taem mifala i wokbaot tugeta, mitufala i aot long tempol.
Ol yia oli pas. Hem i stap ansa yes yet long kwestin we i kam long Lod, sapos bae hem i mekem moa blong Hem, taem we i had tumas. Hemia nao wanem tempol seves i save mekem blong jenisim mo leftemap yumi. Hemia nao, from wanem, hop blong mi from yu mo evri famli blong yu, i we, bambae yufala i gat moa filing blong wantem, insaed long hat, mo moa strong tingting blong stap klin inaf blong go insaed long haos blong Lod, plante taem moa, olsem we situesen blong yufala i letem.
Hem i wantem welkamem yu long ples ia. Mi prea se bambae yu traem blong bildimap wan filing blong wantem, insaed long hat blong ol pikinini blong Papa long Heven, blong yufala i go ia, ples we oli save filim kolosap long Hem, mo bae yufala i invaetem tu ol bubu blong yufala blong oli kwalifae blong stap wetem Hem mo wetem yufala blong oltaem.
Ol toktok ia, oli save kam toktok blong yumi:
O Yes mi stap luk tempol.
Bae mi go ia wan dei
Blong filim Tabu Spirit,
Blong lisin mo blong prea.
From we tempol hem i haos blong God.
Ples blong lav mo glori.
Bae mi rere taem we mi yang;
Tabu wok ia blong mi.4
Mi talem tabu testemoni blong mi se yumi ol pikinini blong wan Papa long Heven we i gat lav. Hem i bin jusum Stret Pikinini Ia blong Hem, blong i Sevya mo Ridima blong yumi. Wan wei ia nomo blong gobak stap wetem Tufala, mo wetem famli blong yumi, hem i tru long ol odinens blong tabu tempol. Mi testifae se Presiden Russell M. Nelson i holem mo i stap yusum evri ki blong prishud blong mekem se, laef we i no save finis, i kam long evri pikinini blong God. Mi testifae olsem long tabu nem blong Jisas Kraes, amen.