Elda Carlos G. Revillo Junia
Jeneral Atoriti Seventi
Stat long taem we hem i smol pikinini, Elda Carlos G. Revillo Junia i bin wantem givim seves long wan fultaem misin. Be long kolej, hem i disaed se bae i seftem misin long wan yia blong finisim wan faef yia kemikol enjinering digri, mo pasem nasonal bod setifikesen eksam. Hem i kamaot long ol top faef long bod blong ol eksam, mo i kasem sam gudfala wok we ol maltinasonol kampani oli wantem givim long hem.
“Long tetaem ia, mi mas askem miwan: ‘Mi mi rili wantem go long wan misin? ?Mi mi rili save se Josef Smit i wan tru profet, mo mi save se Buk blong Momon i tru?’” Elda Revillo i talem. “Mi mas prea mo rili lukluk long wanem mi bin biliv long hem.”
Afta long hemia, hem i bin lanem se mama blong hem i bin stap prea mo i bin stap livim kakae from hem. Elda Revillo i talem se Spirit i tajem hat blong hem.
“Testemoni blong mi i kam strong fulwan taem mi go long fultaem misin,” hem i talem. “Evri blesing we mi gat naoia, i from impoten desisen ia.”
Carlos Garcia Revillo Junia i bin bon i kam long wol ia long Jeneral Santos Siti, Filipin, long namba 8 Novemba 1965. Papa mo mama blong hem i Carlos G. Revillo Sr. Mo Amparo Revillo. Hem i groap long Jeneral Santos, mo i go long fultaem misin long Filipin Bakolod Misin, mo i maredem Marites Enriquez Fernando Revillo long Manila Filipin Tempol long 1989. Tufala i gat fo pikinini.
Elda Revillo i graduet wetem wan digri long kemikol enjinering long Yunivesiti blong Santo Tomas long Manila long 1986. Hem i bin wok blong 22 yia long ol defren manejmen posisen blong Procter & Gamble long Filipin, Esia-Pasifik rijin, mo long wol hedkwota blong kampani ia long Yunaeted Stet. Mo tu, hem i bin wok olsem hed blong kwaliti, sefti blong kaekae mo ol regulesen afea long Esia, hemia blong Kellogg Kampani.
Elda Revilla, we i bin stap long maneja blong welfea mo indipenden laef seves blong Jos long Filipin long taem we hem i kasem koling blong hem, i bin stap olsem wan bisop, wan stek presiden, wan seminari tija, wan hae kaonsela, mo presiden blong Filipin Kweson Siti Misin stat long 2013 kasem 2016.