Kraes I Girap Finis; Bilif long Hem bae I Muvumaot Ol Bigfala Hil
Fet long Jisas Kraes i paoa ia we i moa bigwan we yumi save yusum long laef ia. Evri samting i posibol long olgeta we oli stap biliv.
Ol dia brata mo sista. Mi talem tangkyu tumas from spesel janis ia blong toktok wetem yufala long Ista Sandei ia.1 Sakrifaes we i pem praes, mo Laef Bakegen long Ded blong Jisas Kraes, i jenisim laef blong yumi blong oltaem. Yumi lavem Hem mo glad blong wosipim Hem mo Papa blong yumi long Heven.
Long ol las sikis manis, yumi bin gohed blong faet wetem wol sik ia. Mi sapraes long strong tingting mo strong paoa long saed blong spirit blong yufala taem yufala i fesem sik, lus, mo fasin blong oli sarem yufala. Mi prea oltaem se, tru long evri samting ia, bambae yu filim lav ia we i stap oltaem, we Lod i gat long yufala. Sapos yu bin fesem ol tes blong yu wetem wan fasin we i strong moa blong stap disaepol, nao las yia i no go nating.
Tedei moning, yumi harem ol lida blong Jos we oli kam long evri ples we man i laef long hem long wol ia. I tru, ol blesing ia blong gospel oli blong evri kala blong skin, evri lanwis mo evri pipol. Jos Ia blong Jisas Kraes, i wan wol jos. Jisas Kraes i lida blong yumi.
Tangkyu tumas, iven wan wol sik i no bin save slodaon maj blong trutok blong Hem blong i go fored. Gospel blong Jisas Kraes i stret samting we i nid blong stap long wol ia we i konfius, i stap raorao, mo i taed finis.
Wanwan pikinini blong God i gat raet blong gat janis ia blong harem mo akseptem mesej ia blong Jisas Kraes we i stap hilim mo pemaot man. I no gat nara mesej moa we i impoten moa long hapines blong yumi—naoia mo blong oltaem.2 I no gat nara mesej we i fulap gud long hop. I no gat nara mesej we i save katemaot raorao long sosaeti blong yumi.
Fet long Jisas Kraes i fandesen blong evri bilif mo i wanem i tekem tabu paoa i kam. Folem toktok blong Aposol Pol: “Be sapos man i no bilif strong long God, hem i no save mekem God i glad long hem, from we sapos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.”3
Evri samting we i gud long laef—evri blesing we oli save kam we oli gat mining long taem we i no save finis—i stat wetem fet. Blong stap letem God i win insaed long laef blong yumi, i stat wetem fet se Hem i glad blong soem rod long yumi. Tru fasin blong sakem sin, i stat wetem fet se Jisas Kraes i gat paoa ia blong klinim yumi, hilim yumi mo mekem yumi kam strong moa.4
“No tanem baksaed long paoa blong God,” profet Moronae i bin talem, “from hem i stap wok tru long paoa, folem fet blong ol pikinini blong ol man, semmak tedei, mo tumoro, mo blong oltaem.5 Hem i bilif blong yumi nao we i openem doa blong paoa blong God insaed long laef blong yumi.
Be yet, blong stap praktisim fet long Jisas Kraes, maet bae yu luk se i bigwan tumas. Long sam taem, bae yumi askem yumiwan sapos yumi save yusum inaf fet blong kasem ol blesing we yumi nidim tumas. Be, Lod i mekem ol fraet ia oli go lus tru long ol toktok blong profet Alma long Buk blong Momon.
Alma i askem nomo long yumi blong traem toktok blong God mo “praktisim wan smol pis blong fet, yes iven sapos [yumi] no save mekem moa be wantem blong biliv nomo.”6 Sentens ia “smol pis blong fet,” i rimaenem mi long saed blong promes ia blong Baebol se, sapos “bilif blong [yumi] i smol nomo,” be bambae [yumi] save talem long bigfala hil ya se, ‘Yu gowe,’ nao bambae hem i mas gowe. Bambae i no gat wan samting we yufala i no save mekem.”7
Lod i andastanem wiknes blong yumi long wol ia. Yumi evriwan i foldaon long sam taem. Be Hem i save tu bigfala paoa we i stap long yumi. Smol sid blong masted ia i stat smol, be i gro i kam wan bigfala tri we i bigwan inaf blong ol pijin oli mekem bed long ol branj blong hem. Smol masted sid i ripresentem wan fet we i smol, be i stap gro i kam bigwan.8
Lod i no nidim blong bilif blong yumi i stret evriwan blong yumi save yusum paoa blong hem we i stret evriwan. Be Hem i askem yumi blong stap biliv.
Ol dia brata mo sista blong mi. Singaot blong mi long yufala long Ista moning ia i blong stat tedei blong kam antap long bilif blong yu. Tru long fet blong yu, Jisas Kraes bae i mekem yu gat moa paoa blong muvum ol bigfala hil we oli stap insaed long laef blong yu,9 iven sapos ol jalenj blong yuwan oli bigbigwan olsem Hil Everest.
Ol bigfala hil blong yu, maet oli fasin blong stap yuwan, tu tingting, sik, o ol nara problem blong yu. Ol bigfala hil blong yu bae oli defdefren, be yet, ansa blong wanwan long ol jalenj blong yu i blong kam antap long bilif blong yu. Hemia i nidim wok. Ol disaepol we oli les mo oli no lukaotgud, oltaem bae oli gat trabol blong praktisim iven wan smol pis blong fet.
Blong mekem eni samting, i nidim hadwok. Blong kam wan tru disaepol blong Jisas Kraes, i semmak nomo. Blong kam antap long bilif blong yu mo tras blong yu long Hem, i nidim hadwok. Bae mi givim faef tingting blong helpem yu developem bilif mo tras ia.
Faswan, stadi. Kam wan we i wantem blong lanem samting. Draonem yu long ol skripja blong andastanem gud moa misin ia blong Kraes mo seves blong Hem. Save gud doktrin blong Kraes blong mekem se yu andastanem paoa blong hem long laef blong yu. Tekem insaed long yuwan, trutok ia se, Atonmen blong Jisas Kraes, hem i blong yu. Hem i tekem long Hemwan, harem nogud blong yu, ol mistek blong yu, ol wiknes blong yu, mo ol sin blong yu. Hem i pemaot praes ia, mo i givim paoa blong yu save muvumaot evri bigfala hil we bae yu fesem. Yu kasem paoa ia wetem bilif, tras, mo tingting blong hat blong yu blong wantem folem Hem.
Blong stap muvumaot ol bigfala hil, i nidim bigfala merikel. Lanem abaot ol merikel. Ol merikel oli kam folem hamas yu gat fet o bilif long Lod. Long medel blong fet ia, i gat fasin blong trastem tingting mo taem blong Hem—olsem wanem mo wetaem bambae Hem i blesem yu wetem wan spesifik merikel help ia we yu wantem. Bambae fasin blong yu blong no biliv bae i holemtaet yu blong God i blesem yu wetem ol merikel ia blong muvumaot ol bigfala hil insaed long laef blong yu .10
Moa yu lanem abaot Sevya, moa i isi blong yu trastem sore blong Hem, bigfala lav blong Hem we i no gat en, paoa blong Hem we i mekem man i kam strong moa, i kam oraet, mo i pemaot man. Sevya i oltaem moa kolosap long yu taem yu stap fesem o stap klaem wan bigfala hil wetem fet.
Nambatu, jusum blong biliv long Jisas Kraes. Sapos yu gat tu tingting abaot God Papa, mo Pikinini blong Hem we Hem i Lavem, o sapos Restoresen i tru, o tabu koling blong Josef Smit olsem wan profet, i wan truwan, jusum blong biliv11 mo stap fetful. Tekem ol kwestin blong yu i go long Lod mo ol nara fetful ples blong kasem infomesen. Stadi wetem tru tingting blong biliv be i no wetem hop se bae yu faenem wan rong long laef blong wan profet, o wan samting we i rong long ol skripja. Stop blong gat moa tu tingting taem yu stap wokem tokbaot olgeta wetem ol narawan we oli gat tu tingting. Letem Lod i lidim yu long wokbaot ia blong faenem samting long saed blong spirit.
Nambatri, mekem samting wetem fet. ?Wanem nao bae yu mekem sapos yu gat moa fet? Tingting long hemia. Raet abaot hemia. Mo afta, kasem moa fet taem yu mekem wan samting we i askem moa fet.
Nambafo, stap klin inaf blong tek pat long ol tabu odinens. Ol odinens oli ol ki blong openem doa blong ol paoa blong God long laef blong yu.12
Mo nambafaef, askem Papa blong yu long Heven, long nem blong Jisas Kraes, blong kasem help.
Fet i nidim wok. Blong stap kasem revelesen i nidim wok. Be “evriwan we i askem, i kasem; mo hem we i lukaotem, i faenem; mo long hem we i kilkilim doa, bae i mas open.”13 God i save wanem bae i helpem bilif blong yu blong i gro bigwan. Askem, mo afta, askem bakegen.
Wan we i no biliv bae i save talem se, fet i blong olgeta we oli no strong. Be tok ia i lukluk i go ova long paoa blong fet. ?Yufala i ting se bae Ol Aposol blong Sevya bae oli gohed blong tijim doktrin blong Hem afta we Hem i ded kasem taem we oli ded sapos oli bin gat tu tingting abaot Hem?14 ?Yufala i ting se bae Josef mo Haeram Smit bae oli ded from bilif blong tufala mo stap difendem Restoresen blong Jos blong Lod sapos oli no bin gat wan sua witnes se hemia i tru? ?Yufala i ting se bae kolosap 2000 Sent bae oli ded folem wokbaot blong ol paeonia15 sapos oli bin gat bilif se gospel ia blong Jisas Kraes i bin kambak? I tru. Fet, hem i paoa we i mekem se wanem i no save hapen i hapen.
Yu no daonem hamas fet we yu yu gat finis. I tekem fet blong joenem Jos mo gohed blong stap fetful. I tekem fet blong folem ol profet be i no ol popula man mo ol popula tingting. I tekem fet blong givim seves long wan misin long taem blong wan wol sik. I tekem fet blong laef folem wan klin laef long saed blong seks taem we wol ia i singaot se loa blong God long saed blong jastiti i nomo blong folem. I tekem fet blong tijim gospel long ol pikinini long wan wol we i no gat bilif. I tekem fet blong prea strong from laef blong wan yumi lavem mo iven moa fet blong akseptem wan ansa we i talem no.
Tu yia i pas, Sista Nelson mo mi i bin visitim Samoa, Tonga, Fiji mo Tahiti. Wanwan long ol aelan nesen ia, i gotru long ol hevi ren blong plante dei. Ol memba oli bin livim kakae mo oli bin prea se ol miting blong olgeta we oli holem long open spes, bae i gat proteksen mo no gat ren.
Long Samoa, Fiji mo Tahiti, jes taem ol miting bae oli stat, ren i bin stop. Be long Tonga, ren i no bin stop. Be yet, 13 taosen fetful Sent oli kam sam aoa eli blong faenem wan jea, mo oli wet longtaem tru long bigfala ren, mo oli sidaon tru long tu aoa miting we i gat ren.
Mifala i luk strong fet i wok long medel blong wanwan long ol aelan pipol ia—wan fet we i inaf blong stopem ren, mo fet blong gohed blong stap strong taem we ren i no bin stop.
Ol bigfala hil blong laef blong yumi, i no oltaem muv long wei o wetaem we yumi wantem. Be fet blong yumi, oltaem bambae i pusum yumi i go fored. Fet, oltaem i mekem yumi gat moa paoa blong kasem paoa olsem hemia blong God.
Yufala i mas save hemia: sapos evri samting mo evri narawan long wol we yu trastem i mas foldaon, Jisas Kraes mo Jos blong Hem bambae oli neva letem yu stap daon. Lod, neva ae blong Hem i kam hevi, mo neva Hem i slip.16 Hem “i semmak yestedei, tedei mo [tumoro].”17 Bambae Hem i no lego nating ol kavenan blong Hem,18 ol promes blong Hem, o lav we Hem i gat long ol pipol blong Hem. Hem i stap wokem ol merikel evri dei, mo bambae Hem i wokem ol merikel tumoro.19
Fet long Jisas Kraes i paoa ia we i moa bigwan we yumi save yusum long laef ia. Evri samting i posibol long olgeta we oli stap biliv.20
Fet blong yu long Hem, we i stap gro, bae i muvumaot ol bigfala hil—i no ol bigfala hil blong ston we oli flasem wol ia—be ol bigfala hil blong harem nogud we oli stap insaed long laef blong yumi. Fet blong yu, we i stap karem flaoa, bae i help blong tanem ol jalenj blong yu blong kam ol taem blong groap mo ol taem blong janis.
Long Ista Sandei ia, wetem ol dip filing blong lav mo tangkyu, mi talem se mi witnes se, i tru, Jisas Kraes i bin girap finis. Hem i girap finis blong Hem i lidim Jos blong Hem. Hem i girap finis blong blesem laef blong evri pikinini blong God, long weaples oli stap laef long hem. Wetem fet long Hem, yumi save muvumaot ol bigfala hil long laef blong yumi. Mi testifae olsem long tabu nem blong Jisas Kraes, amen.