Ol Bisop—Ol Man blong Lukaot long Grup blong Sipsip blong Lod

Ol dia brata blong mi long prishud. Wan laen we yumi save gud long wan hym we yumi lavem i askem: “?Bae ol yut blong Saeon blong oli kam slak?”¹ Laod ansa blong hat blong mi long kwestin ia, hem i “!No!”

Blong meksua se ansa ia i tru, mi testifae tedei se, blong stap sapotem jeneresen ia we i stap kam antap long wan taem ia blong defren kaen jalenj mo temtesen, hem i wan stamba responsabiliti we Papa long Heven i givim long ol papa mo mama, mo ol bisoprik.² Bae mi soem hao wan bisoprik i impoten tru long wan eksperiens blong mi.

Taem mi mi wan dikon, famli blong mi i muv i go long wan niu hom long wan defren wod. Mi stat blong go long sekendri skul, mekem se mi stap go tu long wan niu skul. I gat ol gudfala grup blong ol yang man insaed long kworom blong ol dikon. Plante long ol papa mo mama, oli ol aktiv memba. Mama blong mi i bin aktiv fulwan; papa blong mi i nambawan long evri samting be, hem i no wan aktiv memba.

Seken kaonsela long bisoprik,³ Brata Dean Eyre, i wan lida we i givim ful tingting mo taem blong hem. Taem mi stap lan abaot niu wod blong mi yet, i gat wan aktiviti blong papa mo boe we oli bin anaonsem se bae i hapen long Bea Lek—65 kilometa longwe. Mi no tingting blong go sapos papa blong mi i no go. Be Brata Eyre i givim wan spesel invitesen blong mi mi go wetem hem. Hem i talem ol gud samting abaot papa blong mi mo wetem respek, mo i poenemaot janis blong mi stap wetem ol nara memba blong kworom blong ol dikon. Mekem se, mi disaed blong go wetem Brata Eyre, mo mi gat wan gudfala eksperiens.

Brata Eyre i bin wan gudfala eksampol blong lav olsem hemia blong Kraes blong mekem responsabiliti blong bisoprik blong sapotem ol mama mo papa blong lukaotem mo fidim ol yut. Hem i givim mi wan gudfala niu stat long niu wod ia, mo i stap tijim maen blong mi.

Sam manis afta, bifo mi go blong mekem wan misin long 1960, Brata Eyre i ded from kansa, we hem i gat 39 yia. Hem i lego wan waef mo faef pikinini, evriwan i 16 yia i go daon. Ol bigfala boe blong hem, Richard, mo Chris Eyre, tufala i bin mekem tingting blong mi i kwaet se, taem papa blong tufala i no bin stap, ol bisoprik oli bin sapotem mo lukaotem olgeta mo ol yangfala brata mo sista blong olgeta wetem wan lav olsem hemia blong Kraes, mo mi talem tangkyu from.

Ol papa mo mama, oltaem bae tufala i gat fas wok ia blong lukaotem famli blong olgeta.⁴ Ol presidensi blong kworom tu oli givim stamba sapot ia mo help long ol memba blong kworom taem oli helpem olgeta blong tekem ol diuti mo papa blong Aronik Prishud i go antap long medel blong laef blong olgeta.⁵

Pikja

Gudfala man blong lukaot long sipsip wetem sipsip

Tedei, stamba tingting blong mi i blong lukluk nomo long ol bisop mo ol kaonsela blong olgeta, we oli save singaotem “ol man blong lukaot long ol sipsip blong Lod”—mo poenemaot gud se oli ol man blong lukaot long jeneresen ia we i stap kam antap.⁶ Hem i intresting tu blong luk se Aposol Pita i singaotem Jisas Kraes “Man blong Lukaot mo Bisop blong sol blong yufala.”⁷

Bisop i gat faevfala stamba responsabiliti taem hem i stap prisaed ova long wan wod:

1. Hem i prisaeding hae pris insaed long wod.⁸

2. Hem i presiden blong Aronik Prishud.⁹

3. Hem i jeneral jaj.¹⁰

4. Hem i kodinetem wok ia blong fasin blong sevem man mo fasin blong kam olsem wan god, we i blong stap kea long olgeta we oli stap long nid brata.¹¹

5. Mo hem i lukluk ova ol wok blong kipim ol rekod, lukaotem ol faenens, mo fasin blong yusum mitinghaos.¹²

Long rol long Hem olsem prisaeding hae pris, bisop hem i “lida long saed blong spirit” insaed long wod.¹³ Hem i “wan fetful disaepol blong Jisas Kraes.”¹⁴

Antap long hemia, “Bisop nao i lukaotem ful wok blong fasin blong sevem man mo kam olsem wan god insaed long wod.”¹⁵ Bisop i sapos blong givim ol evri dei wok blong serem gospel, blong mekem ol niu memba mo ol memba we oli kambak oli kam strong moa, wok blong givhan, mo wok blong tempol mo famli histri i go long presidensi blong kworom mo presidensi blong Rilif Sosaeti.¹⁶ Bisop i lukaotem wok ia insaed long wod kaonsel mo insaed long wod yut kaonsel.

Bisop i gat hae mo stamba wok ia blong givim seves olsem wan man blong lukaot long sipsip blong soem, long jeneresen we i stap kam antap wetem olgeta yang singgel adalt, rod ia we i go long Jisas Kraes.¹⁷ Presiden Russell M. Nelson i talemaot bigwan impoten rol blong bisop mo ol kaonsela blong hem. Hem i bin tijim se “fas mo bigfala responsabiliti blong [olgeta], i blong kea long ol yang man mo ol yang woman blong wod blong [olgeta].”¹⁸ Bisoprik i sapotem ol papa mo mama blong oli lukaotgud mo fidim ol pikinini mo yut insaed long wod. Bisop mo wod presiden blong Ol Yang Woman, oli toktok tugeta. Oli traehad blong helpem ol yut blong laef folem ol standet we i stap long Blong Ol Yut Oli Kam Strong, blong oli kwalifae blong kasem ol odinens, mo mekem mo kipim ol tabu kavenan.

Maet bae yu askem: “?From wanem bisop i kasem daereksen blong spendem plante taem olsem wetem ol yut?” Lod i bin oganaesem Jos blong Hem blong mekem ol fas wok we i nid blong mekem. Folem hemia, oganaesesen blong Jos blong Hem i gat wan fasin blong wok, we insaed long hem, bisop i gat tufala responsabiliti. Hem i gat doktrin responsabiliti blong lukaot long ful wod, be tu, hem i gat tu spesifik doktrin responsabiliti ia blong lukaot long kworom blong ol pris.¹⁹

Ol yang man we oli ol pris, mo ol yang woman we oli gat sem yia, oli stap long wan impoten taem blong laef mo divelopmen blong olgeta. Blong wan sot taem, oli mekem ol desisen we i gat mining long ful laef. Oli faenemaot sapos bae oli kwalifae from tempol, givim seves long wan misin,²⁰ traehad blong mared insaed long tempol, mo rere from wok blong laef ia. Ol desisen ia, taem oli mekem, i gat bigfala mining long saed blong spirit mo praktis, long ful laef blong olgeta. Ol bisop. Plis save se, blong wan sot taem we yufala i spendem wetem wan yang pris, o wan yang woman, i save helpem olgeta blong oli andastanem paoa we i stap blong oli yusum tru long Atonmen blong Jisas Kraes. Hem i save givim wan visen we bae i save lidim olgeta bigwan long ful laef blong olgeta.

Pikja

Bisop Moa Mahe mo ol kaonsela blong hem

Wan long ol bes eksampol we mi bin luk wan bisop i bin help blong givim kaen visen ia long ol yut blong hem, i Bisop Moa Mahe. Oli singaotem hem blong hem i fas bisop blong San Fransisko Wod blong Ol Man Tonga.²¹ Hem i aot long Vavahu, Tonga, i kam. Wod blong hem i stap kolosap long eapot blong San Fransisko, ples we hem i wok long hem.²²

Pikja

Tonga Wod

Wod ia i gat bigfala namba blong ol yut, plante oli kam long ol famli we oli jes muv i kam long Yunaeted Stet. Bisop Mahe i no tijim olgeta long toktok nomo mo eksampol blong hao blong stap wan stret mo gud eksampol blong Jisas Kraes, be tu, hem i bin helpem olgeta blong gat wan visen blong wanem oli save kam, mo i bin helpem olgeta blong oli rere from tempol, misin, edukesen, mo wok. Hem i givim seves blong kolosap eit yia, mo ol drim blong hem, mo wanem hem i wantem blong ol yut i kam wan tru samting.

Kolosap 90 pesen blong ol yang man long kworom blong Aronik Prishud oli go long ol misin. Long 1987, i gat 15 yang man mo woman, we oli ol fas memba blong famli blong olgeta we oli go long yunivesiti.²³ Hem i mit wetem prinsipol blong lokol hae skul (we i no blong Jos) mo oli bildimap wan frensip mo oli wok wan long wan wei blong helpem wanwan yangwan blong kasem ol gudfala gol mo winim ol problem. Prinsipol i talem long mi se Bisop Mahe i bin helpem hem blong wok wetem olgeta man we oli aot long kantri blong olgeta, we oli gat trabol i stap. Ol yang pipol oli bin save se bisop i lavem olgeta.

Sore tumas, Bisop Mahe i bin pasawe taem hem i bin stap givim seves yet olsem bisop. Bambae mi neva fogetem fenerol ia we i tajem mo givim insperesen long mi. I bin gat wan bigfala grup blong ol pipol i stap. Kwaea, i gat samples 35 yang fetful memba we oli bin go long misin, o oli stap go long skul yet, mo olgeta we oli bin ol yut long taem blong seves blong hem olsem bisop. Wan spika i talem strong filing blong tangkyu we i kam long ol yut mo ol yang adalt long wod blong hem. Hem i givim ona long Bisop Mahe from visen ia we hem i bin givim olgeta blong stap rere from laef mo wan stret mo gud seves. Be, moa impoten long hemia, Bisop Mahe i bin helpem olgeta blong bildimap fet long Lod Jisas Kraes, olsem wan fandesen blong laef blong olgeta.

Naoia, ol bisop, long weaples yufala i stap givim seves long hem, long ol intaviu blong yufala, mo ol nara rilesensip blong yufala, yufala i save givim kaen visen ia mo bildimap fet long Jisas Kraes. Yu save givim ol invitesen wetem paoa blong oli jenisim fasin, blong oli rere from laef, mo givim insperesen blong stap long kavenan rod ia.

Antap long hemia, yu save helpem sam yut we oli gat raorao wetem papa mo mama blong olgeta from sam samting we oli no impoten nating.²⁴ Long wan taem we i luk se ol yang pipol oli gat bigfala raorao wetem papa mo mama blong olgeta, hem we i prisaed long kworom blong olgeta, mo huia oli ansa long hem long eklesiastik level, i man ia tu we ol papa mo mama oli go long hem blong kasem wan tempol rekomen. Hemia i putum bisop i stap long wan spesel posisen blong givim kaonsel long yut mo papa mo mama blong olgeta, taem we raorao i mekem oli seraot. Ol bisop oli save helpem blong oli luk samting wetem wan lukluk we i go long taem we i no save finis, mo stretem ol problem we oli no impoten tumas. Mifala i talem se ol bisop oli no gat ol famli blong oli gat wok blong givhan long olgeta, blong mekem se oli save givim taem mo paoa blong olgeta blong givhan long ol yut mo famli blong olgeta long ol kaen situesen olsem.²⁵

Mi mi save long wan bisop we i bin save stretem bigfala raorao bitwin wan boe mo papa mo mama blong hem, i tekem gud filing insaed long hom mo moa komitmen long gospel. Bisop i bin helpem papa mo mama blong andastanem se, blong traehad blong stap wan disaepol blong Jisas Kraes, i moa impoten bitim olsem wanem mo wetaem oli mekem ol haoswok.

Blong save spendem moa taem wetem ol yut, long eni ples we oli stap long hem, wetem ol skul taem mo aktiviti, oli bin givim kaonsel long ol bisoprik blong givimaot wok blong holem ol miting mo kaonsel taem wetem ol adalt. Ol bisop oli save givim kaonsel long ol mata we oli series mo ejen, be mifala i rekomendem se wok ia blong givim kaonseling wetem ol mata we oli kamkamaot oltaem, ol mata we i no ejen tumas we i no nidim ol jajmen long saed blong fasin blong stap klin inaf, bae oli givimaot ol wok ia long kworom blong ol elda o long Rilif Sosaeti—plante taem long ol presidensi o ol givhan brata mo sista. Spirit ia bae i lidim ol lida²⁶ blong oli jusum ol raet memba blong lukluk long ol kaonseling ia. Olgeta we oli kasem wok ia blong givim kaonseling, oli gat raet blong kasem revelesen. Yes, i tru, olgeta tu oli mas kipim ol samting oli konfidensiol i stap.

Ol lida we oli gat tingting, oltaem oli bin mekem sakrifaes from jeneresen ia we i stap kam antap. Hemia i ples we ol memba blong bisoprik oli spendem bigfala taem blong Jos seves blong olgeta.

Naoia, mi wantem talem sam samting i go stret long ol yut, mo afta long ol bisop blong yumi.

Plante long yufala, ol gudfala yang pipol, i no gat wan klia visen long huia yufala, mo huia yufala i save kam. Yet, yufala i stap long mak blong tekem ol desisen we oli moa impoten long laef blong yufala. Plis. Kaonsel wetem tugeta ia, papa mo mama blong yufala, mo bisop blong yufala abaot ol impoten joes we oli stap long fored blong yu. Letem bisop i kam fren mo kaonsela blong yu.

Mifala i save gud se yufala i gat ol tes mo ol temtesen we oli kam long yufala, long evri saed i kam. Yumi evriwan i nid blong sakem sin evri dei, olsem we Presiden Nelson i tijim. Plis. Toktok long bisop blong yu abaot eni mata we wan jeneral jaj i save helpem yu wetem blong putum laef blong yu i stap long oda wetem Lod, blong stap rere from “hae wok” ia we Lod i gat long yufala long las dispensesen ia.²⁷ Taem we Presiden Nelson i stap invaetem yufala, plis, !kwalifae blong yu yu pat blong yut ami blong Lod!²⁸

Naoia, wan toktok i go long yufala ol gudfala bisop, long bihaf blong lidasip mo memba blong Jos. Mifala i talemaot bigfala tangkyu i go long yufala. Wetem ol samting we oli askem yufala blong stretem long ol las yia ia i kam, ol dia bisop, plis, yufala i mas save hamas mifala i lavem mo talem tangkyu long yufala. Kontribusen long yufala long kingdom ia, i bitim wanem mifala i save tokbaot. Jos i gat 30,900 bisop mo branj presiden we oli stap givim seves raon long wol.²⁹ Mifala i givim ona long wanwan long yufala.

Sam long ol toktok mo tabu koling we oli holem oli fulap long wan mining long saed blong spirit we i bigwan tumas blong tokbaot. Koling ia, blong wan bisop, i tru i stap long nambawan posisen blong ol toktok ia. Blong givim seves long Lod long ples ia, i spesel mo bigwan long plante wei. Blong singaotem, sastenem, mo setem apat wan bisop, i wan eksperiens we wan i no save fogetem. Long mi, i kasem mak blong sam samting we i hapen long laef we i mekem mi mi filim strong ol plante defren filing. Wok ia, i stap long semmak level blong ol impoten taem olsem mared, o kam papa, we sam toktok nomo i no naf blong tokbaot.³⁰

!Ol Bisop! !Mifala i sastenem yufala! !Ol Bisop! !Mifala i lavem yufala! I tru tumas we yufala i ol man blong Lod blong lukaot long ol sipsip blong Hem. Sevya bae i no lego yufala i stap nating long ol tabu koling ia. Long hemia, mi testifae long Ista wiken ia, long nem blong Jisas Kraes, amen.