Elda Vaiangina Sikahema

Stat long taem ia we Vaiangina (Vai) Sikahema i bin stat blong pulum ae blong ol man we oli stap tekem ol man blong spot long skul, from hem i wan futbol sta blong hae skul long Arisona, YSA, Vai i bin laef long ae blong pablik.

Hem i plei gud futbol long Brigham Yang Yunivesiti, we hem i kompit wetem nasonal jampionsip tim blong Ol Cougar long 1984. Hem i bin plei olsem wan profesonol long plante Nasonal Futbol Lig tim, mo tu taem, i bin putum nem blong hem i go long Pro Bowl bifo hem i muv i go long wan gudfala wok olsem wan nius brodkasta.

Be “futbol pleia”, o “TV man” i no huia, man ia we i gat 58 yia, i stap long ril laef.

“Mi neva dipen se bae mi stap olsem wan profesonol spotman, o wan brodkasta, mo tekem se hemia aedentiti blong mi,” Elda Sikahema i talem. Oli sastenem hem olsem wan jeneral Atoriti Seventi long namba 3 Epril 2021. “Faswan, mi stap talem se mi mi wan boe blong God, mo wan Lata-dei Sent.”

Hem i wan hasban, papa mo man we i holem prishud tu—evriwan ia oli ol aedentiti we i no save finis.

Hem i bon i kam long wol ia long namba 29 Ogis 1962, long Nuku‘alofa, Tonga, mo papa mo mama blong hem i, Sione mo Rubi Sikahema. Elda Sikahema i bin groap insaed long wan haos we stamba i famli mo bilif. Ol bubu blong hem oli bin stap long medel blong olgeta fasfala we oli bin joenem Jos.

Hem i bin groap long Mesa, Arisona, mo hem i lego ol wok blong rere blong kam wan profesonol boksing man taem we hem i faenemaot se hem i gat ol futbol talen. Taem we hem i akseptem wan skolasip blong plei long BYY, hem i no bin plan blong go long wan fultaem misin.

‘Be mi stap raon long ol yang man we oli komitim olgeta bigwan blong stap laef folem gospel, mo mi bin wantem blong stap moa olsem olgeta,” Elda Sikahema i talem.

Long 1982, hem i go longwe smol long kolej futbol blong go long misin long Saot Dakota Rapid Siti Misin. Afta we hem i kambak long BYY afta long misin blong hem, hem i mitim Keala Heder, we i blong Hawae. Tufala i bin mared long Mesa Arisona Tempol long 1984. Tufala Sikahema oli papa mo mama blong ol fofala pikinini.

Bifo hem i kam wan Jeneral Atoriti, Elda Sikahema i bin stap olsem wan presiden blong Yang Man long wod, olsem wan bisop, rijin daerekta blong pablik afea, misin presidensi kaonsela, stek presiden, mo Eria Seventi.