Gospel Laet blong Trutok mo Lav

Naesfala Lata-dei Sent hym ia, “!Lisin, Evri Nesen!” i kasem stret bigbigfala glad ia blong ful gospel we i stap go long ful wol. Long hym ia, yumi singsing:

Luis F. Mönch, man we i raetem hym ia, i wan konvet blong Jemani we i raetem ol insperesen toktok blong hym ia taem hem i stap go long Switselan long fultaem misinari seves blong hem long Yurop.² Glad ia we i kamaot taem yumi witnesem ful risal blong Restoresen, i kamaot klia long ol toktok ia blong hym ia:

Tangkyu long Restoresen ia we i stap gogohed we i stat 200 yia i pas, nao “gospel laet blong trutok mo lav”⁴ i stap saen naoia truaot long wol. Profet Josef i bin lanem long 1820, mo i gat plante milian moa oli bin lanem stat long tetaem ia, se God “i stap givim long ol man long gladhat blong hem.”⁵

I no longtaem afta we oli oganaesem Jos long las dispensesen ia, Lod i bin toktok long Josef Smit mo i bin talemaot bigfala lav blong Hem long yumi taem Hem i talem:

“Taswe, Mi Lod, we mi save bigfala trabol we bae i kam long ol man we oli stap laef long wol, mi bin singaotem wokman blong mi, Josef Smit Junia, mo mi stap long heven mo toktok long hem, mo givim ol komanmen long hem; …

“Se kavenan blong mi we i no gat en i save stanap;

“Se olgeta we oli no strong mo oli simpol bae oli talemaot ful gospel blong mi kasem evri en blong wol, mo long fored blong ol king mo ol man blong rul.”⁶

I no longtaem we Josef i bin kasem revelesen ia, oli stat blong singaotem ol misinari, mo sendem i go long plante nesen blong wol. Olsem we profet Nifae i bin ting, mesej ia blong gospel we i kambak, i stat blong oli prijim “long medel blong evri kantri, famli, lanwis, mo pipol.”⁷

“Jos Ia blong Jisas Kraes blong Ol Lata-dei Sent, oli bin oganaesem long wan smol wud haos long Niu Yok long 1830.

“I tekem 117 yia—kasem 1947—blong Jos i gro i kam bigwan stat long sikis memba i go kasem wan milian. Ol misinari, oli wan impoten samting we i soemaot Jos long stat blong hem, oli go evri ples long Ol Man Amerika, long Kanada, mo long 1837, oli go ova long Not Amerika i go kasem Inglan. I no longtaem afta, ol misinari oli stap mekem wok long Yurop mo i go kasem India mo Ol Aelan long Pasifik.

“Jos i kasem mak blong tu milian memba jes 16 yia afta, long 1963, mo i kasem tri milian long nara eit yia afta.”⁸

Taem hem i stap poenemaot olsem wanem Jos i stap gro, Presiden Russell M. Nelson i talem: “Tedei, wok blong Lod insaed long Jos Ia blong Jisas Kraes blong Ol Lata-dei Sent i stap muv i go fored long wan hae spid. Jos i gat wan fiuja we i moa gud bitim eni samting we man i stap tingting long hem.”⁹

Restoresen blong gospel blong Jisas Kraes, we i fulwan, oganaesesen blong Jos we i laef blong Lod, mo hao hem i gro stat long tetaem ia, i mekem ol blesing blong prishud oli stap truaot long wol. Ol tabu odinens mo kavenan we oli joenem yumi long God, mo putum yumi long kavenan rod ia, oli soemaot klia “paoa olsem hemia blong God.”¹⁰ Taem yumi stap tekpat long ol tabu odinens ia blong olgeta we oli stap laef mo olgeta we oli ded finis, yumi mekem Isrel i kam tugeta long tugeta saed blong vel, mo yumi mekem wol i rere from Seken Kaming blong Sevya.

Long Epril 1973, papa, mama mo mi i bin travel aot long Ajentina blong go sil long tempol. From se i no gat tempol long ful Latin Amerika long tetaem ia, mifala i flae ova 9,700 kilometa blong sil long Sol Lek Tempol. Nomata we mi bin gat 2 yia nomo long tetaem ia, mo no tingbaot ful spesel eksperiens ia, tri defren pikja blong trip ia i stap long maen blong mi, mo i stap kasem tedei.

Pikja

Lukluk i go aotsaed tru long windo blong plen

Faswan, mi tingbaot se mi sidaon kolosap long windo mo mi luk waet klaod andanit.

Olgeta naes waet klaod ia oli stastap long maen blong mi, olsem se oli ol bigbigfala balong blong koten.

Wan nara pikja we i stastap long maen blong mi, i we i gat sam fani leta long wan pak blong pleiplei long eria blong Los Anjeles. Ol leta ia oli had blong fogetem.

Be moa impoten i naesfala pikja we mi no save fogetem.

Pikja

Sol Lek Tempol siling rum

Mi tingbaot klia se mi stap long tabu rum blong Sol Lek Tempol, we insaed, oli stap silim ol kapol mo ol famli blong taem naoia mo taem we i no save finis. Mi tingbaot naes olta blong tempol mo mi tingbaot braet laet blong san we i saen tru long windo blong rum. Long taem ia, mi filim mo bin gohed blong filim, hot, sefti mo pis blong gospel laet blong trutok mo lav.

Ol semmak filing olsem oli kam strong bakegen long hat blong mi 20 yia afta, taem mi go insaed long tempol blong mi sil wan moa taem—be tetaem ia wetem waef blong mi, we mitufala i sil blong taem naoia mo blong ful taem we i no save finis. Be, long tetaem ia, mifala i no bin nid blong travel plante kilometa, from se Buenos Aeres Ajentina Tempol, oli bildim finis, mo oli dediketem, mo mifala i ron sot taem nomo aot long hom i kam.

Pikja

Walker famli

Twantetu yia afta long mared mo siling blong mitufala, mitufala i bin gat blesing blong gobak long sem tempol, be long taem ia wetem naes gel blong mitufala, mo mifala i bin sil olsem wan famli blong taem naoia mo blong ful taem we i no save finis.

Taem mi stap tingbak long ol tabu taem ia blong laef blong mi, mi filim wan bigbigfala glad we i stap. Mi bin filim mo gohed blong filim lav blong wan Papa long Heven we i gat lav mo sore, mo i save ol nid blong wanwan mo ol tingting blong hat blong yumi.

Taem hem i tokbaot kam tugeta blong Isrel long las dei, Lod Jehova i talem: “Mi bambae mi putum loa blong mi long tingting blong yufala, mo bambae mi raetemdaon long hat blong yufala. Mo mi bambae mi God blong yufala, mo yufala bambae i man blong mi.”¹¹ Mi mi tangkyu blong oltaem se, stat mi yangfala, Hem i statem blong raetem loa blong Hem long hat blong mi tru long ol tabu odinens long tabu haos blong Hem. Hem i impoten tumas blong save se Hem i God blong yumi, se yumi ol pipol blong Hem, mo we nomata wanem situesen i stap raonem yumi, sapos yumi fetful mo stap obei long ol kavenan we yumi mekem, “ol han blong lav blong hem oli raonem mi blong taem we i no save finis.”¹²

Long taem blong sesen blong ol woman long jeneral konfrens long Oktoba 2019, Presiden Nelson i talem: “Evri hadwok blong yumi blong stap givhan long wanwan long yumi, blong talemaot gospel, blong mekem ol Sent oli kam stret moa, mo blong pemaot ol dedman, evri hadwok ia i luk long tabu tempol.”¹³

Mo tu, long taem blong semfala jeneral konfrens, Presiden Nelson i tijim: “I tru, hae impoten samting blong Kambak blong gospel blong Jisas Kraes, hem i tabu tempol. Ol tabu odinens mo kavenan blong tempol oli plei bigfala pat blong mekem wan pipol i rere blong welkamem Sevya long Seken Kaming blong Hem.”¹⁴

Wan samting we i makem Restoresen ia, i wok blong bildim mo dediketem ol tempol we i spid moa. Taem yumi stap kam tugeta long tugeta saed blong vel, taem yumi stap mekem ol sakrifaes blong wok, mo mekem tempol i laef long laef blong yumi, Lod bae i bildimap yumi tru—Hem i stap bildimap ol kavenan pipol blong Hem.

Mi testifae se gospel laet blong trutok mo lav i saen strong truaot long wol tedei. “Wok ia we i gudfala mo i wan sapraes” we profet Aesea i talem bifo¹⁶ mo Nifae i luk¹⁷ i stap tekples long wan kwik spid, iven long ol taem blong jalenj. Olsem we Josef Smit i talem: “Standet blong Trutok, i flae finis; I no gat wan han we i toti i save stopem wok blong i gohed; … kasem taem ol stamba tingting blong God oli kamtru, mo Hae Jehova bae i talem se wok ia i finis.”¹⁸

Ol brata mo sista. Bae yumi wantem mo disaed tedei, blong yumi wetem ol famli, i lisin long voes blong heven, we i voes blong Sevya blong yumi. Bae yumi mekem mo kipim ol kavenan wetem God, we bae i meksua se yumi stap strong long rod ia we i lidim yumi i gobak long ples we Hem i stap long hem, mo bae yumi glad long ol blesing blong laet blong glori mo trutok blong gospel blong Hem. Long nem blong Jisas Kraes, amen.